រាជធានីភ្នំពេញ ៖ ស្ត្រីម្នាក់មិនត្រូវបានឱ្យស្គាល់អត្តសញ្ញាណឡើយបានធ្វើដំណើរទៅប្តឹងប៉ូលិសនៅប៉ុស្តិ៍នគរបាលរដ្ឋបាលសង្កាត់ទួលសង្កែកាលពីព្រឹកមិញ (ព្រឹកថ្ងៃទី០៩ សីហា ២០១៥) ដោយអះអាងថា នាងបានមានទំនាក់ទំនងជាមួយបុរសម្នាក់ជាគ្រូបង្រៀនភាសាអង់គ្លេសរហូតជ្រុលខ្លួនជ្រុលប្រាណជាមួយគ្នា មិនតែប៉ុណ្ណោះបុរសនោះបានប្រើអំពើហិង្សាមកលើរូបនាង ហើយថែមទាំងដោះដៃរត់ចោលនាងបាត់ទៀតផង ។
ស្ត្រីរងគ្រោះបានឱ្យដឹងថា បុរសនោះឈ្មោះ សាន សឿន អាយុ៣៣ឆ្នាំ ជាគ្រូបង្រៀនភាសាអង់គ្លេសនៅសាលាឯកជនមួយ ស្នាក់នៅផ្ទះជួលលេខ៨៦៤ ក្នុងភូមិផ្សារតួច សង្កាត់ទួលសង្កែ ខណ្ឌឫស្សីកែវ និងមានស្រុកកំណើតភូមិវត្ត ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង ។ ចំណែកស្ត្រីរងគ្រោះមិនបានប្រាប់ពីអត្តសញ្ញាណខ្លួនឯងឱ្យដឹងទេ គ្រាន់តែប្រាប់ថា នាងមានអាយុ៣៥ឆ្នាំ ជាបុគ្គលិកក្រុមហ៊ុនឯកជនមួយនៅខេត្តកំពង់ចាម ។
ស្ត្រីរូបនោះបានឱ្យដឹងទៀតថា នាង និងបុរសឈ្មោះ សាន សឿន បានស្គាល់គ្នាតាមរយៈហ្វេសប៊ុក៤-៥ខែហើយ ប៉ុន្តែមិនបានស្គាល់គ្នាស្អិតរមួតនោះទេ ទើបតែ២ខែចុងក្រោយនេះបានទំនាក់ទំនងគ្នាស្អិតរមួតរហូតបានខ្លួនប្រាណគ្នាកាលពីថ្ងៃទី១៦ ខែឧសភា ២០១៥នេះ ។ បន្ទាប់ពីបានខ្លួនប្រាណហើយ បុរសរូបនេះបានព្យាយាមដោះដៃពីនាងរហូត Block ហ្វេសប៊ុកនាងចោលទៀត ពេលនាងសួរនាំក៏កើតជាទំនាស់រហូតប្រើអំពើហិង្សាបង្ករបួសស្នាមមកលើរូបនាងទៀតផងកាលពីប៉ុន្មានអាទិត្យមុន ហើយនាងក៏បានទៅប្តឹងនៅប៉ុស្តិ៍ម្តងដែរ តែសមត្ថកិច្ចហាក់មិនសូវអើរពើឡើយ ។
ស្ត្រីរូបនោះបន្តទៀតថា រហូតដល់ថ្ងៃសុក្រ ទី០៧ សីហា ២០១៥ នាងបានព្យាយាមទាក់ទងជាមួយបុរសរូបនោះរហូតធ្វើដំណើរពីកំពង់ចាមមកជួបនៅបន្ទប់ជួល តែត្រូវបុរសរូបនោះចាក់សោរឱ្យដេកក្រៅផ្ទះ១យប់ទៀតផង ហើយថ្ងៃនេះមកប្តឹងម្តងទៀតឱ្យសមត្ថកិច្ចជួយ បន្ទាប់ពីបុរសជាគ្រូបង្រៀនរូបនោះបានរើអីវ៉ាន់ទៅបាត់អស់មិនដឹងជាទៅនៅទីណា ។
ព័ត៌មានលម្អិតនឹងផ្សាយនៅលើទំព័រកាសែតកោះសន្តិភាព
ចែករំលែកព័តមាននេះ