រាជធានីភ្នំពេញ ៖ បុរសម្នាក់បានរងរបួសធ្ងន់ធ្ងរ ខណៈដែលគាត់កំពុងជិះម៉ូតូ១គ្រឿងឆ្លងផ្លូវ ស្រាប់តែមានរថយន្តហ៊ីយ៉ាន់ដាយ១គ្រឿងដឹកឥដ្ឋបើកបរក្នុងល្បឿនលឿនទៅដល់បុកទាំងកម្រោលនិងអូសជាង១០ម៉ែត្រទើបឈប់ស្ងៀមបន្ទាប់មកអ្នកបើកបររថយន្តនោះបានរត់គេចបាត់ស្រមោល។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង២រសៀលថ្ងៃទី៨ ខែកុម្ភៈ ឆ្នាំ២០២១ នៅលើកំណាត់ផ្លូវជាតិលេខ៤ ត្រង់ចំណុចមុខ សាលាសង្កាត់ចោមចៅទី៣ ភូមិព្រៃព្រីងខាងជើង សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថា បុរសរងគ្រោះមិនត្រូវបានស្គាល់អត្តសញ្ញាណនោះទេ ហើយនៅមុនពេលកើតហេតុ គេឃើញបុរសរងគ្រោះបានជិះម៉ូតូមួយគ្រឿងម៉ាកស៊ុយហ្ស៊ុយគីវីវ៉ា ពណ៍ក្រហមលាយខ្មៅ ពាក់ស្លាកលេខ ភ្នំពេញ 1BP-7758 ធ្វើដំណើរតាមបណ្តោយផ្លូវបេតុងភូមិព្រៃព្រីងខាងជើងក្នុងទិសដៅពីជើងទៅត្បូង ។ លុះពេលទៅដល់ត្រង់ចំណុចកើតហេតុបានឆ្លងផ្លូវជាតិលេខ៤ ក្នុងបំណងបត់សំដៅទៅទិសខាងកើតវិញ ខណៈពេលឆ្លងផុតរបាំងថ្មពុះចែកទ្រូងផ្លូវបន្តិច ក៏ស្រាប់តែមានរថយន្តមួយគ្រឿងម៉ាកហ៊ីយ៉ាន់ដាយ ពណ៍ស ពាក់ស្លាកលេខ កំពត 3A-1605 ដឹកឥដ្ឋ បើកបរធ្វើដំណើរតាមផ្លូវជាតិលេខ៤ក្នុងទិសដៅពីលិចទៅកើតក្នុងល្បឿនលឿនមកដល់ជាន់ហ្វ្រាំងមិនទាន់ ក៏ជ្រុលទៅបុកនិងអូសជនរងគ្រោះប្រហែល១០ម៉ែត្របណ្តាលឲ្យរងរបួសធ្ងន់ធ្ងរតែម្ដង។
ក្រោយពេលកើតហេតុ អ្នកបើកបររថយន្តបង្កបានចុះពីលើរថយន្តរត់គេចខ្លួនបាត់ស្រមោល ចំណែកជនរងគ្រោះត្រូវបានរថយន្តពេទ្យដឹកយកទៅសង្គ្រោះបន្ទាន់ភ្លាមៗ បន្ទាប់មកនគរបាលចរាចរណ៍ខណ្ឌពោធិ៍សែនជ័យ និងនគរបាលប៉ុស្តិ៍ចោមចៅទី៣ បានចុះទៅធ្វើការវាស់វែងនាំយកទាំងរថយន្តនិងម៉ូតូទៅរក្សាទុកនៅអធិការដ្ឋាននគរបាលខណ្ឌពោធិ៍សែនជ័យរង់ចាំដោះស្រាយតាមច្បាប់៕
ចែករំលែកព័តមាននេះ