ទីក្រុងបាងកក៖ ផ្នែកខ្លះនៃប្រទេសថៃកំពុងរងផលប៉ះពាល់យ៉ាងធ្ងន់ធ្ងរដោយសារគ្រោះទឹកជំនន់បន្ទាប់ពីមានភ្លៀងធ្លាក់ខ្លាំងជាច្រើនថ្ងៃជាប់គ្នា។ អាជ្ញាធរអះអាងថាស្រុកទាំងអស់នៃខេត្តឆៀងរ៉ាយទទួលការជូនដំណឹងឱ្យប្រុងប្រយ័ត្នខ្ពស់ព្រោះនឹងមានភ្លៀងធ្លាក់ខ្លាំង។ តាមពិត ខេត្តនេះរងគ្រោះជាបណ្ដើរៗចាប់ពីពេលនេះទៅហើយ។ ជាក់ស្ដែង ស្រុកចំនួន៥កំពុងលិចលង់ និងប៉ះពាល់លំនៅដ្ឋានរបស់ប្រជាជនជាង៤ពាន់ខ្នង។
ថ្ងៃនេះ មន្ទីរគ្រប់គ្រងគ្រោះមហន្តរាយខេត្តឆៀងរ៉ាយបានចេញសេចក្ដីណែនាំឱ្យក្រុមការងារនៅទូទាំងខេត្តត្រៀមលក្ខណៈសម្បត្តិឱ្យបានរួចរាល់ដើម្បីត្រៀមចុះប្រយុទ្ធ និងដោះស្រាយករណីកើតមានជំនន់ទឹកភ្លៀងដែលហក់ឡើងព្រឹបៗយ៉ាងឆាប់រហ័ស។ ជាពិសេស ផ្លូវទឹកនានានៅតាមត្រពាំង បឹង បួរ ស្ទឹង ទន្លេអាចនឹងឡើងលិចច្រាំង។ រីឯភ្លៀងក៏បន្តធ្លាក់ខ្លាំងដូចគេហែកមេឃនៅទូទាំងខេត្តឆៀងរ៉ាយ។
មន្ត្រីរដ្ឋបាលខេត្តឆៀងរ៉ាយពិនិត្យឃើញថាទីតាំងនៅសងខាងត្រើយទន្លេអ៊ីង (Ing River) ជាតំបន់ដែលប្រឈមនឹងការលិចលង់បំផុតព្រោះកម្ពស់ទឹកទន្លេកំពុងតែឡើងស្រឺតៗ។ ដូច្នេះ រដ្ឋបាលខេត្តសូមអំពាវនាវទៅបងប្អូនប្រជាពលរដ្ឋត្រៀមខ្លួនទុកឱ្យហើយ។ បើមើលសភាពការណ៍មិនស្រួលទេត្រូវជម្លៀសខ្លួនជាបន្ទាន់ទៅកាន់ទីទួលសុវត្ថិភាព។ ទន្លេអ៊ីងលាតសន្ធឹងពីទន្លេចៅផាយ៉ា (ឬចៅពញា) ឆ្លងកាត់ស្រុកចំនួនបួនរួមទាំងស្រុកផាយ៉ា មីងរ៉ាយ និងស្រុកថឺងរហូតដល់ទន្លេមេគង្គ។
គ្រាន់តែទឹកជំនន់នៅក្នុងសុ្រកចំនួនប្រាំគឺឆៀងរ៉ុង (Chiang Run), ឆៀងសែន (Chiang Saen), ផាយ៉ា មីងរ៉ាយ (Phaya Mengrai) , ថឺង (Thoeng) និងវីងឆៃ (Wieng Chai) បានប៉ះពាល់លំនៅដ្ឋាន៤៤០០ខ្នង និងខូចខាតដីស្រែ៨០ហិកតារ។ នេះបើយោងតាមមន្ទីរគ្រប់គ្រងគ្រោះមហន្តរាយខេត្តឆៀងរ៉ាយ។ ស្រុកដែលរងគ្រោះខ្លាំងបំផុតគឺផាយ៉ា មីងរ៉ាយ និងវីងឆៃ។
មន្ទីរខាងលើមិនបានបញ្ជាក់ថាតើប្រជាជនប៉ុន្មាននាក់រងផលប៉ះពាល់ដោយសារគ្រោះទឹកជំនន់លើកនេះទេ។ ប៉ុន្តែគេដឹងថាស្រុកមេសៃ (Mae Sai) ដែលមានព្រំប្រទល់ជាប់នឹងប្រទេសមីយ៉ាន់ម៉ាមិនទាន់មានទឹកជំនន់នៅឡើយទេ។ អាជ្ញាធរព្យាករថាខេត្តចំនួនប្រាំរបស់ថៃនឹងមានភ្លៀង ផ្គរ រន្ទះយ៉ាងខ្លាំងក្លាចាប់ពីពេលនេះរហូតដល់ល្ងាចថ្ងៃសៅរ៍សប្ដាហ៍នេះ។ ក្នុងនោះក៏មានខេត្តឆៀងរ៉ាយផងដែរ៕
ចែករំលែកព័តមាននេះ