ត្រៀមទប់ទល់រដូវប្រាំង! អភិបាលខេត្តបន្ទាយមានជ័យ ចុះពិនិត្យប្រភពទឹកនៅ ៦ ក្រុង-ស្រុក ដើម្បីរៀបចំផែនការរក្សាទឹកជូនពលរដ្ឋ
- បន្ទាយមានជ័យ
ខេត្តបន្ទាយមានជ័យ ៖ ត្រៀមឆ្លើយតបរដូវប្រាំង! ថ្នាក់ដឹកនាំខេត្តបន្ទាយមានជ័យ ចុះពិនិត្យស្ថានភាពទឹកផ្ទាល់នៅ ៦ ក្រុង-ស្រុក ដើម្បីរៀបចំផែនការរក្សាប្រភពទឹកទុកជូនប្រជាពលរដ្ឋនាពេលខាងមុខ ។
ជាក់ស្តែងរដ្ឋបាលស្រុកភ្នំស្រុក ខេត្តបន្ទាយមានជ័យ បានប្រកាសនាយប់ថ្ងៃទី២៩ ខែតុលានេះថា ៖ នាថ្ងៃទី២៩ ខែតុលា ឆ្នាំ២០២៦ លោកស្រី ចំរើន ដាណេ អភិបាលនៃគណៈអភិបាលស្រុក បានអញ្ជើញចូលរួមអមដំណើរឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ ក្នុងឱកាសដែលឯកឧត្តមអភិបាលខេត្តចុះពិនិត្យមើលស្ថានភាពទឹក នៅតាមមូលដ្ឋានក្រុង-ស្រុកចំនួន៦ នៅក្នុងភូមិសាស្ត្រខេត្តបន្ទាយមានជ័យ ដើម្បីដាក់ចេញវិធានការត្រៀមរក្សាទឹកទុកសម្រាប់ប្រើប្រាស់នៅរដូវប្រាំងនាពេលខាងមុខ ។
ក្នុងនោះឯកឧត្តម អ៊ុ រាត្រី ក៏បានបញ្ជារដល់មន្ទីរ ធនធានទឹក និងឧតុនិយមខេត្ត ដើម្បីបិទទឹកនៅក្នុងអាងនីមួយៗ ដែលមាននៅក្នុងស្រុក និងឃុំ ដើម្បីរក្សាទឹកទុកសម្រាប់ប្រើប្រាស់នារដូវប្រាំង ដោយសារតែនៅឆ្នាំ២០២៧ខាងនេះ កម្ពុជាទទួលរងឥទ្ធិពលរលកកម្តៅខ្លាំង ប្រឈមនឹងការខ្វះខាតទឹកសម្រាប់ប្រើប្រាស់ប្រចាំថ្ងៃ។
ជាមួយគ្នានោះឯកឧត្តមក៏បានធ្វើការអំពាវនាវដល់បងប្អូនប្រជាពលរដ្ឋ ប្រើប្រាស់ទឹកដោយលក្ខណៈសន្សំសំចៃខ្ពស់ ខណៈដែលយើងអាចប្រឈមទៅនឹងការខ្វះខាតទឹកនារដូវប្រាំង នាពេលខាងមុខ។
ក្នុងនោះដែរឧត្តមអភិបាលខេត្ត ក៏បានណែនាំទៅដល់អាជ្ញាធរមូលដ្ឋានឃុំ ត្រូវសិក្សាអំពីលទ្ធភាពនៃការស្ដារអាង បឹង ឬប្រឡាយទៅតាមលទ្ធភាពដលអាចធ្វើទៅបាន នៅក្នុងមូលដ្ឋានរបស់ខ្លួន ដើម្បីសំដៅធ្វើយ៉ាងណាមានទឹក សម្រាប់ប្រើប្រាស់គ្រប់គ្រាន់ ។
សូមបញ្ជាក់ថា យោងតាមទិន្ន័យរបស់មន្ទីរធនធានទឹក និងឧតុនិយមខេត្តបន្ទាយមានជ័យ ប្រព័ន្ធធារាសាស្ត្រពេញលេញ ដែលមានប្រភពទឹក ប្រឡាយមេ ប្រឡាយរង ប្រឡាយស្រោចស្រព និងប្រឡាយដោះទឹក សុរបមានចំនួន៩៣កន្លែង ទូទាំង ៩ក្រុង-ស្រុក ក្នុងខេត្តបន្ទាយមានជ័យ៕
ចែករំលែកព័តមាននេះ