រាជធានីភ្នំពេញ ៖ ដូចគ្រប់បានដឹងហើយថា មនុស្សទូទាំងពិភពលោករស់នៅដោយគ្មានលុយពិតជាមិនបាន ឬពិបាកខ្លាំងណាស់។ ជាពិសេសមនុស្សគ្រប់រូបតែងតែខិតខំប្រឹងប្រែង ធ្វើការយ៉ាងលំបាកលំបិន ដើម្បីតែលុយព្រោះលុយគឺជាជីវិត អ្នកខ្លះគិតថា បើគេគ្មានលុយពិតជាពិបាករស់នៅលើលោកនេះណាស់។…
រាជធានីភ្នំពេញ ៖ ដូចគ្រប់បានដឹងហើយថា មនុស្សទូទាំងពិភពលោករស់នៅដោយគ្មានលុយពិតជាមិនបាន ឬពិបាកខ្លាំងណាស់។ ជាពិសេសមនុស្សគ្រប់រូបតែងតែខិតខំប្រឹងប្រែង ធ្វើការយ៉ាងលំបាកលំបិន ដើម្បីតែលុយព្រោះលុយគឺជាជីវិត អ្នកខ្លះគិតថា បើគេគ្មានលុយពិតជាពិបាករស់នៅលើលោកនេះណាស់។ ប៉ុន្តែតាមរយៈអ្នកជំនាញបើទោះអ្នកមានខ្លាំងប៉ុណ្ណា ក៏មានមនុស្សខ្លះមិនពេញចិត្តនូវអ្វីដែលខ្លួនកំពុងមាននោះដែរ។ ដូចនេះសរុបសេចក្តីមក មនុស្សមានឬក្រសុទ្ធតែមានបញ្ហារឿងនេះឯង។
លោក សំ កុសល ដែលជាស្ថាបនិក Business Cambodia បានចែករំលែកដូចនេះថា៖ «ជាទូទៅលុយគឺជាបញ្ហាសកល នៅលើលោកនេះ គឺមនុស្សទូទាំងសកលលោកសុទ្ធតែមានបញ្ហាលុយនឹងគ្រប់គ្នាមិនថា អ្នកមានឬអ្នកក្រនោះទេ។ ភាគច្រើននៃបញ្ហានោះគឺការចាយលុយខុស នេះមិនមែនសំដៅតែលើអ្នកក្រនោះទេ អ្នកខ្លះមានលុយច្រើនតែចាញ់បោកគេ អ្នកខ្លះទៀតមិនមានបញ្ហាចាញ់បោកគេទេ ប៉ុន្តែខ្វះខាតលុយតែម្តង ដោយសារចំណូលវាមិនកើន។ ខ្ញុំចង់ចែករំលែកបទពិសោធន៍ខ្លះៗ ក្រោយពីខ្ញុំបានផ្លាស់ប្តូរឥរិយាបទខ្លះៗ ក្នុងការគ្រប់គ្រងលុយ ដែលវាធ្វើឱ្យលទ្ធផលបានប្រសើរជាងមុន»។
សំណួរសួរថា តើយើងគួរធ្វើអ្វីខ្លះ ដើម្បីគ្រប់គ្រងលុយឱ្យបាន?
ដូចច្នេះ លោកគ្រូ បានលើកយក ៣ ចំណុច ដើម្បីចែករំលែកនូវបទពិសោធន៍របស់លោកគ្រូ តាមរយៈការកែប្រែខ្លួនឯង ៖
ចំណុចសំខាន់ទី ១ ៖ យើងគ្រប់គ្នាត្រូវរៀនពីលុយ ការរៀននេះទៀតសោតមិនមែនមានន័យថាទាល់តែយើងទៅរៀននៅសាលានោះទេ យើងអាចរៀនដោយខ្លួនឯង យើងអាចរៀនពីភ្ញៀវ ហើយយើងក៏អាចរៀនពីកន្លែងធ្វើការងារក៏បានដែរ ឱ្យតែយើងដាក់គោលដៅរៀន។ ដូច្នេះសួរថាយើងរៀនស្តីអំពីលុយ? យើងអាចរៀនអំពីអត្ថន័យនៃលុុយ បន្ទាប់មកត្រូវរៀនពីមុខងាររបស់លុយ (លុយមិនមែនសម្រាប់តែចាយនោះទេ លុយត្រូវធ្វើឱ្យមានប្រភពចំណូលដែរ) លុយយើងអាចយកទៅវិនិយោគ លុយយើងអាចយកទៅសន្សំ។ ខ្ញុំធ្លាប់ចែករំលែកឃ្លាមួយថា “ចាយលុយដែលអ្នកមាន កុំចាយលុយដែលខ្លួនឯងមិនមាន” យើងមើលរាល់ថ្ងៃ មនុស្សម្នាប្រើសេវាកម្មរំលស់ច្រើនណាស់ មានរំលស់ម៉ុតូ រំលស់ឡាន រំលស់ផ្ទះ។ល។ នោះគឺអនាគតទៅអ្នកទាំងអស់គ្នាចាយលុយសុទ្ធតែយើងមិនមាន ទាំងនេះគឺជាលុយគេ។ ចរន្តសាច់ប្រាក់ជាសរសៃឈាមអាជីវកម្ម ប្រសិនបើចរន្តសាច់ប្រាក់យើងក្រហមឬអវិជ្ជមាន មានន័យថាលុយចេញវាច្រើនជាងលុយចូល ដល់ចឹងទៅយើងមិនគាំវាអត់មានឈាមរត់ ដូចនេះទាំងអស់គ្នាដើម្បីគ្រប់គ្រងលុយបាន ពេលដែលយើងរកស៊ីត្រូវផ្តោតទៅលើចរន្តសាច់ប្រាក់។ កាលដែលយើងមានអ្វីដែលលុយអាចទិញបាន ដូចជាផ្ទះ នាឡិការ ឡានទំនើប សម្ភារទំនើបនានានោះវាពិតជាល្អហើយ ប៉ុន្តែរស់នៅបានល្អកុំភ្លេចអ្វីដែលលុយទិញមិនបានផង សព្វថ្ងៃនេះមានអ្វីជាច្រើនដែលលុយទិញមិនបាន (សុខភាព ជីវិត ឬក៏ពេលវេលាជាដើម) ដូចនេះយើងត្រូវគិតលើរបស់នឹងផង កុំគិតតែរឿងលុយពេក។
ចំណុចសំខាន់ទី២ ៖ កុំយកលុយធ្វើជាក្តីស្រមៃ នៅពេលដែលយើងគ្រប់គ្នាចេញរកស៊ី ត្រូវតែយកក្តីស្រមៃធ្វើជាគោល មិនមែនយកលុយធ្វើជាគោលនោះទេក្នុងការរកស៊ី មិនដូចច្នេះទេអ្នកនឹងក្លាយជាមនុស្សមុខលុយហើយ។ ខ្ញុំធ្លាប់បានចែករំលែកថា លុយវាគ្រាន់តែយាន្តទេ ហើយហេតុអ្វីយើងយកវាមកធ្វើជាគោលដៅ លុយគ្រាន់តែជាមធ្យោបាយមួយប៉ុណ្ណោះ ហើយដើម្បីសម្រេចក្តីស្រមៃ គឺមានមធ្យោបាយច្រើនដែលយើងមិនបាច់ប្រើលុយទេ។ កុំព្យាយាមរកស៊ីដើម្បីក្លាយជាអ្នកមាន ត្រូវរកស៊ីក្នុងគោលដៅផ្សេងផងដែលវាមានន័យជាងនេះ គោលដៅមួយដែលវាដោះស្រាយបញ្ហាមនុស្ស បញ្ហាភ្ញៀវយើង ដូចនេះយើងគ្រប់គ្នាមិនគួររត់តាមលុយទេ ត្រូវរត់តាមក្តីស្រមៃវិញ។ នៅពេលដែលយើងរត់ទាន់ក្តីស្រមៃ នោះលុយវានឹងរត់តាមយើងហើយ លុយគឺរត់តាមតែមនុស្សដែលមានក្តីស្រមៃអស្ចារ្យ។
ចំណុចសំខាន់ទី៣ ៖ ចាយលុយដើម្បីខួរក្បាល កុំចាយដើម្បីហ៉ឺរហា ខ្ញុំស្តាយមែនទែន ឃើញគ្នាយើងខ្លះពីមុនគាត់ធ្លាប់ខ្វះខាត ហើយអីឡូវគាត់មិនដឹងជាបានលុយមកពីណាទេ មកចាយវាយហ៉ឺរហា ចាយបែបនឹងគឺមិនត្រូវទេ។ យើងគួរចាយដើម្បីខួរក្បាលវិញ ជាពិសេសគ្នាយើងដែលកំពុងធ្វើការ ប្រាក់ខែមិនច្រើនទេ ហើយយកទៅហ៉ឺរហា។ ហ៉ឺរហានឹងក៏ព្រោះថាយើងគិតថា ហ៉ឺរហាទៅដើម្បីទាក់ទាញគេ មនុស្សទាក់ទាញមិនមែនដោយសារភាពហ៉ឺរហានោះទេ យើងគ្រប់គ្នាគួរដឹង មនុស្សហ៉ឺរហាគឺហ៉ឺរហាខាងក្នុង មិនមែនហ៉ឺរហា ដោយសារឡាន មិនមែនហ៉ឺរហាដោយសារនាឡិការ ឬផ្ទះនោះទេ គេហ៉ឺរហាដោយសារចំណេះដឹងគាត់ ជំនាញគាត់ ចិត្តគំនិតគាត់ បេះដូងគាត់ខួរក្បាលគាត់ ទាំងនេះហើយជាភាពហ៉ឺរហា ដែលជាភាពទាក់ទាញដែលយើងទាំងអស់គ្នាគួរតែចាយលុយទៅលើ។
ប្រសិនជាយើងមិនចាយលុយទៅលើខួរក្បាលនោះទេ យើងចាយយូរៗទៅវ័ណ្ឌក ហើយនៅពេលដែលវ័ណ្ឌកនោះ លុយនឹងគ្រប់គ្រងជីវិតយើងហើយ។ ចាយលុយដើម្បីខួរក្បាលគឺសំដៅទៅលើ ការទិញសៀវភៅ ចំណាយលើសៀវភៅឱ្យច្រើន ព្រោះថាអានច្រើនមានគំនិតច្រើន ហើយគំនិតនេះឯងដែលធ្វើឱ្យយើងកើនលុយ។ មួយវិញទៀតចំណាយលុយក្នុងការដើរកំសាន្តទៅក្រៅប្រទេស ដើម្បីមើលឳកាស និងគំនិតល្អៗយកមកអភិវឌ្ឍនខ្លួនឯង ហើយអាចចំណយលុយទៅលើសាលារៀនដែលជាប្រភពចំណេះដឹង រើសជំនាញណាដែលត្រូវជាមួយយើង៕ ដោយ៖ ស្រី គំនិត
ចែករំលែកព័តមាននេះ