ខេត្តព្រះវិហារ ៖ មានករណីបុរសម្នាក់បានបាត់បង់ជីវិត ចំណែក៣នាក់ផ្សេងទៀត ត្រូវបានជួយសង្គ្រោះទាន់ពេលវេលា សង្ស័យមកពីពុលដង្កូវដួង បន្ទាប់ពីជនរងគ្រោះទាំង៤នាក់នាំគ្នាទៅកាប់ដើមត្នោតដើម្បីយកដង្កូវដួងទៅបំពងខ្លាញ់ហូបជាមួយបាយ ។
ហេតុការណ៍ខាងលើនេះបានកើតឡើងកាលពីល្ងាចថ្ងៃទី២៣ ខែមករា ឆ្នាំ២០២១ នៅភូមិសែនគង់ ឃុំចម្រើន ស្រុកសង្គមថ្មី ខេត្តព្រះវិហារ ។
លោកវរៈសេនីយ៍ឯក ជួន មឿន អធិការនគរបាលស្រុកសង្គមថ្មី បានអោយដឹងថា ជនរងគ្រោះទាំង៤នាក់ខាងលើរួមមាន ១-ឈ្មោះ ម៉ៅ លាន ភេទប្រុស អាយុ២៨ឆ្នាំ បានបាត់បង់ជីវិត ២-ឈ្មោះ ប៉ុយ វីន ភេទប្រុស អាយុ២៨ឆ្នាំ ៣-ឈ្មោះ ឌឹម សុភា ភេទប្រុស អាយុ១៥ឆ្នាំ និង៤-ឈ្មោះ ប្រាជ្ញ ពិសី ភេទប្រុស អាយុ៩ឆ្នាំ ។ ជនរងគ្រោះទាំង៤នាក់នេះរស់នៅក្នុងភូមិឃុំកើតហេតុខាងលើ ។
លោកអធិការនគរបាលស្រុកបានបន្តថា នៅវេលាម៉ោងកើតហេតុខាងលើ ជនរងគ្រោះទាំង៤នាក់នាំគ្នាទៅកាប់ដើមត្នោតបានដង្កូវដួងប្រហែល១គីឡូក្រាម រួចយកទៅចម្អិនដោយបំពងខ្លាញ់ ដើម្បីហូបជាមួយបាយ ។
លោកអធិការនគរបាលស្រុកបានបន្តទៀតថា ក្រោយហូបបាយជាមួយដង្កូវឌួងបានប្រហែលជា២ម៉ោង ស្រាប់តែជនរងគ្រោះទាំង៤នាក់ចាប់ផ្តើមមានអាការៈមិនស្រួលក្នុងខ្លួន ដូចជាក្អួតចង្អោរ រវើរវាយ និងរាក ។ ពេលនោះ ជនរងគ្រោះចំនួន៣នាក់ បានយកក្រូចឆ្មាលាយជាមួយទឹកក្តៅផឹកដើម្បីបន្សាបជាតិពុល លើកលែងតែបុរសឈ្មោះ ម៉ៅ លាន មិនបានផឹកទឹកក្តៅលាយក្រូចឆ្មានោះទេ ហើយបុរសរងគ្រោះរូបនោះមានអាការៈពុលខ្លាំងជាងគេ ដោយសារតែបុរសរងគ្រោះរូបនោះហូបដង្កូវដួងច្រើនជាងគេ លុះរហូតមកដល់វេលាម៉ោង២ឈានចូលព្រឹកថ្ងៃទី ២៤ ខែមករា ឆ្នាំ២០២១ ទើបបានបញ្ជូនទៅសង្គ្រោះនៅមណ្ឌលសុខភាពដែរ ប៉ុន្តែជាអកុសលបុរសរងគ្រោះរូបនោះបានបាត់បង់ជីវិតទៅហើយ ។
ក្រោយពីពិនិត្យ និងធ្វើកោសល្យវិច័យរួច សមត្ថកិច្ចបបានញ្ជាក់ថា ជនរងគ្រោះទាំង៤នាក់ខាងលើពិតជាពុលដង្កូវឌួងប្រាកដមែន ។ ដោយឡែក ជនរងគ្រោះម្នាក់ដែលបាត់បង់ជីវិតត្រូវបានសមត្ថកិច្ចប្រគល់ជូនក្រុមគ្រួសារដើម្បីរៀបចំធ្វើបុណ្យតាមប្រពៃណី ៕
ចែករំលែកព័តមាននេះ