ខេត្តកំពង់ឆ្នាំង ៖ មានករណីក្មេងប្រុសស្រី២នាក់បានលង់ទឹករណ្តៅ បណ្តាលឱ្យបាត់បង់ជីវិត កាលពីវេលាម៉ោង5រសៀលថ្ងៃទី2 ខែកុម្ភៈ ឆ្នាំ2021 នៅចំណុចរណ្ដៅដីមួយកន្លែង ស្ថិតក្នុងភូមិអញ្ចាញ ឃុំក្តុលសែនជ័យ…
ខេត្តកំពង់ឆ្នាំង ៖ មានករណីក្មេងប្រុសស្រី២នាក់បានលង់ទឹករណ្តៅ បណ្តាលឱ្យបាត់បង់ជីវិត កាលពីវេលាម៉ោង5រសៀលថ្ងៃទី2 ខែកុម្ភៈ ឆ្នាំ2021 នៅចំណុចរណ្ដៅដីមួយកន្លែង ស្ថិតក្នុងភូមិអញ្ចាញ ឃុំក្តុលសែនជ័យ ស្រុកទឹកផុស ខេត្តកំពង់ឆ្នាំង ។
តាមប្រភពពីសមត្ថកិច្ចនគរបាលមូលដ្ឋានបានឲ្យដឹងថា ក្មេងរងគ្រោះទាំង២នាក់ខាងលើ ម្នាក់ឈ្មោះ ថុន គាថេន ភេទប្រុស អាយុ7ឆ្នាំ មានឪពុកឈ្មោះ មិន ធឿន អាយុ 31ឆ្នាំ និងម្ដាយឈ្មោះឃន សំ អាយុ29ឆ្នាំ ។ ចំណែកម្នាក់ទៀតឈ្មោះ ធូ ចាន់ថុន អាយុ10 ឆ្នាំ មានឪពុកឈ្មោះ ប៉ុល ធីម អាយុ33ឆ្នាំ និងម្ដាយឈ្មោះ ប៊ុន ធីម អាយុ36ឆ្នាំ ។ ក្មេងប្រុសស្រីរងគ្រោះទាំង2នាក់នេះមានទីលំនៅក្នុងភូមិអញ្ចាញ ឃុំក្តុលសែនជ័យ ស្រុកទឹកផុស ខេត្តកំពង់ឆ្នាំង ។
តាមប្រភពដដែលបានបន្តថា មុនពេលកើតហេតុ ឪពុកម្ដាយក្មេងប្រុសស្រីទាំង២នាក់មិនបាននៅផ្ទះទេ គឺទៅស៊ីឈ្នួលធ្វើចម្ការឲ្យគេ ដោយទុកកូនៗឱ្យនៅជាមួយជីតា ប៉ុន្តែដោយសារការភ្លេចភ្លាំងមួយភ្លែត លុះពេលជីតានឹកឃើញដើររកចៅ តែរកមិនឃើញ ហើយដោយមានការសង្ស័យក៏ទៅរកមើលក្នុងទឹករណ្តៅនៅមុខផ្ទះឈ្មោះ ផេង សុខវី ស្រាប់តែប្រទះឃើញអាវក្មេងប្រុសអណ្ដែតលើទឹកក៏នាំគ្នាចុះរាវរកឃើញ ប៉ុន្តែជាអកុសលពួកគេលង់ទឹកស្លា.ប់ទាំង២នាក់បាត់ទៅហើយ ។
ក្រោយការពិនិត្យ និងធ្វើកោសល្យវិច្ច័យលើក្មេងប្រុសស្រីរងគ្រោះទាំងពីរនាក់រួច បានប្រគល់ទៅឱ្យក្រុមគ្រួសារធ្វើបុណ្យតាមប្រពៃណី ។
គួររំលឹកថា នៅឃុំក្តុលសែនជ័យកាលពីដើមខែមករា ក៍មានក្មេងៗ២នាក់បានលង់ទឹកស្លា.ប់នៅក្នុងបរិវេណសាលារៀនផងដែរ ហើយគិតមកត្រឹមដើមខែកុម្ភៈនេះ ស្រាប់តែមានក្មេងចំនួន២នាក់ទៀតបានបាត់បង់ជីវិតដោយសារលង់ទឹករណ្តៅដីតែម្តង ៕
ចែករំលែកព័តមាននេះ