ខេត្តសៀមរាប ៖ មន្ត្រីអាវុធហត្ថខេត្តសៀមរាបម្នាក់ និងអ្នកកាសែត រួមនឹងមនុស្សមួយក្រុមបាននាំគ្នាផឹកស៊ីក្នុងហាង ក្រោយមកក៏មានករណីផ្ទុះអាវុធ១គ្រាប់ បង្កការភ្ញាក់ផ្អើលដល់ពលរដ្ឋនៅក្នុងក្រុងសៀមរាប។ ហេតុការណ៍នេះបានកើតឡើងនៅវេលាម៉ោង៩និង១០នាទីយប់ ថ្ងៃទី០៤ ខែកុម្ភៈ…
ខេត្តសៀមរាប ៖ មន្ត្រីអាវុធហត្ថខេត្តសៀមរាបម្នាក់ និងអ្នកកាសែត រួមនឹងមនុស្សមួយក្រុមបាននាំគ្នាផឹកស៊ីក្នុងហាង ក្រោយមកក៏មានករណីផ្ទុះអាវុធ១គ្រាប់ បង្កការភ្ញាក់ផ្អើលដល់ពលរដ្ឋនៅក្នុងក្រុងសៀមរាប។ ហេតុការណ៍នេះបានកើតឡើងនៅវេលាម៉ោង៩និង១០នាទីយប់ ថ្ងៃទី០៤ ខែកុម្ភៈ ឆ្នាំ២០២១ ស្ថិតចំណុចក្នុងបរិវេណភោជនីយដ្ឋាន «មហាលាភ៩៩៩៩» ក្នុង់ភូមិទ្រាំង សង្កាត់ស្លក្រាម ក្រុងសៀមរាប។
លោក តាំង ហូរ អ្នកកាសែត ANN បានប្រាប់អ្នកសារព័ត៌មានថា ករណីនេះ លោកកំពុងអង្គុយផឹកស៊ីជុំគ្នា រួចហើយជនបង្កជាមន្ត្រីអាវុធហត្ថបានវាយលោក១ដៃ និងដកកាំភ្លើងរកបាញ់។ គ្រានោះ លោកក៏រត់គេចខ្លួនសិន និងបានដាក់ពាក្យបណ្តឹងទៅសមត្ថកិច្ចផងដែរ។ ចំណែកជនបង្កជាមន្ត្រីអាវុធហត្ថ មិនអាចសុំការពន្យល់បានទេ ដោយលោកថា កំពុងជាប់រវល់នៅក្នុងបន្ទាយ។
សមត្ថកិច្ចនគរបាលជំនាញខេត្តបានឱ្យដឹងថា បើតាមការសួរនាំសាក្សី ករណីខាងលើនេះបង្កឡើងដោយឈ្មោះ តាំង ហូ ភេទប្រុស អាយុ៤២ឆ្នាំ មុខរបរអ្នកសារព័ត៌មាន ANN មានទីលំនៅបច្ចុប្បន្នក្នុងភូមិភ្ញាជ័យ សង្កាត់ស្វាយដង្គុំ ក្រុង-ខេត្តសៀមរាប ក្នុងខណៈកំពុងស៊ីផឹកបានធ្វើសកម្មភាពដោយយកកែវស្រាគប់ទៅត្រូវក្បាលរបស់ឈ្មោះ អ៊ុក សុផល ភេទប្រុស អាយុ៤៥ឆ្នាំ មុខរបរកងរាជអាវុធហត្ថខេត្ត មានទីលំនៅបច្ចុប្បន្នក្នុងភូមិចុងកៅស៊ូ សង្កាត់ស្លក្រាម ក្រុង-ខេត្តសៀមរាប ជាហេតុបណ្តាលឱ្យត្រូវថ្ងាសលើចិញ្ចើម ភ្នែកផ្នែកខាងឆ្វេងរយះហូរឈាមពេញមុខ ដេរចំនួនអស់០៧ថ្នេរ និងមានស្នាមនៅលើក្បាល (របួសមុតអំបែងកែវ) ។
ក្រោយពីធ្វើសកម្មភាពគប់ទៅលើឈ្មោះ អ៊ុក សុផល ឱ្យត្រូវរបួសរួច ជនបង្កបានឈ្មោះ តាំង ហូ បានរត់គេចខ្លួនចេញទៅខាងក្រៅហាងបាត់ ។ ហើយឈ្មោះ អ៊ុក សុផល ដឹងថា ខ្លួនមានរបួសហូរឈាមពេញមុខ និងដងខ្លួន ក៏បានដើរចេញពីខ្យូសផឹកស៊ីសំដៅមករថយន្តរបស់ខ្លួន ហើយបានទាញយកកាំភ្លើងខ្លីពីក្នុងរថយន្តដើរចេញមកខាងក្រៅ និងបានបាញ់ឡើងលើចំនួន១គ្រាប់។
ដោយសារតែមុខរបួសហូរឈាមច្រើនពេក បុគ្គលិក និងសន្តិសុខក្នុងហាងខាងលើ បាននាំឈ្មោះ អ៊ុក សុផល ទៅព្យាបាលមុខរបួសនៅមន្ទីរពេទ្យ ។ បន្ទាប់មកស្រាប់តែឈ្មោះ តាំង ហូរ បានចូលមកក្នុងហាងខាងលើម្តងទៀត ក៏បានស្រែកជេរឡូឡា ពេលនោះសមត្ថកិច្ចនគរបាលក៏បាននាំឈ្មោះ តាំង ហូរ ទៅកាន់ប៉ុស្តិ៍រដ្ឋបាលសង្កាត់ស្លក្រាម ដើម្បីសួរនាំតែម្តង ។
ប្រភពពីសមត្ថកិច្ចជំនាញបញ្ជាក់ថា មូលហេតុដែលបណ្តាលឱ្យមានករណីហិង្សាខាងលើកើតឡើង គឺបណ្តាលមកពីផឹកស៊ីជាមួយគ្នាក៏មានទំនាស់ពាក្យសម្តីគ្នា ។ បច្ចុប្បន្ន កម្លាំងការិយាជំនាញនៃកងរាជអាវុធហត្ថខេត្តសៀមរាប កំពុងស្រាវជ្រាវ និងសួរនាំសាក្សីនៅចំណុចកើតហេតុខាងលើ ដើម្បីអនុវត្តន៍តាមនីតិវិធីច្បាប់។
បើតាមប្រភពមួយចំនួនបានទម្លាយថា ហេតុការណ៍កើតឡើងខាងលើនេះ គឺមានការចូលរួមផឹកស៊ីក្នុងហាងមានគ្នា៥ទៅ៦នាក់ ដែលមានសមាសភាពចូលរួមមកពីខេត្តឧត្តរមានជ័យខ្លះផងដែរ។ ហើយករណីនេះគេទម្លាយទៀតថា ដោយសារទំនាស់ផលប្រយោជន៍ក្នុងវង់ផឹកស៊ី ទើបឈានដល់ការបាញ់សេរី បណ្តាលឱ្យភ្ញាក់ផ្អើលពេញក្រុងសៀមរាប។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