លោក សោម សម្បត្តិ អគ្គនាយកក្រុមហ៊ុន ខាំ-ផែន (ថ្នាំពណ៌ជាតិ) បាននិយាយថា​មនុស្សជោគជ័យមើលឃើញ​ឧបសគ្គជាឱកាសចំណែកមនុស្សបរាជ័យ​ឧបសគ្គជាការ​ភ័យក្លាច។ និយាយដូច្នេះ លោកបានលើកឧទាហរណ៍ដូចជានៅក្នុងពេល​កូវីដ១៩រាតត្បាតនេះ សម្រាប់លោក លោកបានមើលឃើញនេះជាឱកាសនៅពេល​មនុស្ស​ជាច្រើនភ័យក្លាច។ លោកបានបង្កើតអាជីវកម្មថ្មីចំនួនពីរនៅពេលនេះ ក្រៅពីអាជីវកម្មចាស់របស់លោកមិនបានកាត់បន្ថយបុគ្គលិក កាត់បន្ថយចំណាយ ដូចស្ថាប័នជាច្រើននោះ។

លោក សោម សម្បត្តិ ដែលគេតែងតែហៅឲ្យទៅចែករំលែកបទពិសោធន៍​លើការងារ​អាជីវកម្ម​និយាយ អ្វីដែលជំរុញឲ្យលោកមើលឃើញពេលនេះជា​ឱកាសដោយ​សារលោក​បានស្គាល់ជំងឺកូវីដ១៩ ថាវាចេញពីណាហើយទៅណា លោកបានដឹងថាគេ​អាចការពារ​កូវីដ១៩បាន ដូច្នេះ​លោកសម្រេចចិត្តបង្កើតអាជីវកម្មថ្មីនៅក្នុងឱកាសនេះ។ លោកសោម សម្បុត្ត មិនបាន និយាយថាអាជីវកម្មថ្មីពីររបស់លោកដែល​បានបង្កើត​នោះថាជាអ្វីទេ ប៉ុន្តែលោកថា “អ្វីដែល​យើងបានធ្វើនៅ​ពេលនេះគឺយើង​បានបង្កើត​ការងារថ្មីដល់មនុស្ស ឲ្យមានការងារធ្វើមានប្រាក់ខែសមរម្យ។ ចំណែកបុគ្គលិក​ចាស់របស់​យើង យើងមិនត្រឹមមិនកាត់បន្ថយប្រាកខែ ឬចំនួនបុគ្គលិកនោះទេ យើងបានលើកទឹកចិត្តពួកគេ បន្ថែមប្រាក់ខែឲ្យពូកគេនៅពេលស្ថាប័ន​ជាច្រើនកាត់​បន្ថយបុគ្គលិក។ នេះជាចំនុចជោគជ័យរបស់យើង” លោក សោម សម្បត្តិនិយាយនៅលើបណ្តាញសង្គម​។

ពាណិជ្ជកររូបនេះបានបញ្ជាក់ថា “នៅពេលមនុស្សជាច្រើនមានការភ័យក្លាច​ជាមួយជំងឺកូវីដ១៩ ហើយយើងម្នាក់ឬពីរនាក់ក្លាយហ៊ាននោះ នោះឱកាស​នឹងនៅក្នុងកណ្តាប់ដៃរបស់យើង”។

ចំណែកបុគ្គលកម្នាក់ទៀតដែលឲ្យតម្លៃលើឱកាសដែលនោះ គឺ លោកច្រឹក សុខនីម។ លោកសុខនីម ជាវិនិយោគិនអចលនទ្រព្យម្នាក់នៅកម្ពុជាហើយលោកក៍ជា​ជាប្រធាន​សមាគមវាយតម្លៃនិងភា្នល់ងារអចលនទប្រព្យកម្ពុជា។ សម្រាប់បុគ្គល​ដែល​បានជ័យជោគលើការងារជាច្រើនមកនេះបានលើកឡើងថា មានកក្តាបីដែលឲ្យនាំ​មនុស្សជោគជ័យ នៅក្នុងនោះមានសមត្ថភាព ឱកាស ហើយកក្តាមួយទៀតលោក​ថាអាចជាភ័ព្វសំណាង។

លោក ច្រឹក សុខនីម បាននិយាយអ្វីដែលគេគួរធ្វើដំបូងមុខឈានទៅរកភាព​ជោគជ័យគឺការសិក្សា ស្វែងរកចំណេះដឹង ជំនាញដាក់ខ្លួន បន្ទាប់ទៅត្រូវរងចំាឱកាស។ នៅក្នុងការរងចំាឱកាសនេះ បើគ្មានឱកាសគេអាចបង្កើតឱកាសបាន។ “ដើម្បីបង្កើតឱកាស ខ្ញុំធ្វើការច្រើនជាងអ្នកដទៃ។ ខ្ញុំធ្វើការងារដែលអ្នកដទៃ​មិនចូលចិត្តធ្វើ។ កាលខ្ញុំធ្វើឲ្យការឲ្យគេខ្ញុំចូលចិត្តធ្វើការងារច្រើន លុះយើងធ្វើការ​ងារច្រើន ថ្នាក់លើនឹងទុកចិត្ត គេបន្ថែមការងារឲ្យយើងធ្វើ យើងធ្វើរហូតទៅបាន​លទ្ធផលល្អរហូត នៅពេលណាមួយដែលគេត្រូវការមនុស្សក្នុងមុខតំណែង​ខ្ពស់គេនឹងផ្តល់ឱកាសឲ្យ យើង”​។

លោក​ កឹម អឿន ​ជាសហគ្រិនចេះមើលឱកាសម្នាក់ទៀត។ លោក​ កឹម អឿន​ថា​នៅពេល​មនុស្សមានបញ្ហាដោយសារកូវីដ១៩នេះ លោកបានបង្កើតអាជីវកម្មថ្មីមួយ ដែលធ្វើឡើងតាមប្រព័ន្ធអនឡាញ។ លោកបានបង្កើតក្រុមហ៊ុនHOME DUCATION ដែលផ្តល់ឱកាសឲ្យម្ចាស់សហគ្រាសធនតូចនិងមធ្យមជួបគ្នានៅលើវេទិការបស់លោក ដើម្បីចែករំលែកបទពិសោធន៍និងទទួលបានចំណេះដឹង ពីគ្រូឧទ្ទេសដែលមាន​បទពិសោធន៍​សម្រាប់ការគ្រប់គ្រងនិងដោះស្រាយបញ្ហាអាជីវកម្មនៅ​ពេលកូវីដ១៩នេះ។

លោកកឹម អឿនថា កូវីដ១៩បានផ្តល់ឱកាសឲ្យលោករកឃើញមុខជំនួញដែលចូលចិត្ត​ហើយបានកំពុងលូតលាស់ទៅមុខនៅក្នុងបរិបទនេះ។ “ខ្ញុំមើលឃើញថាមហា​សេដ្ឋីជេកម៉ា គាត់ល្បីកាលពីសម័យជំងឺសាល ក្រុមហ៊ុនAlibaba របស់គាត់បង្កើត​ឡើង។ ខ្ញុំចង់ឲ្យ HOME DUCATIONរបស់ខ្ញុំលូតលាស់ទៅមុខដូចគាត់ដែរ។ ខ្ញុំបាន​មើលឃើញថានៅពេលមានការលំបាកតែងតែមានអាជីវកម្មលេចធ្លោកើតមាន”៕