ខេត្តបន្ទាយមានជ័យ ៖ ទោះបីជាបែបណា ការធូរស្រាលនេះមិនដឹងថា អាការៈជំងឺឆ្កែឆ្កួតនេះនិងវិវត្តទៅជាបែបណាទៀតនោះទេ នៅពេលក្រោយនេះ ដែលគួរតែគ្រូពេទ្យទីនោះជួយបញ្ជូនគ្រួសារនេះបន្តផង ព្រោះពួកគេគ្មានលទ្ធភាពទេ ។ សូមបញ្ជាក់ថា…
ខេត្តបន្ទាយមានជ័យ ៖ ទោះបីជាបែបណា ការធូរស្រាលនេះមិនដឹងថា អាការៈជំងឺឆ្កែឆ្កួតនេះនិងវិវត្តទៅជាបែបណាទៀតនោះទេ នៅពេលក្រោយនេះ ដែលគួរតែគ្រូពេទ្យទីនោះជួយបញ្ជូនគ្រួសារនេះបន្តផង ព្រោះពួកគេគ្មានលទ្ធភាពទេ ។
សូមបញ្ជាក់ថា យុវតីម្នាក់ក្រោយពេលសត្វឆ្មាខាំជើងជាង២ខែមកហើយ ស្រាប់តែមានអាការៈដូចឆ្មា មានចរិតដូចឆ្មាដេញខាំគេឯង ទើបក្រុមគ្រួសារបញ្ជូនទៅកាន់មន្ទីរពេទ្យមង្គលបុរី តែពេទ្យមិនហ៊ានទទួល ក៏ឱ្យមកផ្ទះវិញ ។ យុវតីរូបនេះរស់នៅភូមិគាបលើ សង្កាត់ទឹកថ្លា ក្រុងសិរីសោភ័ណ ។
អ្នកស្រី អូន ជ្រាប អាយុ៤០ឆ្នាំ មានមុខរបរជាងកាត់ដេរ និងជាម្តាយយុវតីរូបនេះបានប្រាប់ឱ្យដឹងកាលថ្ងៃទី២៤ ខែមករា ឆ្នាំ២០២១ថា កូនស្រីគាត់បានទៅចូលរួមពិធីហូបចុកជាមួយមិត្តភក្តិ ស្រាប់តែគេឃើញកូនស្រី មានអាការៈដេញខាំគេឯងដូចសត្វឆ្មា ក៏ត្រូវឪពុកមិត្តភក្តិដឹកនាងមកផ្ទះ ។ ពេលឃើញសភាពធ្ងន់ធ្ងរបែបនេះគាត់ជាឪពុកបានបញ្ជូនទៅមន្ទីរពេទ្យ២កន្លែងត្រូវបានគ្រូពេទ្យមិនទទួល ក្រោយសួរនាំនិងឃើញអាការៈដូចឆ្មាឆ្កួតខាំក៏បាននាំមកផ្ទះវិញឱ្យគ្រូខ្មែរក្នុងភូមិមើលក៏ដេកលក់ទៅ ។
ស្ត្រីជាម្តាយបានបញ្ជាក់ថា កូនស្ត្រីមានឈ្មោះ សៅ វណ្ណារី អាយុ២០ឆ្នាំ ហើយក្នុងឆ្នាំសិក្សាថ្មីនេះកូនគាត់រៀនថ្នាក់ទី១២ ។ គាត់ថា ត្រូវឆ្មាខាំរយៈពេលជាង២ខែមកហើយ ជាឆ្មារបស់ជីដូនចញ្ចឹម មានពណ៌ប្រផេះ ខាំក្នុងចំណោមឆ្មា៣ទៅ៤ក្បាលដែលចេញចូលផ្ទះ ហើយកូនស្រីដើរជាន់វាក៏ខាំចំខ្នងជើងខាងឆ្វេងមុត២ចង្កូមបណ្តាលឱ្យហូរឈាម ។ គាត់ថា ភ្លាមៗមិនបានយកនាងទៅចាក់វ៉ាក់សាំងការពារជំងឺឆ្កែឆ្ងួតឡើយ ។
