ខេត្តស្វាយរៀង​៖ ​​កាលពីថ្ងៃទី៥ ខែកុម្ភៈ ឆ្នាំ២០២១ កម្លាំងសមត្តកិច្ចនគរបាល​ស្រុកស្វាយទាប ខេត្តស្វាយរៀង បាន​ឃាត់ខ្លួនគ្រូពេទ្យឯកជនម្នាក់ ពាក់ពន្ធពីបទ.មនុស្សឃាតដោយអចេតនា ករណីចាក់ថ្នាំជំងឺ​រមាស់ បណ្តាលឲ្យបាត់បង់ជីវិត​ដល់ជនរងគ្រោះ​។

គ្រូពេទ្យនោះ ​ឈ្មោះ ឃួន សារ៉ន ភេទប្រុស អាយុ ៦៥ឆ្នាំ ​ជាគ្រូបង្រៀនចូលនិវត្តន៍ និងជាគ្រូពេទ្យឯកជនព្យាបាលជំងឺតាមភូមិ មានទីលំ​នៅភូមិថ្នល់កែង ឃុំកណ្តៀងរាយ ស្រុកស្វាយទាប ខេត្តស្វាយ​រៀង​។

សេចក្តីរាយការណ៍បន្តថា កាលពីថ្ងៃទី៤ ខែកុម្ភៈ គ្រូពេទ្យ បានចាក់ថ្នាំជំងឺ​រមាស់ឲ្យជនរងគ្រោះ ឈ្មោះ គឹម សោភ័ណ្ឌ ភេទស្រី អាយុ ៤៧ឆ្នាំ ជាកសិករ រស់នៅភូមិជុប ឃុំកណ្តៀងរាយ ស្រុកស្វាយទាប ខេត្តស្វាយរៀង បណ្តាលឲ្យជនរងគ្រោះ​បាត់បង់ជីវិត​។

បន្ទាប់ពីគ្រោះថ្នាក់ដល់​ជនរងគ្រោះ ក្រុមគ្រួសារ បានយករឿងនេះ រាយការណ៍​ជូនសមត្តកិច្ច ទើបសមត្ថកិច្ច​ ឃាត់ខ្លួនគ្រូពេទ្យភូមិនោះ ដើម្បីកសាងសំណុំរឿង ចាត់ការ​តាមនីតិវិធី​៕ ដោយ៖ ឃឹម ប៊ុនណាក់