អាជីវករ​ផ្សារ​គគីរ​ធំ​មិន​ព្រមទៅ​លក់​នៅ​ផ្សារ​ថ្មី ព្រោះ​ខ្លាច​លក់​អត់​ដាច់​គ្មាន​លុយ​បង់​កន្លែង – Koh Santepheap Daily

ADផ្ទាំងផ្សព្វផ្សាយពាណិជ្ជកម្ម

អាជីវករ​ផ្សារ​គគីរ​ធំ​មិន​ព្រមទៅ​លក់​នៅ​ផ្សារ​ថ្មី ព្រោះ​ខ្លាច​លក់​អត់​ដាច់​គ្មាន​លុយ​បង់​កន្លែង

1 ខែ មុន
  • Kandal

ខេត្តកណ្តាល ៖ ក្រុម​អាជីវករ​ជា​ច្រើន​បាន​នាំ​គ្នា​យក​ម្ហូបអាហារ បន្លែ​ផ្លែ​ឈើ ត្រី​សាច់ គ្រឿងទេស មក​ដាក់​តាំង​អង្គុយ​លក់ដូរ​អម​សងខាង​ផ្លូវលំ​១​ខ្សែ​ក្បែរ​ផ្សារ​គគីរ​ធំ​ចាស់ ស្ថិត​ក្នុងភូមិ​គគីរ​ធំ ឃុំ​គគីរ​ធំ ស្រុក​កៀនស្វាយ…


ខេត្តកណ្តាល ៖ ក្រុម​អាជីវករ​ជា​ច្រើន​បាន​នាំ​គ្នា​យក​ម្ហូបអាហារ បន្លែ​ផ្លែ​ឈើ ត្រី​សាច់ គ្រឿងទេស មក​ដាក់​តាំង​អង្គុយ​លក់ដូរ​អម​សងខាង​ផ្លូវលំ​១​ខ្សែ​ក្បែរ​ផ្សារ​គគីរ​ធំ​ចាស់ ស្ថិត​ក្នុងភូមិ​គគីរ​ធំ ឃុំ​គគីរ​ធំ ស្រុក​កៀនស្វាយ ខេត្តកណ្តាល ដែល​ធ្វើ​ឲ្យ​បាត់បង់​សោភ័ណ​ភាព និង​បង្ក​ការ​លំបាក​ដល់​អ្នកដំណើរ​កកស្ទះ​ជា​រៀង​រាល់​ព្រឹកល្ងាច បើ​ទោះបីជា​គម្រោង​ផ្សារ​ឯកជន​ថ្មី​ដែល​គេ​ទើបនឹង​សាងសង់​រួចរាល់​ជា​ស្ថាពរ​នៅ​ក្បែរ​ខាងក្រោយ​ខ្នង​របស់​ពួក​គាត់ ក៏​ពួក​គាត់​មិន​ព្រមទៅ​លក់​ដែរ​។ បើ​តាម​ក្រុម​អាជីវករ​បាន​ប្រាប់​អ្នក​សារព័ត៌មាន​កាលពី​ព្រឹក​ថ្ងៃ​ទី​៦ ខែកុម្ភៈ ឆ្នាំ​២០២១​នេះ​ថា ពួក​គាត់​លក់ដូរ​នៅ​ទី​នេះ​ខ្លះ​ជាង​១​ឆ្នាំ និង​ខ្លះ​រហូត​៣-៤-៥​ឆ្នាំ​ក៏​មាន​ដែរ​។

ប៉ុន្តែ​ពី​មុន​លក់​នៅ​តាម​ចិញ្ចើម​ថ្នល់ជាតិ​លេខ​១ តែ​ដល់​អាជ្ញាធរ​សមត្ថកិច្ច​ចុះ​រៀបចំ​សណ្តាប់ធ្នាប់​តាម​ដងផ្លូវ គេ​ដេញ​ពួក​គាត់​ឲ្យ​ចូល​មក​លក់​នៅ​ក្នុង​ផ្សារ​គគីរ​ធំ​ចាស់ តែ​ផ្សារ​ចង្អៀត​ពេក​គ្មាន​កន្លែង​លក់ ក៏​សម្រេចចិត្ត​រៀង​ៗ​ខ្លួន​នាំ​គ្នា​មក​អង្គុយ​លក់​នៅ​តាម​ចិញ្ចើម​ផ្លូវលំ​តែ​ម្តង​។ ហើយ​ការ​អង្គុយ​លក់​នេះ​ពួក​គាត់​ចំណាយ​ប្រាក់​បង់ថ្លៃ​ភាស៊ី​១​ថ្ងៃ​៥០០​រៀល និង​បង់ថ្លៃ​លក់​តាម​មុខ​ផ្ទះ​គេ​ម្នាក់​១០០០​រៀល ២០០០​រៀល ៣០០០​រៀល​ទៀត តាម​អ្នកលក់​តិច​ឬ​ច្រើន​។ ក្រុម​អាជីវករ​អះអាង​ថា ការ​អង្គុយ​លក់ដូរ​របស់​ពួក​គាត់​មិន​បង្ក​អោយ​ប៉ះពាល់​ដល់​អ្នក​ធ្វើ​ដំណើរ​ឡើយ ព្រោះ​គាត់​ចូលរួម​ស្តាប់​តាម​ការ​ណែនាំ​របស់ អាជ្ញាធរ​រាល់ពេល​ចុះ​មក​រៀបចំ​សណ្តាប់ធ្នាប់​ម្តង​ៗ​ឲ្យ​ពួក​គាត់​លក់​ត្រូវ​ទុក​ផ្លូវ​៤​ម៉ែត្រ​ដាច់ខាត​មិន​រំកិល​ចូល​ទេ​។

