ខេត្តបាត់ដំបង៖ បុរសម្នាក់ត្រូវអ្នកបើកគ្រឿងចក្រកាយដី (អេស្កាទ័រ) បើកថយក្រោយដែលទំនងមើលមិនឃើញ បានកិន.ស្លា.ប់ ពេលគាត់កំពុងឈរបញ្ជាឲ្យអ្នកបើកគ្រឿងចក្រនោះកាយដីស្រែរបស់គាត់ កាលពីរសៀលថ្ងៃ ០៧ កុម្ភ: នៅចំណុចអណ្ដូងដេកា…
ខេត្តបាត់ដំបង៖ បុរសម្នាក់ត្រូវអ្នកបើកគ្រឿងចក្រកាយដី (អេស្កាទ័រ) បើកថយក្រោយដែលទំនងមើលមិនឃើញ បានកិន.ស្លា.ប់ ពេលគាត់កំពុងឈរបញ្ជាឲ្យអ្នកបើកគ្រឿងចក្រនោះកាយដីស្រែរបស់គាត់ កាលពីរសៀលថ្ងៃ ០៧ កុម្ភ: នៅចំណុចអណ្ដូងដេកា ស្ថិតក្នុងភូមិថ្មី ឃុំកន្ទឺ១ ស្រុកបាណន់។
សមត្ថកិច្ចបានឲ្យដឹងថា ជនរងគ្រោះឈ្មោះ ជី វ័ន្ត ប្រុស អាយុ៤៨ឆ្នាំ នៅភូមិបោះពោធិ ឃុំអូរដំបង១ ស្រុកសង្កែ។រីឯអ្នកបើកអេស្កាទ័រឈ្មោះ រី ចំរ៉ុង អាយុ៣៦ឆ្នាំ នៅភូមិអូរស្រឡៅ ឃុំអូរដំបង១ ស្រុកសង្កែ។ ជនរងគ្រោះ ត្រូវគ្រឿងចក្រថយក្រោយកិនបណ្ដាលឱ្យស្លា.ប់ ដែលគេអះអាងថា ជារឿងចៃដន្យ។
អធិការស្រុកបាណន់ លោក ប៉ាន់ វ៉ាន់នី បាននិយាយថា ម្ចាស់គ្រឿងចក្រ និងម្ចាស់ដី (ជនរងគ្រោះ) ជាមិត្តភក្ដិនឹងគ្នា ហើយបានកាយបកដីស្រែ ដើម្បីលើកភ្លឺស្រែ។ លោកថា ពេលគ្រឿងចក្រកំពុងកាយ ជនរងគ្រោះដែលជាម្ចាស់ដីបានឈរបញ្ជានៅខាងក្រោយគ្រឿងចក្រ តែពេលគ្រឿងចក្រថយក្រោយមិនបានមើល ឬ មើលមិនឃើញ ស្រាប់តែកិនម្ចាស់ដីស្លា.ប់ភ្លាមៗតែម្ដង។
បើតាមចម្លើយអ្នកបើកគ្រឿងចក្របានប្រាប់ថា ដំបូងខ្លួនបានឃើញពេលជនរងគ្រោះ កំពុងឈរចង្អុលបង្ហាញប្រាប់ឱ្យខ្លួនកាយដី តែខ្លួនស្មានថា ក្រោយគាត់ចង្អុលប្រាប់រួច គាត់ដើរចេញ លុះពេលខ្លួនបើកថយក្រោយមើលគាត់មិនឃើញក៏កិនលើគាត់តែម្ដង។ ជនបានប្រាប់ថា ខ្លួនគ្មានចេតនាបើកគ្រឿងចក្រកិនម្ចាស់ដីទេ តែជារឿងចៃដន្យប៉ុណ្ណោះ។
លោក ប៉ាន់ វ៉ាន់នី បានបញ្ជាក់ថា ក្រោយកើតហេតុមន្ត្រីជំនាញបានចុះទៅពិនិត្យនៅកន្លែងកើតហេតុភ្លាមៗដែរ។ កន្លងជំនាញបានឃាត់ខ្លួនអ្នកបើកគ្រឿងចក្រ តាមបទបញ្ជាលោកស្នងការខេត្ត និង លោកព្រះរាជអាជ្ញាអមសាលាដំបូងខេត្ត។
ចែករំលែកព័តមាននេះ