ខេត្តកំពង់ឆ្នាំង ៖ រឿងកូនកម្លោះស្លាប់ក្នុងពិធីមង្គលការ ដែលកម្មវិធីបានឈានដល់ហៀបនិងទទួលភ្ញៀវទៅហើយ គឺមានភ្ញៀវចូលរួមរហូតដល់ទៅ៥២តុ ក្នុងចំនួនម្ហូបដែលត្រៀមទទួលភ្ញៀវ ៦៥តុ ។
![](https://kohsantepheapdaily.com.kh/wp-content/images/2021/02/6d78f4ba9cc61e332759567282dda9e8-1024x461.jpg)
នេះមានន័យថា ៖ កម្មវិធីមង្គលការ គឺបានប្រព្រឹត្តទៅជាធម្មតា ដោយមានភ្ញៀវចូលរួមកុះករ និងមានតន្ត្រីកំដរជាធម្មតា ហាក់គ្មានអ្វីកើតឡើង គ្រាន់តែពេលទទួលភ្ញៀវអវត្តមានតែកូនកម្លោះប៉ុណ្ណោះ ។ ដូច្នេះ មិនដូចនូវអ្វីដែលលើកឡើងថា ៖ រោងការក្លាយជារោងបុណ្យសពនោះឡើយ ។
![](https://kohsantepheapdaily.com.kh/wp-content/images/2021/02/8a8a8c73099743604cd534fc17ae4d09-1024x461.jpg)
ពិតណាស់ថា ជាការសង្វេគខ្លាំងណាស់ គ្រាដែលមង្គលការមួយស្ថិតក្នុងភូមិកណ្តាល សង្កាត់ផ្សារឆ្នាំង ក្រុងកំពង់ឆ្នាំង ដែលបានដំណើរការជាបន្តបន្ទាប់ស្ទើចប់សព្វគ្រប់ទៅហើយ នៅឡើយតែកម្មវិធីទទួលភ្ញៀវប៉ុណ្ណោះ ស្រាប់តែនៅម៉ោងជាង៣រសៀល ថ្ងៃទី៤ ខែកុម្ភៈ ឆ្នាំ២០២១ កូនកម្លោះឈ្មោះ ក្រុង ពុធ មានអាការមិនស្រួលខ្លួន (ខ្យល់គ) ហើយត្រូវបានក្រុមគ្រួសារដឹកយកទៅសង្គ្រោះនៅមន្ទីរពេទ្យខេត្តកំពង់ឆ្នាំង ហើយក៏បានស្លាប់នៅថ្ងៃដដែល ។
![](https://kohsantepheapdaily.com.kh/wp-content/images/2021/02/205e7aa7f32f1db936a678cb18e689f5-1024x461.jpg)
ក្រោយពីកូនកម្លោះបានស្លាប់ ក្រុមគ្រួសារខាងប្រុសបានដឹកសពយកទៅតម្កល់ធ្វើបុណ្យនៅវត្តសំរោង ក្នុងភូមិសំរោង សង្កាត់ផ្សារឆ្នាំង ក្រុងកំពង់ឆ្នាំង ។
![](https://kohsantepheapdaily.com.kh/wp-content/images/2021/02/d95ee74470d2624608bc822904153224-1024x461.jpg)
ប្រភពពីក្រុមគ្រួសារសពកូនកម្លោះបានបន្តថា ៖ ក្រោយកើតហេតុកូនកម្លោះបានស្លាប់ក្នុងពេលហៀបនឹងទទួលភ្ញៀវបៀបនេះ ក្រុមគ្រួសារបានប្រាប់ទៅកូនក្រមុំថា ៖ ប្តី(កូនកម្លោះ) នៅមិនទាន់ជាទេ កំពុងនៅពេទ្យ នៅឡើយហើយឱ្យកូនក្រមុំទទួលភ្ញៀវតែម្នាក់ឯងសិនចុះ ។
![](https://kohsantepheapdaily.com.kh/wp-content/images/2021/02/bf17d583737dbd2cad4a4d4e20c0c3f2-1024x461.jpg)
ប្រភពដដែលបានបន្តថា ៖ ការនិយាយបែបនេះ គឺក្នុងគោលបំណងឱ្យពិធីមង្គលការបានប្រព្រឹត្តទៅជាធម្មតា ព្រោះដល់ពេលទទួលភ្ញៀវទៅហើយ ណាមួយដើម្បីបានចំណងដៃសម្រាប់ទូរទាត់លើថ្លៃចំណាយផ្សេងៗដូចជា ថ្លៃភេ្លងខ្មែរ តន្ត្រីសម័យ សំអាង និងម្ហូបជាដើម ។ លុះពេលពិធីទទួលភ្ញៀវចាប់ផ្តើម ក៏មានភ្ញៀវបានមកចូលររួមពិសាអាហារ ក្នុងមង្គលការជាបន្តបន្ទាប់រហូតដល់ពេញ៥២តុ ក្នុងចំនួន៦៥តុ ដែលម្ចាស់ដើមការបានកុម្មង់ ។
![](https://kohsantepheapdaily.com.kh/wp-content/images/2021/02/c65a945c8b03bdda242b574127028dde-1.jpg)
អ្វីដែលចាប់អារម្មណ៍នោះ ទោះថា មានការលាក់បាំងពីការស្លាប់របស់កូនកម្លោះពិតមែន តែក្នុងពេលកំពុងទទួលភ្ញៀវ កូនក្រមុំដែលមានឈ្មោះ ជា ថាវី មានសភាពទន់ ហើយត្រូវបានអ្នកកំដរឈរទប់ និងគ្រាឱ្យអង្គុយជាញឹកញាប់ដែរ ដែលតាមការសង្កេត គឺកូនក្រមុំបានដឹងក្នុងរឿងកូនកម្លោះបានស្លាប់៕
ចែករំលែកព័តមាននេះ