រាជធានីភ្នំពេញ ៖ លោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានប្រកាសថា ការអត់ធ្មត់របស់លោកត្រូវបានបញ្ចប់ហើយ ដោយសារនៅតែមានអ្នកកាប់បំផ្លាញឈើល្អៗ ដើម្បីទន្ទ្រានយកដីនៅក្នុងឧទ្យានរាជបណ្ឌិត្យសភាកម្ពុជា…
រាជធានីភ្នំពេញ ៖ លោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានប្រកាសថា ការអត់ធ្មត់របស់លោកត្រូវបានបញ្ចប់ហើយ ដោយសារនៅតែមានអ្នកកាប់បំផ្លាញឈើល្អៗ ដើម្បីទន្ទ្រានយកដីនៅក្នុងឧទ្យានរាជបណ្ឌិត្យសភាកម្ពុជា តេជោសែនឫស្សីត្រឹប ដដែល ។
-នាព្រឹកថ្ងៃទី២៤ មករា ២០២១ បើតាមគណនីហ្វេសប៊ុកផេករបស់លោកបណ្ឌិត សុខ ទូច បានបង្ហោះសារថា «ការអត់ធ្មត់របស់ខ្ញុំត្រូវបានបញ្ចប់ ដូច្នេះយើងត្រូវតែអនុវត្ត..
១. យើងបានអប់រំឱ្យគាត់ស្រឡាញ់ព្រៃឈើអស់រយៈពេល២ឆ្នាំហើយ និងសុំឱ្យកុំកាប់ព្រៃឈើ កាប់ឈើរានយកដី ប៉ុន្តែគាត់អាចអាស្រ័យអនុផលព្រៃឈើ មានដូចជា ផ្សិត វល្លិ៍ ទំពាំង..
២. យើងបានបង្កើតការងារឱ្យគាត់មកចិញ្ចឹមមគោទឹកដោះ ចៀម ពពែ។
៣. គាត់អាចរក្សាបាននូវវប្បធម៌របស់ខ្លួន ដូចជាការរៀបចំយកជ័រពីដើមច្បោះ(ជ័រត្រាចជាដើម) និងទីតាំងឡស្លដែកបុរាណ ដែលសុទ្ធសឹងតែជាវប្បធម៌របស់ជនជាតិគួយ ដែលជាជនដើមភាគតិច
៤. យើងបានធ្វើអ្វីៗទាំងអស់ក្នុងការបណ្ដុះបណ្ដាលវិជ្ជាជីវៈ សម្រាប់កូនចៅជំនាន់ក្រោយរបស់គាត់
៥. ក្រោយការរីករាលដាលជំងឺកូវីដ-១៩ចប់ កូនចៅរបស់គាត់នឹងក្លាយទៅជាអ្នកផ្ដល់សេវាកម្មក្នុងវិស័យទេសចរណ៍ ដោយធ្វើជាអ្នកនាំភ្ញៀវទេសចរ រៀបចំផ្ទះសំណាក់ រៀបចំម្ហូបអាហារជូនភ្ញៀវទេសចរជាដើម ដែលយើងនឹងរៀបចំបណ្តុះបណ្តាលនៅពេលខាងមុខ។
ទាំងអស់នេះហើយដែលយើងចង់ជួយគាត់ ប៉ុន្តែផ្ទុយទៅវិញ គាត់នៅតែបន្តកាប់បំផ្លាញឈើល្អៗរានយកដី ដោយកាប់ហើយដុតព្រៃនៅក្នុងឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹបដដែល ដូច្នេះយើងនឹងចាប់ផ្ដើមអនុវត្តច្បាប់ហើយ ចាប់ពីពេលនេះទៅ យើងនឹងចាប់ទាំងឈើ ទាំងអ្នកប្រព្រឹត្តបទល្មើស និងទាំងគោយន្តយកមករក្សាទុកហើយ» ។
-កាលពីថ្ងៃទី០៣ មករា ២០២១ ហ្វេសប៊ុកផេករបស់លោកបណ្ឌិត សុខ ទូច បង្ហោះសារថា «ថ្ងៃនេះ ជាថ្ងៃឈប់សម្រាក ប៉ុន្តែ ក្រុមយើងមិនបានសម្រាកទេ គឺចុះមកត្រួតពិនិត្យ និងបង្ក្រាបការកាប់ព្រៃឈើ ។ អ្នកដែលកាប់ឈើ គឺអ្នកដែលមករស់នៅក្នុងឧទ្យាន ក្រោយព្រះរាជក្រឹត្យបង្កើតឧទ្យាន» ។