អាជីវករ​បន្ត​ថា ឥឡូវ​មាន​ក្រុមហ៊ុន​ឯកជន​គេ​វិនិយោគ​សាងសង់​ផ្សារ​ថ្មី​នៅ​ក្បែរ​ផ្សារ​ចាស់ ពួក​គាត់​ក៏​ចង់ទៅ​លក់​នៅ​កន្លែង​នោះ​ដែរ ព្រោះ​ត្រជាក់​ហើយ​តម្លៃ​ក៏​ថោក​សមរម្យ​ទៀត ដោយ​១​ចន្លោះ​ទំហំ​១​ម៉ែត្រ​២​តឹក​បួន​ជ្រុង តម្លៃ​ត្រឹមតែ​៦០០០០​រៀល (​ប្រាំមួយ​ម៉ឺន​រៀល​)​ក្នុង​១​ខែ​។ តែ​ពួក​គាត់​ខ្លាច​ទៅ​លក់​មិន​ដាច់​គ្មាន​លុយ​បង់​សង​គេ​។ ជាក់ស្តែង​អាជីវករ​មួយ​ចំនួន​ក៏​ធ្លាប់​បាន​ទៅ​លក់​នៅ​ផ្សារ​ថ្មី​នោះ​ដែរ តែ​លក់​មិន​ដាច់​ក៏​នាំ​គ្នារ​ត់មកល​ក់​នៅ​ចិញ្ចើម​ផ្លូវ​នេះ​វិញ​។

ទោះ​យ៉ាងណា​មហាជន​ជា​ច្រើន​និយាយ​រិះគន់​ថា ផ្លូវលំ​គឺជា​ផ្លូវ​សាធារណៈ​សម្រាប់​ឲ្យ​ប្រជាជន​ទូទៅ​ធ្វើ​ដំណើរ​ឆ្លងកាត់ មិនមែន​សម្រាប់​ឲ្យ​ជី​វក​រដាក់​តាំង​លក់​ម្ហូបអាហារ នំចំណី បន្លែ​ផ្លែ​ឈើ​ត្រី​សាច់​គ្រប់​ប្រភេទ គ្រឿងទេស អាណា​ធិ​ប​តេ​យ្យ​នៅ​អម​សងខាង​ផ្លូវ​បែប​នេះ​ឡើយ វា​នាំ​ឲ្យ​បាត់បង់​សោភ័ណ​ភាព និង​ប៉ះពាល់​ដល់​អ្នក​ធ្វើ​ដំណើរ​កកស្ទះ​ណែន​តាន់តាប់​ចាប់ពី​ព្រឹក​ម៉ោង​៥​ដល់​ម៉ោង​៧ និង​ល្ងាច​ចាប់ពី​ម៉ោង​ប្រហែល​ដល់​ម៉ោង​៥ កុំ​ថា​ឡើយ​ឡាន​ម៉ូតូ សូ​ម្បី​តែ​មនុស្ស​ដើរ​សឹងតែ​មិន​រួច​ផង​។ បើ​ទោះបី​អាជ្ញាធរ​សមត្ថកិច្ច​ចុះ​មក​រៀបចំ​សណ្តាប់ធ្នាប់​ញឹក​ញ៉ាប់​ក៏​ដោយ តែ​ពេល​អាជ្ញាធរ​ត្រឡប់​ទៅ​វិញ​ដដែល​ដូច​វែក​ចក​អ៊ីចឹង​៕ ដោយ ៖ ស៊ឹ​ម សាន់