រាជធានីភ្នំពេញ ៖ មន្ត្រីជាន់ខ្ពស់គណបក្សហ្វ៊ុនស៊ិនប៉ិច បានប្រកាសស្វាគមន៍ចំពោះការបង្កើតគណបក្សនយោបាយថ្មីរបស់ក្រុមអតីតគណបក្សឈ្មោះថា គណបក្សកែទម្រង់កម្ពុជា។ លោកអ៊ា ឃីម៉េង ឧបការីសម្តេចព្រះប្រធានគណបក្សហ្វ៊ុនស៊ិនប៉ិច និងជាប្រធាន ក្រុម…
រាជធានីភ្នំពេញ ៖ មន្ត្រីជាន់ខ្ពស់គណបក្សហ្វ៊ុនស៊ិនប៉ិច បានប្រកាសស្វាគមន៍ចំពោះការបង្កើតគណបក្សនយោបាយថ្មីរបស់ក្រុមអតីតគណបក្សឈ្មោះថា គណបក្សកែទម្រង់កម្ពុជា។
លោកអ៊ា ឃីម៉េង ឧបការីសម្តេចព្រះប្រធានគណបក្សហ្វ៊ុនស៊ិនប៉ិច និងជាប្រធាន ក្រុម ការងារខេត្តពោធិ៍សាត់ ក្នុងកិច្ចសម្ភាសន៍ជាមួយកោះសន្តិភាពនាថ្ងៃទី៣១ ខែមករា ឆ្នាំ២០ ២១ថា គណបក្សហ្វ៊ុនស៊ិនប៉ិច ដែលជារាជានិយមស្វាគមន៍ចំពោះការបង្កើតគណបក្សនយោបាយថ្មីនៅកម្ពុជា ដើម្បីចូលរួមប្រកួតប្រជែងនយោបាយតាមរយៈការបោះឆ្នោត ដោយត្រឹមត្រូវ និងយុត្តិធម៌។
លោកបញ្ជាក់ថា ៖ «ចំពោះការបង្កើតគណបក្សនយោបាយឈ្មោះថា គណបក្សកែទម្រង់កម្ពុជា របស់មន្ត្រីអតីតគណបក្សប្រឆាំងហៅកាត់ថា CRP នេះ ខ្ញុំយល់ឃើញថា ការបង្កើតគណបក្សនយោបាយជាសិទ្ធិនយោបាយរបស់ប្រជាពលរដ្ឋមានចែងក្នុងធម្មនុញ្ញកម្ពុជា ហើយកម្ពុជាជាប្រទេសប្រកាន់របបប្រជាធិបតេយ្យសេរីពហុបក្ស អ៊ីចឹងខ្ញុំស្វាគមន៍ និងសាទរនូវការបង្កើតគណបក្សនយោបាយថ្មីនេះ»។
ជាមួយគ្នានោះដែរ លោក អ៊ា ឃីម៉េង បានលើកឡើងថា ការបង្កើតគណបក្សនយោបាយ ថ្មីរបស់ក្រុមមន្ត្រីអតីតបក្សប្រឆាំងមានលោកអ៊ូ ច័ន្ទរ័ត្ន នេះ ដោយសារពួកគេមិនអាចរង់ចាំវត្តមានរបស់ខ្មោចអតីតគណបក្សសង្គ្រោះជាតិរស់ឡើងវិញទេ។
លោកគូសបញ្ជាក់ថា ៖ «គាត់មិនអាចរង់ចាំបានទេ ព្រោះអីជាង២ឆ្នាំជាងហើយ គាត់អស់សង្ឃឹមថា បក្សប្រឆាំងនឹងរស់ឡើងវិញនោះទេ ហើយធ្វើនយោបាយជាសិទ្ធិអីញ្ចឹង គ្នាត្រូវការបន្តអាជីពជាអ្នកនយោបាយបានទេ ដូច្នេះគេអស់សង្ឃឹម»។
ទាក់ទិននឹងការបោះឆ្នោតក្រុមប្រឹក្សាឃុំ-សង្កាត់នៅពេលខាងមុខនេះ លោក អ៊ា ឃីម៉េងបានឲ្យដឹងគណបក្សរបស់លោកបានរៀបចំរួចហើយនូវរចនាសម្ព័ន្ធក្នុងការចូលរួមប្រកួតប្រជែងការបោះឆ្នោតក្នុងនោះរចនាសម្ព័ន្ធនៅតាមឃុំសង្កាត់បានកំពុងរៀបចំបណ្តើរៗ។ អ្វី ដែលកំពុងធ្វើសង្ឃឹមថានឹងរួចរាល់នៅពេលកំណត់ ។
ក្នុងកិច្ចសម្ភាសន៍នោះដែរ លោកឃីម៉េង ក៏បានអះអាងថា អ្វីដែលថ្នាក់ដឹកនាំសំខាន់ៗ កំពុងរង់ចាំនោះ គឺ វត្តមានរបស់សម្តេចក្រុមព្រះ យាងមកដឹកនាំគណបក្សនយោបាយ។
