រាជធានីភ្នំពេញ ៖ ពិតជាដូចការគ្រោងទុកសាលាដំបូងរាជធានីភ្នំពេញ នាថ្ងៃទី៤ ខែកម្ភៈ ឆ្នាំ២០២១នេះ បានលើកយកសំណុំរឿង សម រង្ស៊ី និងគូកនដែលជាអតីតសកម្មជនគណបក្សសង្គ្រោះជាតិ…
រាជធានីភ្នំពេញ ៖ ពិតជាដូចការគ្រោងទុកសាលាដំបូងរាជធានីភ្នំពេញ នាថ្ងៃទី៤ ខែកម្ភៈ ឆ្នាំ២០២១នេះ បានលើកយកសំណុំរឿង សម រង្ស៊ី និងគូកនដែលជាអតីតសកម្មជនគណបក្សសង្គ្រោះជាតិ ពាក់ព័ន្ធពីបទ រួមគំនិតក្បត់ និងញុះញង់ឲ្យប្រព្រឹត្តបទឧក្រិដ្ឋជាអាទិ៍ មកបើកសវនាការជំនុំជម្រះទោស។
ដែលសវនាការនេះដឹកនាំដោយលោក រស់ ពិសិដ្ឋ អនុប្រធានសាលាដំបូងរាជធានីភ្នំពេញ ជាប្រធានក្រុមប្រឹក្សាជំនុំជម្រះ លោក កើត សាំង នឹងលោក អ៊ឹម វណ្ណៈ ចៅក្រមអមក្នុងនោះមានមេធាវីការពារដើមបណ្តឹងរដ្ឋប្បវេណី និងមេធាវីការពារក្តីឲ្យជនត្រូវចោទបានចូលរួមផងដែរ។ សវនាការជាសាធារណៈដែលបានធ្វើឡើងចំពោះមុខជនជាប់ចោទចំនួន១៣នាក់ ដែលស្ថិតនៅក្នុងឃុំ និងកំបាំងមុខជនជាប់ចោទ៨នាក់ ដែលកំពុងគេចខ្លួននៅក្រៅប្រទេស។ ក្នុងក៏មានការចួលរួមតាមដានយ៉ាងយកចិត្តទុកដាក់ ពីសំណាក់តំណាងអង្គទូត អង្គការសង្គមស៊ីវិល អ្នកសារព័ត៌មានក្នុងស្រុកប្រមាណជាង១០នាក់ ទៀតផង។
ចំណែកនៅក្រៅបរិវេណសាលាដំបូងរាជធានីភ្នំពេញវិញ គេបានសង្កេតឃើញសមត្តកិច្ចនគរបាលមូលដ្ឋានបានដាក់កម្លាំងយាមការពារសន្តិសុខសណ្តាប់ធ្នាប់សាធារណៈ មិនខុសពីសវនាការលើកមុនមកដែរ។ ក្នុងនោះគេបានឃើញ មានអ្នកមកគាំទ្រក្រុមអតីតបក្សសង្គ្រោះជាតិ(ស្ត្រីថ្ងៃសុក្រ)ប្រមាណបួនដប់នាក់ ដឹកនាំដោយឈ្មោះ ព្រហ្ម ចាន់ថា និងក្រុមឈ្មោះ ច្រាយ នីម មកពីសហគមន៍ SOS រួមទាំងអង្គការការពារសិទ្ធិមនុស្ស លីកាដូ ២.៣ នាក់មកឃ្លាំមើលសវនាការនេះ ហើយបានឃើញឈ្មោះ សេង ធារី ភេទស្រី ជាខ្មែរអនិកជនអាមេរិក ដើរធ្វើសកម្មភាពថតឡាយវីដេអូរនៅលើដងផ្លូវសាធារណៈក្បែរបរិវេណសាលាដំបូងនោះដែរ ដោយប្រមូលផ្តុំគ្នាស្រែកទាមទារឲ្យតុលាការលើកលែងការចោទប្រកាន់ ដោះលែងឪពុក និងប្តីពួកគេវិញ។
