ខេត្តស្វាយរៀង ៖ បុរសវ័យ៦៤ឆ្នាំម្នាក់ ត្រូវសមត្ថកិច្ចចាប់ខ្លួនពីបទចាក់ថ្នាំ បណ្តាលឲ្យស្ត្រីបានស្លាប់ដែលអ្នកស្រុកអះអាងថា ជាគ្រូពេទ្យដើរចាក់ថ្នាំតាមភូមិ ហើយបន្ទាប់ពីចាក់ថ្នាំ៤ម្ជុលឲ្យស្ត្រីម្នាក់ ដែលមានជម្ងឺ បណ្ដាលឱ្យប្រតិកម្មថ្នាំ និងមានអាការ:ចេញរមាស់លើខ្លួន…
ខេត្តស្វាយរៀង ៖ បុរសវ័យ៦៤ឆ្នាំម្នាក់ ត្រូវសមត្ថកិច្ចចាប់ខ្លួនពីបទចាក់ថ្នាំ បណ្តាលឲ្យស្ត្រីបានស្លាប់ដែលអ្នកស្រុកអះអាងថា ជាគ្រូពេទ្យដើរចាក់ថ្នាំតាមភូមិ ហើយបន្ទាប់ពីចាក់ថ្នាំ៤ម្ជុលឲ្យស្ត្រីម្នាក់ ដែលមានជម្ងឺ បណ្ដាលឱ្យប្រតិកម្មថ្នាំ និងមានអាការ:ចេញរមាស់លើខ្លួន និងឈឺចង្កេះ រហូតប្រកាច់ស្លាប់យ៉ាងអណោចអធម្ម ។
បើតាមសមត្ថកិច្ចបានឲ្យដឹងថា ករណីនេះបានកើតឡើង កាលពីវេលាម៉ោង២រសៀល ថ្ងៃទី៤ ខែកុម្ភៈ ឆ្នាំ២០២១ នៅភូមិជុបឃុំកណ្ដៀងរាយ ស្រុកស្វាយទាប ខេត្តស្វាយរៀង ។
មន្ត្រីនគរបាលស្រុកស្វាយទាប បានឱ្យដឹងទៀតថា ជនសង្ស័យឈ្មោះ ឃួន សារ៉ន ភេទប្រុស អាយុ៦៤ឆ្នាំ មុខរបរធ្វើពេទ្យព្យាបាលតាមភូមិ មានទីលំនៅភូមិថ្នល់កែង ឃុំកណ្ដៀងរាយស្រុកស្វាយទាបខេត្តស្វាយរៀង ។ ចំណែកស្ត្រីរងគ្រោះមានឈ្មោះ គឹម សោភ័ណ្ឌ អាយុ៤៧ឆ្នាំ រស់នៅភូមិឃុំកើតហេតុខាងលើ បានស្លាប់ក្រោយពីប្រតិកម្មថ្នាំ ។
ប្រភពបន្តទៀតថា ក្រោយពីស្ត្រីរងគ្រោះបានស្លាប់ក្រុមគ្រួសារក៏បានប្តឹងសមត្ថកិច្ចឲ្យចុះទៅពិនិត្យ និងជួយអន្តរាគមន៍ ។ ក្រោយពីសមត្ថកិច្ចទទួលពាក្យបណ្តឹងពីប្រជាពលរដ្ឋ មានករណីគ្រូពេទ្យចាក់ថ្នាំបង្កឲ្យអ្នកជម្ងឺស្លាប់ សមត្ថកិច្ចបានចុះទៅពិនិត្យរាយការណ៍ជូនលោកស្នងការដ្ឋាននគបាលខេត្ត លោកស្នងការបានបញ្ជាឲ្យមន្ត្រីនគបាលបច្ចេកទេសស្នងការដ្ឋាននគបាលខេត្តសហការជាមួយមន្ត្រីនគបាលមូលដ្ឋាន និងមន្ត្រីមន្ទីរសុខាភិបាលខេត្ត និងគ្រូពេទ្យបានចុះមកពិនិត្យសព ។
លទ្ធផលក្រុមគ្រូពេទ្យសន្និដ្ឋានថា ៖ សាកសពពិតជាស្លាប់ ដោយប្រតិកម្មថ្នាំប្រាកដមែន ។ ទើបសមត្ថកិច្ចឈានដល់ឃាត់ខ្លួនគ្រូពេទ្យរូបនោះ ដើម្បីចាត់ការតាមនីតិវិធីតែម្ដង ។ ចំណែកសពស្ត្រីរងគ្រោះបានប្រគល់ឲ្យក្រុមគ្រួសារធ្វើបុណ្យតាមប្រពៃណី ៕
ចែករំលែកព័តមាននេះ