ខេត្តបាត់ដំបង ៖ ទីតាំងល្បែងស៊ីសងដ៏ធំមួយកន្លែងដែលអ្នកប្រព្រឹត្តភាគច្រើន ជាមន្ត្រីរាជការស្ទើរគ្រប់ស្ថាប័ននៅក្នុងខេត្ត ដែលបានបិទជាបណ្ដោះអាសន្នមួយរយៈកន្លងទៅនោះ ក្រោយពីមានការផ្ទុះអាវុធបាញ់ប្រហារគ្នា បណ្ដាលឲ្យភាគីម្ខាងរងរបួសភ្លៅនោះ ពេលនេះម្ចាស់ទីតាំងបានបើកទ្វារស្វាគមន៍អតិថិជនយ៉ាងរលូនឡើងវិញហើយ ដែលសមាសភាពអ្នកញៀននឹងល្បែងនេះ គឺជាមន្ត្រីរាជការមុខដដែលៗ…
ខេត្តបាត់ដំបង ៖ ទីតាំងល្បែងស៊ីសងដ៏ធំមួយកន្លែងដែលអ្នកប្រព្រឹត្តភាគច្រើន ជាមន្ត្រីរាជការស្ទើរគ្រប់ស្ថាប័ននៅក្នុងខេត្ត ដែលបានបិទជាបណ្ដោះអាសន្នមួយរយៈកន្លងទៅនោះ ក្រោយពីមានការផ្ទុះអាវុធបាញ់ប្រហារគ្នា បណ្ដាលឲ្យភាគីម្ខាងរងរបួសភ្លៅនោះ ពេលនេះម្ចាស់ទីតាំងបានបើកទ្វារស្វាគមន៍អតិថិជនយ៉ាងរលូនឡើងវិញហើយ ដែលសមាសភាពអ្នកញៀននឹងល្បែងនេះ គឺជាមន្ត្រីរាជការមុខដដែលៗ ជិះរថយន្តស៊េរីទំនើបៗ ពាក់ស្លាកលេខ«ខេមរភូមិន្ទ, រាជការ និងនគរបាលជាតិ»ជាដើម ។
ទីតាំងល្បែងសម្រាប់កំដរអារម្មណ៍មន្ត្រីរាជការមួយចំនួននៅក្នុងខេត្តបាត់ដំបងខាងលើនេះ នៅខាងលិចផ្លូវរថយន្តភ្លើង ស្ថិតក្នុងភូមិអូរតាគាំ២ សង្កាត់ទូលតាឯក ក្រុងបាត់ដំបង។ នៅផ្នែកខាងមុខមានក្លិបស្នូកឃ័រ រីឯនៅផ្នែកខាងក្រោយមានវង់ល្បែងស៊ីសង។ ដូចជាល្បែង ខ្លាឃ្លោកអនឡាញ ល្បែងបៀរ ដែលគេនិយមហៅ «ប៉ក់ឥណ្ឌា ឬ អង់ឌូ» ដែលលេងចាញ់ឈ្នះម្ដងៗ រាប់ពាន់ដុល្លារ ឬរាប់លានរៀល។ នេះបើតាមប្រភពដែលបានទម្លាយព័ត៌មាននេះ។
ប្រភពបានឲ្យដឹងទៀតថា អ្នកញៀននឹងល្បែងនេះមួយចំនួន ជាមន្ត្រីរាជការ មន្ត្រីយោធា និងមន្ត្រីនគរបាល រីឯសមាសភាពមួយចំនួនទៀត ជាអ្នកមានទ្រព្យស្ដុកស្ដម្ភ។ គេឃើញរថយន្តស៊េរីទំនើបៗដែលមន្ត្រីនានា ជិះទៅលេងល្បែងនិងចតនៅក្នុងបរិវេណ នៃទីតាំងល្បែងនោះ មួយចំនួនមានពាក់ស្លាកលេខ «ខេមរភូមិន្ទ នគរបាលជាតិ និង រាជការ» ហើយម្ចាស់រថយន្តទាំងនោះក៏ត្រូវបានគេស្គាល់យ៉ាងច្បាស់ផងដែរ។
សូមរំលឹកថា កាលពីឆ្នាំទៅម៉ិញ ទីតាំងល្បែងសម្រាប់កំដរអារម្មណ៏លោកមន្ត្រីៗ ខាងលើនេះ បានផ្ទុះអាវុធម្ដងហើយ រវាងបងថ្លៃនិងប្អូនថ្លៃ និងជាកូនចៅនៃម្ចាស់ទីតាំងនេះ ដែលបណ្ដាលឲ្យភាគីម្ខាងរងរបួស។ ប៉ុន្តែការបាញ់ប្រហារគ្នានៅពេលនោះ ត្រូវបានគេនិយាយថា ផ្ដើមឡើងពីរឿងគំនុំរវាងបងថ្លៃ និង បងថ្លៃ មិនមែនជម្លោះក្នុងវង់ល្បែងស៊ីសងទេ។
ក្រោយកើតហេតុ លោកស្នងការខេត្តបានបញ្ជាឲ្យបិទទីតាំងល្បែងនេះភ្លាមៗតែម្ដង។ រីឯសំណុំរឿងបាញ់ប្រហារគ្នា ក៏ស្ងាត់ជ្រៀបរហូតដល់សព្វថ្ងៃនេះដែរ។ ប៉ុន្តែយ៉ាងណាក្ដី ពេលនេះ ទីតាំងល្បែងនេះ បានបើកដំណើរការស្វាគមន៍អតិថិជនយ៉ាងរលូនឡើងវិញហើយ ក្រោយពីផ្អាកអស់រយៈពេលជិត១ឆ្នាំកន្លងទៅនេះ។ បើតាមប្រភពព័ត៌មានថា ម្ចាស់ទីតាំងបានបើកទទូលភ្ញៀវឡើងិវញ បានប្រហែល២ខែកន្លងមកហើយ។ ហើយអ្នកនិយមនឹងល្បែងបៀរ និងខ្លាឃ្លោកអនឡាញនេះ ក៏ជាមនុស្សដដែលៗដែរ។
បើតាមការពិនិត្យ គេឃើញក្រុមអ្នកលេងតែងណាត់ជួបជុំគ្នាដុំកង់ចាប់ពីវេលាថ្ងៃត្រង់រហូតដល់ពេលយប់ ទើបរំសាយ។ គេមិនដឹងថា តើសមត្ថកិច្ច ឬ អាជ្ញាធរខេត្ត បានជ្រាបពីទីតាំងល្បែងនេះ ឬ បែបណានោះទេ ? ឬ ជ្រាបដែរ តែបិទភ្នែកធ្វើមិនដឹងមិនឮ ដើម្បីទុកសម្រាប់ឲ្យលោកមន្ត្រីៗមួយចំនួនកែអផ្សុក ?
ចែករំលែកព័តមាននេះ