ខេត្តព្រៃវែង ៖ អាជីវកម្មជីកកាយដឹកជញ្ជូនយកអាចម៌ដីលក់២កន្លែងនៅចំណុចភូមិព្រៃខ្លា ឃុំកំពង់សឹង្ហ ស្រុកព្រះស្តេច ខេត្តព្រៃវែង ត្រូវបានលោក សួន សុម៉ាលីន អភិបាលរងខេត្តព្រៃវែងបញ្ជាឲ្យផ្អាកសកម្មភាពបណ្តោះអាសន្ន…
ខេត្តព្រៃវែង ៖ អាជីវកម្មជីកកាយដឹកជញ្ជូនយកអាចម៌ដីលក់២កន្លែងនៅចំណុចភូមិព្រៃខ្លា ឃុំកំពង់សឹង្ហ ស្រុកព្រះស្តេច ខេត្តព្រៃវែង ត្រូវបានលោក សួន សុម៉ាលីន អភិបាលរងខេត្តព្រៃវែងបញ្ជាឲ្យផ្អាកសកម្មភាពបណ្តោះអាសន្ន កាលពីរសៀលថ្ងៃទី៣ ខែកុម្ភៈ ឆ្នាំ២០២១។ ខណៈដែលម្ចាស់អាជីវកម្មទាំង២កន្លែងខាងលើមិនព្រមអនុវត្តតាមការណែនាំរបស់អាជ្ញាធរមូលដ្ឋាន។ ម្ចាស់អាជីវកម្មទាំង២នេះត្រូវបានគេស្គាល់ទី១.ឈ្មោះ ហោ ម៉េងគី,ទី២.ឈ្មោះ ផាត ដែលជាឈ្មួញមានឥតទ្ធិពលខ្លាំងខាងរកស៊ីជីកកាយដឹកជញ្ជូនយកអាចម៌ដីលក់ធំជាងគេនៅក្នុងស្រុកព្រះស្តេចដោយមិនខ្លាចញញើតគោរពច្បាប់នោះទេ។
គួរបញ្ជាក់ថា កន្លងមកត្រូវបានអាជ្ញាធរខេត្ត និងក្រសួងចុះផ្អាកអាជីវកម្មម្តងរួចហើយ។ បើតាមប្រភពការផ្អាកនេះ ដោយសាររកឃើញកំហុសជីកប៉ះពាល់លើដីចំណីទន្លេតូច និងដីបាតបឹងព្រៃខ្លាសាធារណៈរបស់រដ្ឋ ហើយរណ្តៅដីមានជម្រៅជ្រៅលើច្បាប់កំណត់ និងដឹកជញ្ជូនដាក់អាចម៌ដីហៀរៗទ្រុងអត់គ្របវេចខ្ចប់ឲ្យបានត្រឹមត្រូវបើកបរលឿនៗលើសម៉ោងកំណត់ បង្កការប៉ះពាល់ដល់សុខភាព រំខានដល់ការរស់នៅរបស់បងប្អូនប្រជាជនអមសងខាងផ្លូវ ជាពិសេសបងប្អូនធ្វើដំណើរតាមបណ្តោយថ្នល់ជាតិលេខ១អាចប្រឈមកើតមានករណីគ្រោះថ្នាក់ចរាចរណ៍ដោយយថាហេតុទៀតផង។
ជុំវិញបញ្ហានេះលោក ភុន សម្ភស្ស អភិបាលស្រុកព្រះស្តេច បានប្រាប់ភ្នាក់ងារយកព័ត៌មានយើងឲ្យដឹងតាមទូរស័ព្ទកាលពីល្ងាចថ្ងៃទី៣ ខែកុម្ភៈ ឆ្នាំ២០២១ថា ពាក់ព័ន្ធដឹកជញ្ជូនអត់គ្របនោះ ក្នុងនាមអាជ្ញាធរស្រុក លោកបានកោះហៅម្ចាស់អាជីវកម្មទាំង២នេះ មកធ្វើកិច្ចសន្យារាប់ភ្លេចទៅហើយរហូតឈានដល់ចង់ដកអាជ្ញាប័ណ្ណ ប៉ុន្តែពួកគាត់នៅតែមិនអនុវត្តតាមដដែល។
ហើយដីកន្លែងលោក ហោ ម៉េងគី និងលោក ផាត កាយនោះលោក ភុន សម្ភស្ស អភិបាលស្រុកព្រះស្តេច និងមន្ត្រីរ៉ែ បានអះអាងថា ជាដីកម្មសិទ្ធរបស់លោក ហោ ម៉េងគី និងលោក ផាត បានទិញប្រហែលជាង១០ហិកតា មិនមែនដីបឹង ឬដីចំណីទន្លេតូចប្រភពព័ត៌មាននិយាយនោះឡើយ។ ទោះយ៉ាងណាមហាជនរិះគន់ថា ក្រុមតៃកុងឡានដឹកដីនោះមួយចំនួនក្មេងៗគ្មានសីលធម៌ គ្មានសុជីវធម៌ទេ មានចរិតឈ្លើយៗណាស់បើប្រាប់ទៅបើកបរកាន់តែផ្គើនឡើងថែមទៀត។
ជាក់ស្តែងកាលពីរសៀលថ្ងៃទី៣ ខែកុម្ភៈ តៃកុងឡានដឹកដីអាជីវកម្មរបស់លោក ហោ ម៉េងគី បានបើកបរលឿនៗចុចស៊ីផ្លេឮខ្លាំងៗដីហុយទ្រលោមបំណងកៀរអ្នកសារព័ត៌មានយើងពេលកំពុងចុះទៅថតផ្តិតយករូបភាពឡានដឹកដីអត់គ្រប។ ទន្ទឹមនោះក៏មានបងប្អូនអ្នកធ្វើដំណើរឃើញហេតុការណ៍នេះ ក៏នាំគ្នាភ័យហើយស្រែកជេរតៃកុងឡាននោះថាអាចំលើយ។ ក្រោយមកអ្នកសារព័ត៌មាន ក៏បានរាយការណ៍ជូនទៅលោក សួន សុម៉ាលីន អភិបាលរងខេត្តព្រៃវែង។ ភ្លាមនោះលោក សួន សុម៉ាលីន ក៏បានបញ្ជាឲ្យអាជ្ញាធរស្រុកចុះទៅផ្អាកអាជីវកម្មទាំង២កន្លែងនោះតែម្តង។ លោក សួន សុម៉ាលីន អភិបាលរងខេត្ត បញ្ជាក់បន្ថែមថា រឿងចំណុចដីដែលលោក ហោ ម៉េងគី និងលោក ផាត ជីកនោះ លោកពុំទាន់បានដឹងថាមានច្បាប់ឬអត់ច្បាប់នោះទេ រង់ចាំរូបលោកពិនិត្យមើលឯកសារសិន៕ ដោយ ៖ ស៊ឹម សាន់
ចែករំលែកព័តមាននេះ