ខេត្តមណ្ឌលគិរី ៖ សត្វស្វាព្រាមចំនួន១ក្បាល បានជាប់អន្ទាក់របស់ព្រាន ហើយត្រូវបានមន្ត្រីឧទ្យានុរក្ស ដោយមានការចូលរួមពីភ្នាក់ងារល្បាតសហគមន៍តំបន់ការពារធម្មជាតិ និងបុគ្គលិកល្បាតរបស់អង្គការ WWF ដែលចុះល្បាតរួមគ្នាបានពើបប្រទះនៅចំណុចដៃអូរមួយកន្លែង ស្ថិតក្នុងតំបន់ស្នូល…
ខេត្តមណ្ឌលគិរី ៖ សត្វស្វាព្រាមចំនួន១ក្បាល បានជាប់អន្ទាក់របស់ព្រាន ហើយត្រូវបានមន្ត្រីឧទ្យានុរក្ស ដោយមានការចូលរួមពីភ្នាក់ងារល្បាតសហគមន៍តំបន់ការពារធម្មជាតិ និងបុគ្គលិកល្បាតរបស់អង្គការ WWF ដែលចុះល្បាតរួមគ្នាបានពើបប្រទះនៅចំណុចដៃអូរមួយកន្លែង ស្ថិតក្នុងតំបន់ស្នូល នៃដែនជម្រកសត្វព្រៃភ្នំព្រេច រួចក៏ជួយសង្គ្រោះឲ្យបានរួចផុតពីគ្រោះថ្នាក់ និងបានលែងឲ្យចូលទៅរស់នៅក្នុងព្រៃធម្មជាតិវិញ។
ការចុះល្បាត និងដោះអន្ទាក់ខាងលើនេះ ធ្វើឡើងក្នុងប្រតិបត្តិការចុះល្បាតរបស់ក្រុមការងារ នៅក្នុងសប្ដាហ៍ទី២ នៃខែមករា ឆ្នាំ២០២១ ក្នុងនោះក្រុមការងារបានដោះប្រមូល និងសារអន្ទាក់សរុបចំនួន១៦ខ្សែ នៅក្នុងភូមិសាស្ត្រតំបន់អភិរក្ស និងតំបន់ស្នូល នៃដែនជម្រកសត្វព្រៃភ្នំព្រេច។
មន្ត្រីឧទ្យានុរក្ស និងក្រុមការងារសហគមន៍ សូមអំពាវនាវដល់ប្រជាពលរដ្ឋដែលរស់នៅក្បែរតំបន់ការពារធម្មជាតិ សូមមេត្តាចូលរួមក្នុងសកម្មភាពការពារ និងអភិរក្សសត្វព្រៃ និងជីវៈចម្រុះ ដោយបញ្ឈប់ការដាក់អន្ទាក់ក្នុងបំណងទាក់ចាប់សត្វព្រៃដោយខុសច្បាប់។
គួររម្លឹកជូនថា ស្វាព្រាម ជាប្រភេទថនិកសត្វក្នុងក្រុមប្រភេទមានដោយបង្គួរ និងត្រូវបានចុះក្នុងបញ្ជីក្រហម IUCN ថា ជាប្រភេទងាយរងគ្រោះថ្នាក់។ នៅលើពិភពលោក ស្វាព្រាម កំពុងរងគ្រោះថ្នាក់ដោយសារការបរបាញ់ ការទាក់ចាប់ និងការបាត់បង់ទីជម្រក ៕
ចែករំលែកព័តមាននេះ