រាជធានីភ្នំពេញ ៖ កម្លាំងសមត្ថកិច្ចនគរបាលការិយាល័យព្រហ្មទណ្ឌម្រិតស្រាលរាជធានីភ្នំពេញ នាព្រឹកថ្ងៃទី៣១ ខែមករា ឆ្នាំ២០២១នេះ បានបញ្ជូនជនសង្ស័យជាចោរជំនាញឆក់កាបូប២នាក់ទៅកាន់សាលាដំបូងរាជធានីភ្នំពេញ និងប្រគល់ជូនតំណាងអយ្យការ ដើម្បីធ្វើការចោទប្រកាន់ជាផ្លូវការ និងសម្រេចឃុំខ្លួនដាក់ពន្ធនាគារជាបណ្តោះអាសន្ន…
រាជធានីភ្នំពេញ ៖ កម្លាំងសមត្ថកិច្ចនគរបាលការិយាល័យព្រហ្មទណ្ឌម្រិតស្រាលរាជធានីភ្នំពេញ នាព្រឹកថ្ងៃទី៣១ ខែមករា ឆ្នាំ២០២១នេះ បានបញ្ជូនជនសង្ស័យជាចោរជំនាញឆក់កាបូប២នាក់ទៅកាន់សាលាដំបូងរាជធានីភ្នំពេញ និងប្រគល់ជូនតំណាងអយ្យការ ដើម្បីធ្វើការចោទប្រកាន់ជាផ្លូវការ និងសម្រេចឃុំខ្លួនដាក់ពន្ធនាគារជាបណ្តោះអាសន្ន ។
ជនសង្ស័យម្នាក់ឈ្មោះ ហេង វិសាល ភេទប្រុស អាយុ១៧ឆ្នាំ មុខរបរជាសិស្ស ស្នាក់នៅផ្ទះលេខ៣៥៣ ផ្លូវលំ ភូមិត្នោតជ្រុំ សង្កាត់បឹងទំពុន ខណ្ឌមានជ័យ រាជធានីភ្នំពេញ និងម្នាក់ទៀតឈ្មោះ រិទ្ធី ច័ន្ទបុត្រ ភេទប្រុស អាយុ១៦ឆ្នាំ មុខរបរជាសិស្ស ស្នាក់នៅផ្ទះគ្មានលេខផ្លូវ៣២៤ សង្កាត់បឹងសាឡាង ខណ្ឌទួល គោក រាជធានីភ្នំពេញ ។
ការឃាត់ និងបញ្ជូនខ្លួនជនសង្ស័យ២នាក់ខាងលើនេះ លោកវរសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាលបានឲ្យដឹងថា កាលពីវេលាម៉ោងប្រមាណជាង១១ព្រឹក ថ្ងៃទី២ ខែធ្នូ ឆ្នាំ២០២០ មានករណីចោរឆក់ទូរស័ព្ទមួយលើកនៅចំណុចមុខផ្ទះលេខ៤១ ផ្លូវ២២៨ សង្កាត់បឹងសាឡាង ខណ្ឌទួលគោក រាជធានីភ្នំពេញ ដែលប្រព្រឹត្តដោយជនល្មើស២នាក់បានធ្វើសកម្មភាពឆក់ទៅលើជនរងគ្រោះវ័យចំណាស់ម្នាក់កំពុងជិះម៉ូតូស្កុបពីម្នាក់ឯង ដែលក្នុងកាបូបដៃនោះមានទូរស័ព្ទទំនើប២គ្រឿង ។
ក្រោយពេលកើតមានអំពើឆក់កាបូបនោះ លោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ ហើយពិសេសគឺលោកឧត្តមសេនីយ៍ទោ សុង លី ស្នងការរងទទួលផែននគរបាលយុត្តិធម៌ បានដាក់ការណែនាំឲ្យមន្ត្រីនគរបាលជំនាញចុះស្រាវជ្រាវជាបន្ទាន់ ដើម្បីស្វែងរកចាប់ខ្លួនចោរជំនាញឆក់កាបូបនោះ ។
ពេលទទួលបានបទបញ្ជាពីលោកស្នងការ និងស្នងការរងទទួលផែនព្រហ្មទណ្ឌនោះ ក្នុងនាមរូបលោកជានាយការិយាល័យនគរបាលព្រហ្ម ក៏បានចាត់តាំងមន្ត្រីនគរបាលជំនាញមួយក្រុមឲ្យចុះទៅកន្លែងកើតហេតុក្រោមការសហការជាមួយនគរបាលមូលដ្ឋាន ដើម្បីឆែកមើលកាមេរ៉ាសុវត្ថិភាពតាមដងផ្លូវសាធារណៈ ពេលនោះទើបកំណត់បានមុខសញ្ញាចោរឆក់ទាំងពីរកំពុងគេចខ្លួន ។
