ខេត្តបន្ទាយមានជ័យ ៖ យុវជនម្នាក់ត្រូវសមត្ថកិច្ចចាប់ខ្លួន បន្ទាប់ពីខឹងម្តាយស្តីបន្ទោស ក៏យកខោអាវរបស់ខ្លួន និងប្អូនទៅដុតចោល ព្រមទាំងយកគម្របធុងទឹកគប់ម្តាយបណ្តាលឱ្យហើមភ្នែក កាលពីវេលាម៉ោង១០និង៣០នាទីថ្ងៃទី២៩ ខែមករា ឆ្នាំ២០២១ នៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ហើយក៏ត្រូវម្តាយប្តឹងឱ្យចាប់ខ្លួនបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់នៅថ្ងៃទី៣០ ខែមករា ឆ្នាំ២០២១ ។
លោកវរៈសេនីយ៍ត្រី នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែតបានប្រាប់ថា ជនសង្ស័យឈ្មោះ ភ័ណ និត ហៅជ្រូក ភេទប្រុស អាយុ២២ឆ្នាំ រស់នៅភូមិឃុំកើតហេតុខាងលើ។
លោកបានបញ្ជាក់ថា មុនពេលកើតហេតុ ស្ត្រីរងគ្រោះឈ្មោះ ដាំ ម៉ៅ អាយុ៥៣ឆ្នាំ ត្រូវជាម្តាយ រស់នៅភូមិខាងលើ បានដាក់ពាក្យប្តឹងជនសង្ស័យដែលត្រូវជាកូនបង្កើតម្នាក់ខាងលើថាបានធ្វើសកម្មភាពយកគម្របធុងទឹកគប់គាត់ បណ្តាលឱ្យហើមភ្នែកឆ្វេងព្រោះតែរឿងស្តីបន្ទោសបន្តិចបន្តួច ស្រាប់តែជនសង្ស័យជាកូនយកខោអាវរបស់ខ្លួន និងខោអាវប្អូនទៅដុតចោលកាលពីវេលាម៉ោងកើតហេតុខាងលើ ។
លោកវរៈសេនីយ៍ត្រី នួន នីណារ៉ូ បានបញ្ជាក់ថា ក្រោយពីទទួលបណ្តឹងពីស្ត្រីរងគ្រោះជាម្តាយរួចហើយ កម្លាំងសមត្ថកិច្ចបានចុះឃាត់ជនសង្ស័យនាំយកទៅសាកសួរនៅបញ្ជាការដ្ឋានកងរាជអាវុធហត្ថក្រុងប៉ោយប៉ែត ដោយជនសង្ស័យបានសាភាពថា ខ្លួនពិតជាបានប្រព្រឹត្តដូចការចោទប្រកាន់ប្រាកដមែន ព្រោះតែខឹងម្តាយស្តីបន្ទោសនិងជេរ ហើយក៏យកខោអាវរបស់ខ្លួននិងខោអាវប្អូនទៅដុតចោល លុះម្តាយជេរ ធ្វើឱ្យខ្លួនខឹងក៏យកគម្របធុងទឹកគប់ទៅលើម្តាយត្រូវចំរង្វង់ភ្នែក បណ្តាលឱ្យហើមភ្នែក ក៏ត្រូវម្តាយប្តឹងឱ្យកម្លាំងសមត្ថកិច្ចឃាត់ខ្លួនតែម្តង ។
ក្រោយសាកសួររួចហើយ សមត្ថកិច្ចបានកសាងសំណុំរឿងបញ្ជូនជនសង្ស័យទៅសាលាដំបូងខេត្តបន្ទាយមានជ័យ ដើម្បីចាត់ការតាមច្បាប់៕
ចែករំលែកព័តមាននេះ