ការប្រមូលផ្តុំគ្នាស្រែកទាមទារសុំឲ្យមានការដោះលែងអ្នកដែលកំពុងជាប់ឃុំនោះ ត្រូវបានសមត្តកិច្ចអះអាងថា ជាទង្វើធ្វើឲ្យប៉ះពាល់ដល់ សន្តិសុខ និងសណ្តាប់សាធារណៈសង្គម ទើបពេលនោះសមត្ថកិច្ចមានការឃាត់ខ្លួនស្ត្រី២នាក់ ម្នាក់ឈ្មោះ សុខ បូលីម៉ា ភេទស្រី និងម្នាក់ឈ្មោះ ហ៊ុយ ធូ យកទៅធ្វើការណែនាំ និងអប់រំមួយសន្ទុះក៏អនុញ្ញាតឲ្យត្រឡប់ទៅវិញ។ សវនាការបានសាកសួរដេញដោលតាមនីតិវិធី រហូតដល់ចប់ម៉ោងរដ្ឋបាល ទើបប្រធានក្រុមប្រឹក្សាប្រកាសលើកពេលសវនាការទៅថ្ងៃទី១៨ ខែមីនា ឆ្នាំ២០២១ ខាងមុខនេះបន្តទៀត។សូមរំលឹកថា កាលពីថ្ងៃទី២២ ខែមករា ឆ្នាំ២០២១ សាលាដំបូងរាជធានីភ្នំពេញ បានបន្តលើកយកសំណុំរឿងអតីតសកម្មជនគណបក្សសង្គ្រោះជាតិចំនួន២១នាក់ មកបើកសវនាការជំនុំជម្រះទោសពាក់ពន្ធពីបទ.រួមគំនិតក្បត់.ញុះញង់ឲ្យប្រព្រឹត្តបទឧក្រិដ្ឋជាអាទិ៍ និងញុះញង់កុំឲ្យយោធិនស្ដាប់បង្កប់.តាមមាត្រា ៤៥៣. ៤៩៤.៥៩៥ និង៤៧១ នៃក្រមព្រហ្មទណ្ឌព្រះរាជាណាចក្រកម្ពុជា។
សវនាការនេះដឹកនាំដោយលោក រស់ ពិសិដ្ឋ អនុប្រធានសាលាដំបូងរាជធានីភ្នំពេញ ជាប្រធានក្រុមប្រឹក្សាជំនុំជម្រះ លោក កើត សាំង នឹងលោក អ៊ឹម វណ្ណៈ ចៅក្រមអម ក្នុងនោះមានមេធាវីការពារដើមបណ្តឹងរដ្ឋប្បវេណី និងមេធាវីការពាក្តីឲ្យជនត្រូវចោទ។ សវនាការបានធ្វើឡើងចំពោះមុខជនជាប់ ចោទចំនួន១៣ នាក់ ដែលកំពុងជាប់ឃុំក្នុងពន្ធនាគារព្រៃស និងកំបាំងមុខចំពោះជនត្រូវចោទ៨នាក់ ដែលស្ថិតនៅក្រៅឃុំ។ សវនាការជាសាធារណៈបានប្រព្រឹត្តធ្វើឡើងពេញមួយថ្ងៃ ក្រោមការចូលរួមតាមដានស្តាប់ ដោយយកចិត្តទុកដាក់ពីសំណាក់តំណាងអង្គទូត មួយចំនួនប្រចាំព្រះរាជាណាចក្រកម្ពុជា អ្នកសារព័ត៌មានជាតិ ស្ថាប័នអង្គការសង្គមស៊ីវិលផងដែរ៕ ដោយ ៖ ឃឹម ប៊ុនណាក់
ចែករំលែកព័តមាននេះ