ភ្នំពេញ៖ រថយន្តមែ​កសឺដេស S430 មួយគ្រឿង បោះពួយយ៉ាងលឿន ចុះពី​ស្ពានព្រែកសំរោង បួងចង្កូតមិនទាន់ ជ្រុលទៅបុកឡើងសួនច្បាររង្វង់មូលព្រែកសំរោង និងបន្តទៅបុករបាំងថ្ម ដែលនៅអមផ្លូវជុំវិញរង្វង់មូល។ ហេតុការណ៍នេះ បានកើតឡើង កាលពីវេលាម៉ោង ៣ទៀបភ្លឺ ថ្ងៃទី២ ខែកុម្ភៈ ឆ្នាំ២០២១ នៅ​រង្វង់មូលគល់ស្ពាន​ព្រែកសំរោង ក្នុងភូមិកោះក្របី សង្កាត់ព្រែកថ្មី ខណ្ឌច្បារអំពៅ។

ប្រភពព័ត៌មានបានឲ្យដឹងថា នៅមុនពេលកើតហេតុ គេឃើញបុរសស្ត្រី ២នាក់ ជិះ​រថយន្តមួយគ្រឿង ម៉ាកមែក​សឺដេស S430 ពណ៌ខ្មៅ ពាក់ស្លាកលេខ ភ្នំពេញ 2P-0107 ធ្វើដំណើរចុះពីលើស្ពានព្រែកសំរោង ទិសដៅពីលិច ទៅកើត ​ក្នុងល្បឿនយ៉ាងលឿន។ លុះដល់ចំណុចកើតហេតុ សង្ស័យអ្នកបើកបររថយន្ត ស្រវឹង បួងចង្កូតមិនទាន់ ក៏ជ្រុលទៅបុកឡើងលើសួនច្បាររង្វង់មូលព្រែកសំរោង បណ្ដាលឲ្យបែកខឿន​សួនច្បាររង្វង់មូល ២ ទៅ ៣ផ្ទាំង។ តែរថយន្ត នៅមិនអស់ល្បឿន ក៏បានបន្តទៅខាងមុខ ធ្លាក់ចេញពីលើសួនច្បាររង្វង់មូល រួចក៏ទៅបុកនឹងរបាំងថ្ម ដែលនៅអមផ្លូវជុំវិញ​រង្វង់មូល​ពេញទំហឹង ទើបរថយន្តទៅមុខលែងរួច ក្រពឹត និងបាក់ក្រឡេកង់ខាងមុខ​ចំហៀងខាងស្ដាំ។

ភ្លាមៗនោះ អ្នកនៅក្នុងរថយន្ត ក៏បាននាំគ្នាចុះពីលើរថយន្ត រួចគេចខ្លួន ចេញពីកន្លែង​កើតហេតុ បាត់ស្រមោលតែម្តង។ បន្ទាប់មក ក៏មានសមត្ថកិច្ចមូលដ្ឋាន និងសមត្ថកិច្ច​ជំនាញបានចុះមកធ្វើអន្តរាគមន៍​។

ក្រោយពេលកើតហេតុ រថយន្តបង្ក ត្រូវបានសមត្ថកិច្ចជំនាញ វាស់វែង និងស្ទូចយកទៅ​រក្សាទុក ​នៅអធិការដ្ឋាននគរបាលខណ្ឌច្បារអំពៅ រង់ចាំម្ចាស់ចូលខ្លួន មក​ដោះស្រាយ​ទៅតាមផ្លូវច្បាប់៕ ដោយ៖ យឹម ឈឿន​