-កាលពីថ្ងៃទី០៨ ធ្នូ ២០២០ លោកបណ្ឌិត សុខ ទូច បង្ហោះសារថា «នៅថ្ងៃនេះ ខ្ញុំពិតជាអស់កម្លាំងខ្លាំងណាស់ ក្រោយពីបានដើរល្បាតនៅជ្រុងម្ខាង នៃឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប ត្រូវបានជនល្មើសកាប់បំផ្លាញព្រៃឈើអស់៣០០ដើម ដែលអ្នកកាប់បំផ្លាញនេះ បានដឹងថាខ្ញុំមិនបានធ្វើការល្បាតរយៈពេលប្រមាណជិត១ខែ ដោយសារមានធុរៈមមាញឹកខ្លាំង។ អ្នកដែលកាប់បំផ្លាញទាំងនេះ គឺជាអ្នកដែលទើបតែបានរស់នៅក្នុងឧទ្យាននេះ នៅក្រោយព្រះមហាក្សត្រ ឡាយព្រះហស្តលេខាលើព្រះរាជក្រឹត្យ ស្ដីពី ការបង្កើតឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប និងដាក់ឧទ្យាននេះទៅជាឧទ្យានសម្រាប់ធ្វើការអភិរក្ស។ ក្រុមការងារបានចុះទៅត្រួតពិនិត្យផ្ទះរបស់ប្រជាពលរដ្ឋទាំង៣១គ្រួសារដែលរស់នៅក្នុងឧទ្យាននេះចំនួន១៥ខ្នង និងបានរកឃើញថា នៅក្នុងផ្ទះទាំង១៥ខ្នងនេះ សុទ្ធសឹងតែមានឈើដែលត្រូវបានកាប់បំផ្លាញពីឧទ្យាន» ។
-កាលពីយប់ថ្ងៃទី១៣ ខែវិច្ឆិកា ឆ្នាំ២០២០ លោកបណ្ឌិត សុខ ទូច សរសេរថា «ដោយសារតែកូវីដ-១៩ ខ្ញុំបានធ្វើដំណើរមកកាន់ឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹបទាំងយប់។ នៅវេលាម៉ោង១១យប់ថ្ងៃទី១៣ ខែវិច្ឆិកា ឆ្នាំ២០២០នេះ ចំខួប៣ឆ្នាំ និង៣ខែ នៃការទទួលតំណែងជាប្រធានរាជបណ្ឌិត្យសភាកម្ពុជា ខ្ញុំបានទៅចាប់ឈើផ្ចឹកដែលត្រូវបានគេកាប់នៅពេលថ្ងៃនឹងត្រៀមដឹកចេញនៅពេលយប់ ដែលឈើធំៗនេះមានតែនៅ ឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹបតែប៉ុណ្ណោះ។ បើយើងមិនធ្វើកិច្ចការនេះទេ ក្រុមនេះនឹងបំផ្លាញព្រៃឈើធំៗដែលនៅសល់ក្នុងឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប» ។
-កាលពីថ្ងៃទី០២ ខែវិច្ឆិកា ឆ្នាំ២០២០ លោកបណ្ឌិត សុខ ទូច បានអោយដឹងថា «យើងបានរកឃើញអ្នកដែលកាប់បំផ្លាញដើមធ្នង់នៅក្នុងឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹបហើយ។ សូមថ្លែងអំណរគុណចំពោះឯកឧត្ដមអភិបាលខេត្តព្រះវិហារ មេបញ្ជាការកងរាជអាវុធហត្ថ និងរដ្ឋបាលព្រៃឈើខេត្តព្រះវិហារ ដែលបានចូលរួមសហការបោសសម្អាតករណីបទល្មើសព្រៃឈើនេះ។ អ្នកដែលបំផ្លាញព្រៃឈើ គឺជាអ្នកដែលរស់នៅក្នុងមូលដ្ឋាននេះតែម្ដង យប់ចេញមកកាប់ឈើ និងសកយ៉ាងស្អាត។ តើយើងត្រូវអភិរក្សព្រៃឈើយ៉ាងដូចម្ដេច ?» ៕
ចែករំលែកព័តមាននេះ