លោកបញ្ជាក់ថា ៖ «អ្វីដែលកូនចៅរង់ចាំនោះ គឺរង់ចាំសម្តេចក្រុមព្រះ មកដឹកនាំគណបក្ស ពោលគឺតាំងពីព្រះអង្គប្រឈួនដោយសារគ្រោះថ្នាក់ចរាចរណ៍មក គឺងារធំៗមួយចំនួនមិនអាចសម្រេចបាននោះទេ គឺរង់ចាំព្រះអង្គសម្រេច ដោយសារនៅក្នុងគណបក្ស មិនមែនអ្នកណាមានសិទ្ធិសម្រេចបាននោះទេ»។
លោកអ៊ូ ច័ន្ទរ័ត្ន អតីតមន្ត្រីគណបក្សសង្គ្រោះជាតិបានឲ្យឹងថា ពេលនេះ លោកមិនបាន ដាក់ឯកសារទៅក្រសួងមហាផ្ទៃ ដើម្បីបង្កើតគណបក្សនយោបាយនយោបាយថ្មីឈ្មោះថា «គណបក្សកែទម្រង់កម្ពុជា» ព្រោះថា នៅខ្វះឯកសារតិចតួច ដូចជាអាសយដ្ឋានស្នាក់ការគណបក្សជាដើម។
លោកក៏បានឲ្យដឹងថា ការបង្កើតគណបក្សនយោបាថ្មីនេះ ដោយសារមើលឃើញថា កម្ពុជាដល់ពេលធ្វើការទម្រង់ហើយ ហើយវាមិនមែនតែកម្ពុជានោះទេ គឺបណ្តាប្រទេសផ្សេងទៀតទេ អស់រយៈពេល៣០ឆ្នាំគេធ្វើការទម្រង់ម្តង។ លោកថា ការបង្កើតគណបក្សនេះ ក៏មិនអាចរង់ចាំការវិលត្រឡប់ពីថ្នាក់ដឹកនាំអតីតគណបក្សសង្គ្រោះជាតិនោះទេ ព្រោះថាទាំងលោក កឹម សុខា និងថ្នាក់ដឹកនាំនៅក្រៅប្រទេសមិនអាចធ្វើឲ្យគណបក្សសង្គ្រោះជាតិដែលជាបក្សប្រឆាំងរស់ឡើងវិញបាននោះទេ។
លោកបន្តថា គណបក្សរបស់លោក គឺជាការរៀបចំរចនាសម្ព័ន្ធថ្មី ដែលមានការចួលរួមពី អតីតថ្នាក់ដឹកនាំគណបក្សសង្គ្រោះជាតិក្តី ក្រុមបញ្ញវន្តក្តី ប្រហែលជាមានការគាំទ្រ ហើយអាចនឹងកសាងសន្ទុះការគាំទ្រច្រើនជាង។
ទោះយ៉ាងណាក្តី លោក អ៊ូរ ច័ន្ទរ័ត្ន ដែលទទួលបានសម្បទានសិទ្ធិធ្វើនយោបាយកាល ពេលកន្លងមក មិនទាន់ហានអះអាងថា កម្លាំងគាំទ្រពីសកម្មជន អតីតគណបក្សប្រឆាំងក៏ដូចជា មហាជនផ្សេងទៀតប៉ុន្មានភាគរយនោះទេ។ ប៉ុន្តែលោក អះអាងថា ការគាំទ្រតិច ឬច្រើននោះ វាអាស្រ័យលើរចនាសម្ព័ន្ធ និងគោលនយោបាយ។
លោកគូសបញ្ជាក់ថា ៖ «សម្រាប់អ្នកគាំទ្រប៉ុន្មានភាគរយយើងមិនទាន់អាចទស្សទាយបាននោះទេ ព្រោះយើងមិនទាន់ចុះបញ្ជីជាផ្លូវការនៅក្រសួងមហាផ្ទៃនិងធ្វើការបង្ហាញឲ្យមហាជនបានដឹង»។
លោកច័ន្ទ រ័ត្ន បានលើកឡើងទៀតថា បើសិនជាក្រុមថ្នាក់ដឹកនាំគណបក្សនយោបាយថ្មីនេះ ចុះតាមមូលដ្ឋាន ដើម្បីស្ទាបស្ទង់នោះនឹងដឹងពីកម្លាំងគាំទ្របាន ប៉ុន្តែបើមិនទាន់ចុះ មូលដ្ឋានផងនោះ មិនអាចវាយតម្លៃបាននោះទេ។ ជាមួយគ្នានោះដែរ លោកក៏បានប្រតិកម្មចំពោះការវាយតម្លៃរបស់អ្នកវិភាគមួយចំនួនក៏ដូចជា សកម្មជនអតីតគណបក្សប្រឆាំងមិនទាន់អាចយកការពិតនោះទេ ព្រោះបុគ្គលម្នាក់ៗដែលលើកឡើងគ្មានហេតុផលច្បាស់លាស់ គឺមិនមែនជាតំណាងសម្លេងរបស់ប្រជាពលរដ្ឋនោះទេ៕
ចែករំលែកព័តមាននេះ