អ្នកជំនួញរថយន្តបានលើកឡើងថាវិបត្តិសេដ្ឋកិច្ចបណ្តាលមកពីជំងឺកូវីដ១៩ បានធ្វើឲ្យ​ប្រទេសជិតខាងកម្ពុជា មានការធ្លាក់ចុះការប្រើប្រាស់រថយន្តពី ពី៤០ទៅ៥០% ។ប៉ុន្តែសម្រាប់កម្ពុជាមានការធ្លាក់ចុះប្រមាណតែ៣០%  ប៉ុណ្ណោះ។ គេរំពឹងថានៅពេល​កម្ពុជាប្រើប្រាស់វ៉ាក់សំាងកូវីដ១៩លើពលរដ្ឋ ជំនួញរថយន្តនឹងមានកំណើនឡើងវិញ ពិសេសកំណើតទៅលើការប្រើប្រាស់រថយន្តថ្មីរបស់ពលរដ្ឋខ្មែរតែម្តង។

កាលពីឆ្នាំ២០២០ ​មន្ទីរ​សាធារណៈ​ការ​ ​និង​ដឹកជញ្ជូន​រាជធានីភ្នំពេញ ​បាន​ឲ្យដឹងថា​ចំនួន​យានយន្ត​នៅក្នុងទីក្រុងនេះ បាន​កើនឡើង​យ៉ាង​គំហុក។ កាលនោះគេដឹងថា យានយន្តមានចំនូន ២,៤៧៤,៤៦៥គ្រឿង​ ​ក្នុង​នោះ​រថយន្ត​មាន​ចំនួន៥០៨​ ​១៤៣គ្រឿង​ ​និង​ទោចក្រយាន​យន្ត​មាន​ចំនួន១,៩៦៦,៣២២គ្រឿង។កំណើននៃការប្រើប្រាស់យាន​យន្តបែបនេះ ត្រូវគេមើលឃើញថាជាផ្នែកមួយធ្វើឲ្យភ្នំពេញមានការ​កកស្ទះចរាចរណ៍​សឹងរាល់ថ្ងៃ ហើយការចតយានយន្តនៅក្នុងទីក្រុងនេះមិន​មានគ្រប់គ្រាននោះឡើយ។ ស្ថាប័ន អង្គភាព កន្លែងលក់ដូរជាច្រើនគ្មានចំណតរថយន្ត។ រថយន្តជាច្រើនបាន​ចតនៅ​​លើចិញ្ចើមផ្លូវ។ទើបតែរយៈពេលចុងក្រោយនេះទេ គេរដ្ឋាភិបាលបានផ្តើម​បង្កើត​ចំណត​រថយន្តនៅក្រោមដីតាមសួនច្បារមួយចំនួន​។  

ជាមួយកំណើនការប្រើប្រាស់យានជំនិះបែបនេះ មានការសង្កេតឃើញថាប៉ុន្មាន​ឆ្នាំចុងក្រោយនេះ ពលរដ្ឋខ្មែរបានងាកមកប្រើប្រាស់រថយន្តថ្មីចេញពីរោងចក្រ កើនឡើងផងដែរ។ ពលរដ្ឋកម្ពុជាភាគច្រើនបានប្រើប្រាស់រថយន្តដែល​គេប្រើរួចហើយ​នាំចេញពីសហរដ្ឋអាមេរិក ជប៉ុននិងសាធារណកូរ៉េ។ លោក ងន សំាង អនុប្រធាន​សហព័ន្ធឧស្សាហកម្មយានយន្តកម្ពុជានិងជាអគ្គនាយកក្រុមហ៊ុនRMA ប្រចំានៅ​កម្ពុជាបានឲ្យដឹងថា «យើងសង្កេតឃើញពីមួយឆ្នាំទៅមួយ​ឆ្នំាចំនួនអ្នកប្រើប្រាស​រថយន្តថ្មីមានការកើនឡើងជាប្រចំា។ បើយើងត្រលប់ថយក្រោយ៦ឆ្នំាមុន មានប្រហែល​១០% ។ប៉ុន្តែចូលមកដល់ឆ្នំា២០២០មកនេះឡើងជាង២០%ហើយ មានន័យថាចំនួនអ្នកប្រើប្រាស់រថយន្តចេះតែមានការកើនឡើងពីមួយថ្ងៃទៅមួយថ្ងៃ ហើយការប្រើរថយន្តជជុះថយចុះពីមួយថ្ងៃទៅមួយថ្ងៃដូចគ្នាដែរ»។

សូមជម្រាបថាបច្ចុប្បន្នពលរដ្ឋជាច្រើនបាននិយមទិញរថយន្តបង់រំលោះ មិនថាសម្រាប់​រថយន្តថ្មីឬរថយន្តមួយទឹកនោះទេ។ កន្លែងលក់រថយន្តថ្មីនិង​រថយន្តចាស់នៅភ្នំពេញ​ភាគច្រើនបានប្រកាសលក់រថយន្តជាមួយសេបវាបង់ប្រាក់រំលោះ ។ អ្នកលក់រថយន្ត ជាច្រើនអះអាងថាការទិញរថយន្តបង់រំលោះមានកំណើនខ្លំាង រថយន្តដែលលក់​ដាច់សឹង១០០% អតិថជនបង់រំលោះ នេះបើតាមការឲ្យដឹងពីកន្លែងលក់​រថយន្តធំ​មួយនៅលើកំណាត់ផ្លូវ២៧១៕ រាយការណ៍បន្ថែម ដោយឡុង សារ៉េត។​