រាជធានីភ្នំពេញ ៖ តើហេតុអ្វីបានជាអ្នកត្រូវធ្វើផែនការហិរញ្ញវត្ថុផ្ទាល់ខ្លួន? តើអ្នកមានគោលដៅ ដើម្បីសម្រេចផែនការហិរញ្ញវត្ថុតាមរបៀបណា? ចុះស្ថានភាព ផ្នែកហិរញ្ញវត្ថុរបស់អ្នកនាពេលបច្ចុប្បន្នយ៉ាងដូចម្តេច? តើអ្នកត្រូវគ្រប់គ្រងហិរញ្ញវត្ថុបែបណាដើម្បី ឱ្យមានភាពបត់បែនទៅតាមស្ថានការណ៍សពថ្ងៃ ដែលមានមនុស្សជាច្រើនកំពុងជួបនូវវិបត្តិកូវីដ១៩នោះ។…
រាជធានីភ្នំពេញ ៖ តើហេតុអ្វីបានជាអ្នកត្រូវធ្វើផែនការហិរញ្ញវត្ថុផ្ទាល់ខ្លួន? តើអ្នកមានគោលដៅ ដើម្បីសម្រេចផែនការហិរញ្ញវត្ថុតាមរបៀបណា? ចុះស្ថានភាព ផ្នែកហិរញ្ញវត្ថុរបស់អ្នកនាពេលបច្ចុប្បន្នយ៉ាងដូចម្តេច? តើអ្នកត្រូវគ្រប់គ្រងហិរញ្ញវត្ថុបែបណាដើម្បី ឱ្យមានភាពបត់បែនទៅតាមស្ថានការណ៍សពថ្ងៃ ដែលមានមនុស្សជាច្រើនកំពុងជួបនូវវិបត្តិកូវីដ១៩នោះ។
តើហិរញ្ញវត្ថុផ្ទាល់ខ្លួនមានន័យដូចម្តេច?
លោក ង៉ែត ជូ អ្នកជំនាញផ្នែកសេដ្ឋកិច្ច និងជាអ្នកប្រឹក្សាឯករាជ្យ បានឱ្យដឹងថា ៖ «តាមបទពិសោធន័និងការរស់នៅរបស់ខ្ញុំ គឺពេលណាយើងនិយាយពីហិរញ្ញវត្ថុ ចង់សំដៅទៅលើបុគ្គល ដែលបានឆ្លងកាត់ការអប់រំផ្នែកខាងហិរញ្ញវត្ថុ នៅតាមស្ថាប័នរដ្ឋឬក៏ជាអង្គការក្រៅរដ្ឋាភិបាល ឬក៏ជាក្រុមហ៊ុន ប៉ុន្តែជីវិតរស់នៅរបស់យើង ជាទូទៅមនុស្សខ្លះតែងតែប្រឈមនឹងផ្នែកហិរញ្ញវត្ថុ ដោយយើងមិនបានចាប់អារម្មណ៍ យើងតែងតែព្យាយាមដោះស្រាយបញ្ហាហិរញ្ញវត្ថុនៅក្នុងគ្រួសារ ឬក៏ភាពផ្ទាល់ខ្លួនរបស់យើង ដោយមិនបានចាប់អារម្មណ៍ថានៅក្នុងគ្រួសារមួយ ឬក៏ខ្លួនឯងជាបុគ្គលនឹងមានបច្ចេកទេសក្នុងការគ្រប់គ្រងហិរញ្ញវត្ថុដែរ ហើយយើងមិនបានសិក្សាស្វែងយល់ទៀត»។
លោកបានបន្តថា «ខ្ញុំចង់ជម្រាបជូនផងដែរថា ពាក្យថាហិរញ្ញវត្ថុផ្ទាល់ខ្លួននេះ គឺវាជាភាសាអង់គ្លេសនៅក្នុងបរិបទបស្ចឹមប្រទេស គឺទោះបីប្តីប្រពន្ធគេមានការចាត់ចែងលុយកាក់ រកចំណូលចំណាយទាំងអស់នឹងគឺជាលក្ខណៈបុគ្គលដាច់ដោយឡែក ប៉ុន្តែនៅក្នុងបរិបទវប្បធម៌របស់ខ្មែរយើង គឺកាលណាយើងក្លាយជាគ្រួសារមួយ គឺមានន័យថាក្លាយជាអង្គភាពសេដ្ឋកិច្ចមួយ ឧទាហរណ៍ថាចំណូលដែលរកបានពីប្តីប្រពន្ធ ឬក៏កូននឹងគឺភាគច្រើនជាចំណូលរបស់គ្រួសារ រួចហើយបានយើងចំណាយទៅតាមមុខងារ ដែលបានបែងចែកទៅផ្នែកផ្សេងៗគ្នា ដូចនេះហើយវាបានទាមទារឱ្យយើងសិក្សាស្វែងយល់ ពីបរិបទផ្សេងគ្នាពីរបៀបរបបនៃការរស់នៅផ្សេងគ្នា ឬក៏ប្រភពចំណូលផ្សេងគ្នា ថាតើយើងគួរគ្រប់គ្រងចាត់ចែងយ៉ាងដូចម្តេច ដើម្បីឱ្យវាមានប្រសិទ្ធភាពនៃការគ្រប់គ្រងហិរញ្ញវត្ថុរបស់ស្ថាប័នផ្លូវការដែរ»។