នេះជាការឆកល្វែងគួរឱ្យសោកស្តាយ ដោយទុករហូតជាង២ខែ ទើបកូនស្រីមានអាការៈដេញខាំមិត្តភក្តិ ទើបត្រូវសាច់ញាតិជួយនាំយកមកដល់ផ្ទះ ។ ដោយសភាពជំងឺនេះមានអាការៈធ្ងន់ធ្ងរក៏ដឹកទៅមន្ទីរពេទ្យ តែដោយសារតែជំំងឺឆ្កែឆ្កួតហួសពី១សប្តាហ៍ពិបាកសង្គ្រោះ ពេទ្យមិនទទួល តែបានណែនាំឱ្យដឹកទៅពេទ្យខេត្តបាត់ដំបងទើបមានលទ្ធភាពជួយបាន ។
ស្ត្រីជាម្តាយបានបញ្ជាក់ថា ព្រោះតែជីវភាពខ្វះខាតគ្មានលទ្ធភាពយកកូនស្រីទៅព្យាបាលពេទ្យខេត្តបាត់ដំបងទេ ព្រោះគ្មានប្រាក់ធ្វើសោហ៊ុយ ។ គ្រួសារនាងឪពុកឈ្មោះ សួង សើម អាយុ៤០ឆ្នាំ ជាកម្មករសំណង់ ឯម្តាយជាងកាត់ដេរ ដែលមានកូនក្នុងបន្ទុក៤នាក់ ស្រី៣នាក់នាងជាកូនទី៣ ។
តាមការណែនាំពីអ្នករស់នៅក្បែរខាងអាណិតអាសូរ ក៏បានប្រាប់ឱ្យនាំកូនទៅឱ្យគ្រូពេទ្យពិនិត្យម្តងទៀតនៅរសៀលថ្ងៃទី២៥ ខែមករា ឆ្នាំ២០២១ ។ តែពេលទៅជួបហើយគ្រួពេទ្យនិយាយដដែលថាឱ្យទៅពេទ្យបាត់ដំបងទៅ គាត់ក៏នាំកូនស្រីមកផ្ទះវិញ ព្រោះគ្មានលទ្ធភាព ។ បន្ទាប់មកដោយឃើញកូនស្រីមានអាការៈធម្មតាវិញ ក្រោយពីអស់ជម្រើសក៏រកគ្រូខ្មែរមកស្តោះផ្លុំផ្សងសំណាងទៅ ។
លោកវេជ្ជបណ្ឌិត ឡេ ចាន់សង្វាត ប្រធានមន្ទីរសុខាភិបាលខេត្តបន្ទាយមានជ័យបានប្រាប់នៅរសៀលថ្ងៃទី២៥ ខែមករា ឆ្នាំ២០២១ថា៖នៅពេលមានអ្នកដែលត្រូវឆ្កែឬឆ្មាខាំចាំបាច់ត្រូវនាំទៅចាក់វ៉ាក់សាំងការពារភ្លាមៗមិនអាចទុកលើសពី១សប្តាហ៍បានឡើយ ។ ហើយត្រូវតាមដានសកម្មភាពឆ្កែឬឆ្មាដែលខាំ បើសិនជាអត់មានបែកពពុះមាត់ឬឆ្កួតទេនោះ មនុស្សក៏មិនមានបញ្ហាដែរ ។
លោកវេជ្ជបណ្ឌិតបានបញ្ជាក់ថា បើសិនជាឆ្កែឬឆ្មាដែលខាំហើយមិនបានចាក់វ៉ាក់សាំងការពារឆ្កែឆ្កួតទេនោះ បើសិនជាអ្នកដែលត្រូវឆ្កែឬឆ្មាខាំមានអាការៈ សកម្មភាពដូចសត្វឆ្កែឬឆ្មានោះ ហើយមានបែកពពុះមាត់រកខាំគេឯងនិងខ្លាចទឹក ខ្លាចខ្យល់ ខ្លាចពន្លឺថ្ងៃ ពិតជាឆ្លងមេរោគឆ្កែឆ្ងួតហើយ គ្រូពេទ្យគ្មានលទ្ធភាពជួយសង្គ្រោះបានឡើយ ៕
ចែករំលែកព័តមាននេះ