លោក ប៊ុន សត្យា បន្តថា ការស៊ើបអង្កេត និងស្រាវជ្រាវតាមរកចាប់ខ្លួនមុខសញ្ញាចោរឆក់កាបូប២នាក់នោះ បានប្រើពេលវេលា២ខែគត់ ទើបចាប់បានជនសង្ស័យ តែយ៉ាងទោះជាណាក្តី ដែលនេះជាភាពជោគជ័យមួយក្នុងបេសកកម្មរបស់មន្ត្រីនគរបាលព្រហ្មទណ្ឌកម្រិតស្រាល ចេញបង្ក្រាបក្រុមចោរឆក់កាបូបរបស់ប្រជាពលរដ្ឋ ដើម្បីនាំទៅផ្តន្ទាទោសតាមផ្លូវច្បាប់ ។ ការស្រាវជ្រាវ និងការតាមប្រមាញ់ចោរឆក់២នាក់នេះ គឺចាប់ពីថ្ងៃកើតហេតុដល់ថ្ងៃទី២៩ ខែមករា ឆ្នាំ២០២១ ទើបឈានដល់ការឃាត់ខ្លួនជនសង្ស័យ និងដកហូតមកវិញនូវម៉ូតូ១គ្រឿង ជាមធ្យោបាយជិះធ្វើសកម្មភាពផងដែរ ។
ពេលចាប់ខ្លួនបានហើយ ជនសង្ស័យទាំង២នាក់ក៏បានសារភាពប្រហាក់ប្រហែលគ្នានៅចំពោះមុខសមត្ថកិច្ចថា នៅវេលាម៉ោង១១និង៣០នាទីព្រឹក ថ្ងៃទី២ ខែធ្នូ ឆ្នាំ២០២០ មុនដំបូងពួកគេទាំង២នាក់កំពុងនៅលេងម្តុំសង្កាត់បឹងសាងឡាង ពេលនោះឈ្មោះ ហេង វិសាល បានខ្ចីម៉ូតូម៉ាកហុងដា ប៊ីត ផលិតឆ្នាំ២០២១ ដែលមានពាក់ស្លាកលេខភ្នំពេញ ១IL ៨១៦៧ ពីឈ្មោះ ឌឿន សុផាត់ ភេទប្រុស អាយុ១៤ឆ្នាំ ដោយប្រាប់ម្ចាស់ម៉ូតូថា ខ្ចីជិះទៅរកទិញខោអាវពាក់ ។
ចម្លើយសារភាពបន្តថា ពេលនោះឈ្មោះ ហេង វិសាល បានជិះឌុបឈ្មោះ រិទ្ធិ ច័ន្ទបុត្រ លុះពេលចេញដំណើរផុតបរំលងមួយផ្លូវ ក៏ប្រទះឃើញជនរងគ្រោះមានវ័យចំណាស់ម្នាក់ជិះម៉ូតូម៉ាកស្កុបពីពណ៌ស ដាក់កាបូបទូរស័ព្ទដៃនៅក្នុងឃ្លុបខាងមុខក្បែរចង្កូត ដោយឃើញដូច្នោះឈ្មោះ ហេង វិសាល បានជិះម៉ូតូអែមជនរងគ្រោះ ហើយធ្វើសកម្មភាពឆក់យកកាបូបនោះទៅតែម្តង ។
ចម្លើយសារភាពបន្តទៀតថា ពេលឈ្មោះ ហេង វិសាល ឆក់បានកាបូបទូរស័ព្ទពីជនរងគ្រោះភ្លាមហើយ ក៏បានហុចកាបូបនោះឲ្យឈ្មោះ រិទ្ធិ ច័ន្ទបុត្រ ដែលអង្អុយនៅខាងក្រោយកាន់ រួចជិះម៉ូតូបោះពួយយ៉ាងលឿនឆ្ពោះទៅស្ទឹងមានជ័យ ខណៈជនរងគ្រោះបានស្រែកថា «ចោរៗ» រួចដេញតាមពីក្រោយ ។
ពេលទៅដល់ស្ទឹងមានជ័យ ពួកគេបានឆែកមើលក្នុងកាបូបក៏ឃើញទូរស័ព្ទៃ២គ្រឿង មួយគ្រឿងម៉ាកអាយហ្វូន x smax ពណ៌ទឹកមាស និងមួយគ្រឿងម៉ាកសាំងសុង ណូត ៨ សុទ្ធតែស៊េរីទំនើប រួចហើយមានដាក់ចូលក្នុងហោប៉ៅវិញ និងបានបោះកាបូបចូលលូទឹកស្អុយ រួចពួកគេបានយកទូរស័ព្ទទាំង២គ្រឿងនោះទៅលក់ នៅផ្សារ៧មករា ខណ្ឌទួលគោក បានប្រាក់៣៥០ដុល្លារ រួចក៏ចែកគ្នាភ្លាមៗ ដោយបាន១៧៥ដុល្លារម្នាក់ លុះដល់ថ្ងៃទី២៩ ខែមករា ក៏ត្រូវបានកម្លាំងសមត្ថកិច្ចចាប់ខ្លួន ។ នៅចំពោះមុខតំណាងអយ្យការ ជនសង្ស័យទាំង២ បានបដិសេធ ៕
ចែករំលែកព័តមាននេះ