ជាទូទៅនៅប្រទសកម្ពុជា មានមុខរបរនៅក្នុងគ្រួសារ ភាគច្រើនគេហៅថា មុខរបរខ្នាតតូចជាលក្ខណៈគ្រួសារ ហើយអ្វីដែលជាកង្វះខាតរបស់ម្ចាស់អាជីវកម្មឬក៏សមាជិកគ្រួសារ គាត់មិនសូវបានបែងចែកដាច់ រវាងហិរញ្ញវត្ថុរបស់អាជីវកម្ម និងហិរញ្ញវត្ថុរបស់គ្រួសារនោះទេ។ ពួកគាត់ច្រើនដាក់ច្របូកច្របល់គ្នា ឧទាហរណ៍ថា ត្រូវដកចំណូលមួយចំនួនយកមកបង់ថ្លៃសាលាកូន ដោយមិនបានបែងចែកមានបញ្ជីស្នាមច្បាស់លាស់ ឬក៏ដកចំណូលមួយចំនួនទៅកំសាន្តនៅបរទេស ដូចវាអាចហួសកម្រិតដែលគាត់អាចមានលទ្ធភាពចំណាយ។ ចំណុចនេះមានន័យថា នៅក្នុងគ្រួសារនីមួយៗ គួរតោងញែកឱ្យដាច់ ហើយការញែកមិនដាច់នេះវាធ្វើឱ្យគាត់មានបញ្ហាប្រឈមជាមួយនឹងលំហូរសាច់ប្រាក់ ឬក៏រកស៊ីយូរៗទៅបាត់ដើម ដោយសារយើងញែកមិនដាច់នេះឯង។
តើយើងត្រូវរៀបចំផែនការហិរញ្ញវត្ថុយ៉ាងដូចម្តេច?
លោក ង៉ែត ជូ បានចែករំលែកដោយលើកជាសំណួរចំលើយដូចនេះថា៖
របៀបធ្វើផែនការហិរញ្ញវត្ថុផ្ទាល់ខ្លួន ដោយកំណត់នូវចំណុចសំខាន់ៗចំនួន៣គឺ៖
១) អ្នកកំពុងមានស្ថានភាពហិរញ្ញវត្ថុបែបណា?
អ្នកត្រូវយល់អោយបានច្បាស់នូវប្រភពចំណូល ទំហំចំណូល ការចំណាយ ទំហំនៃការចំណាយ បំណុល ចំនួន និងតម្លៃទ្រព្យសម្បត្តិដែលអ្នកកំពុងមាន។ល។
២) អ្នកចង់សំរេចបានគោលដៅហិរញ្ញវត្ថុបែបណានា ពេលអនាគតជាក់លាក់ណាមួយ?
ឧទាហរណ៍ថាអ្នកមានអាយុ២៥ឆ្នាំ អ្នកមានគោលបំណងចង់ចូលនិវត្តន៍នៅអាយុ៤៥ឆ្នាំជាមួយនឹងទ្រព្យសម្បត្តិចំនួន១លានដុល្លា។ និងលំហូរសាច់ប្រាក់ប្រចាំខែ៥ពាន់ដុល្លាក្នុង១ខែ។
៣) ហើយថាតើអ្នកនឹងសំរេចគោលដៅនោះយ៉ាងដូចម្តេច?
ប្រសិនបើអ្នកមានគោលដៅដូចឧទាហរណ៍ក្នុងចំណុចទី២ខាងលើ អ្នកប្រហែលជាអាចសំរេចគោលដៅនោះក្នុងរយៈពេល២០ឆ្នាំដោយខិតខំអភិវឌ្ឍសមត្ថភាពខ្លួន ដើម្បីធ្វើការមានតួនាទីល្អ និងប្រាក់ខែច្រើន។ រួចសន្សំប្រាក់ខែ ឬខ្ចីប្រាក់ពីធនាគារយកទៅវិនិយោគលើអាជីវកម្ម អចលនទ្រព្យ ឬផ្សារហ៊ុនដើម្បីបង្កើនទ្រព្យតាមគោលដៅដែលអ្នកចង់សំរេចបាន។ ធ្វើដូច្នេះប្រកបដោយបញ្ញា និងភាពអត់ធ្មត់ នោះអ្នកនឹងសំរេចបានគោលដៅជាក់ជាមិនខាន៕ ដោយ៖ ស្រី គំនិត
ចែករំលែកព័តមាននេះ