រាជធានីភ្នំពេញ ៖ ក្រុមជនសង្ស័យជិះម៉ូតូ ឌុបគ្នា២នាក់ បន្លំភ្នែក ជាអ្នកដឹកជញ្ជូនហ្គាស បានធ្វើសកម្មភាពឆក់អ្នកដំណើរថ្មើរជើង តាមផ្លូវ បានសម្រេចញឹកញាប់ ក្នុងខណ្ឌចំការមន…
រាជធានីភ្នំពេញ ៖ ក្រុមជនសង្ស័យជិះម៉ូតូ ឌុបគ្នា២នាក់ បន្លំភ្នែក ជាអ្នកដឹកជញ្ជូនហ្គាស បានធ្វើសកម្មភាពឆក់អ្នកដំណើរថ្មើរជើង តាមផ្លូវ បានសម្រេចញឹកញាប់ ក្នុងខណ្ឌចំការមន ត្រូវសមត្ថកិច្ចតាមចាប់ខ្លួនបាន ២នាក់ កាលពីថ្ងៃទី១ ខែកុម្ភៈ ឆ្នាំ២០២១ នេះបើតាមផេកហ្វេសប៊ុករបស់ស្នងការនគរបាលរាជធានីភ្នំពេញ ។
មន្ត្រីជំនាញ បានអោយដឹងថា បន្ទាប់ពីទទួលបានព័ត៌មានអំពីករណីឆក់ ក្រុមការងារព័ត៌មាន និងប្រតិកម្មរហ័ស បានធ្វើការទំនាក់ទំនង និងផ្តល់ព័ត៌មានបន្តភ្លាមៗ ជូនដល់ជំនាញ នៃអធិការដ្ឋាននគរបាលខណ្ឌចំការមន ដើម្បីចុះដល់ទីតាំងជួបជនរងគ្រោះ បន្តស្រាវជ្រាវកំណត់រកមុខសញ្ញាក្រុមជនសង្ស័យ ។
រហូតមកដល់វេលាម៉ោង៤រសៀលថ្ងៃទី០១ ខែកុម្ភៈ ឆ្នាំ២០២១ កម្លាំងនគរបាលព្រហ្មទណ្ឌ នៃអធិការដ្ឋាននគរបាលខណ្ឌចំការមន បានធ្វើការស្រាវជ្រាវ ឈានដល់ការឃាត់ខ្លួនជនសង្ស័យបាន ចំនួន០២នាក់ ដែលបានប្រព្រឹត្តបទល្មើស លួចមានស្ថានទំងន់ទោស(ឆក់កាបូប) ពីស្ត្រីជនជាតិបរទេសម្នាក់ ដែលកំពុងដើរនៅចំណុច៩៥ សង្កាត់បឹងត្របែក ខណ្ឌចំការមន កាលពីវេលាម៉ោង ១២និង៥១នាទី ថ្ងៃទី១៥ ខែមករា ឆ្នាំ២០២១ និង១ករណីទៀត ឆក់កាបូបដៃពីលោកគ្រូនាយកប្រតិបត្តិសណ្ឋាគារ Frangipani Villa កំពុងដើរតាមផ្លូវ តែមិនបានសសម្រេច នៅចំណុចផ្លូវ១២៣ កែង៤៣២ សង្កាត់បឹងត្របែក ខណ្ឌចំការមន កាលពីវេលាម៉ោង១៧និង០៣នាទី ថ្ងៃទី២៦ ខែមករា ឆ្នាំ២០២១ ។
ជនសង្ស័យ ដែឡសមត្ថកិច្ច ឃាត់ខ្លួនរួមមាន ៖
ទី១- ឈ្មោះ ធុង សៅនី ភេទប្រុស ជនជាតិខ្មែរ មុខរបរ លក់ហ្គាស
និងទី២- ឈ្មោះ រិត រតនា ភេទប្រុស ជនជាតិខ្មែរ មុខរបរកម្មករដឹកហ្គាស ។
ជនសង្ស័យទាំងពីរនាក់ ស្នាក់នៅផ្ទះជួលលេខ៩៥ ផ្លូវ៦៤១ ភូមិដើមអំពិល សង្កាត់ច្បារអំពៅទី១ ខណ្ឌច្បារអំពៅ
វត្ថុតាងចាប់យកម៉ូតូ ០១គ្រឿង ម៉ាក ZOOMER ពណ៌ស ស្លាកលេខ ភ្នំពេញ1IF7281 (ម៉ូតូជិះធ្វើសកម្មភាព) ។
បច្ចុប្បន្នជនសង្ស័យទាំង២នាក់ កំពុងឃុំខ្លួន និងសាកសួរបន្ត ដើម្បីកសាងសំណុំរឿងចាត់ការបន្តតាមនីតិវិធីច្បាប់ ៕
ចែករំលែកព័តមាននេះ