រាជធានីភ្នំពេញ ៖ ដោយអនុវត្តតាមអនុសាសន៍សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាទីស្តីការគណៈរដ្ឋមន្ត្រី បានចេញលិខិតមួយនៅល្ងាចថ្ងៃទី២៩ កញ្ញា ឆ្នាំ២០១០ ផ្ញើជូនទៅលោកអ៊ិត សំហេង រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ដើម្បីសុំទៅតុលាការរាជធានី-ខេត្តដកដីកាហាមឃាត់កម្មករ-កម្មការិនីចំនួន២៦៥នាក់ ក្នុងចំណោម២០រោងចក្រឱ្យចូលធ្វើការវិញ ។
លោកស្វាយ ស៊ីថា រដ្ឋលេខាធិការនៃទីស្តីការគណៈរដ្ឋមន្ត្រី បានចុះហត្ថលេខាកាលពីថ្ងៃទី២៩ កញ្ញា ២០១០ លើខិតផ្ញើជូនលោកអ៊ិត សំហេង រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមការងារទំនាក់ទំនងវិជ្ជាជីវៈ ជុំវិញករណីសំណើរបស់សមាគមរោងចក្រកាត់ដេរនៅកម្ពុជា សុំអន្តរាគមន៍ដ៏ខ្ពង់ខ្ពស់់ជាបន្ទាន់ពីសម្តេចនាយករដ្ឋមន្ត្រី ដើម្បីបញ្ចប់សកម្មភាពកូដកម្ម-បាតុកម្ម របស់សហភាពការងារកម្ពុជាដឹកនាំដោយលោកអាត់ ធន់ និងសម្ព័ន្ធសហជីពជាតិកម្ពុជាដែលដឹកនាំដោយលោកស្រី ម៉ម ញឹម ។
ទីស្តីការគណៈរដ្ឋមន្ត្រីបានឱ្យដឹងទៀតថា ចំពោះបញ្ហានេះរាជរដ្ឋាភិបាលបានសំរេចយល់ព្រមតាមសំណើរបស់ក្រុមការងារផ្នែកទំនាក់ទំនងវិជ្ជាជីវៈ គឺ ៖
ទី១-បន្តពង្រឹងការអនុវត្តច្បាប់ឱ្យបានម៉ឺងម៉ាត់នៅតាមរោងចក្រកាត់ដេរសំលៀកបំពាក់ និងស្បែកជើង ទាំងភាគីនិយោជកនិងភាគីសហជីព ។ ចំពោះមុខ បន្តអនុវត្តតាមសេចក្តីជូនដំណឹងលេខ១០៧១ សជណ ចុះថ្ងៃទី១៦ ខែកញ្ញា ២០១០ របស់ទីស្តីការគណៈរដ្ឋមន្ត្រី ដើម្បីធានាស្ថិរភាពនៃដំណើរការរោងច្រក ។ ចំពោះតួលេខនៃការខូចខាតដែលប្រកាសដោយភាគីនិយោជក គឺជាផលប៉ះពាល់នៃរាល់ករណីកូដកម្ម បាតុកម្ម ដែលកើតឡើង ហើយពុំទាន់មានបទដ្ឋានណាមួយសំរាប់ដោះស្រាយនៅឡើយ ។ ម្យ៉ាងទៀត យោងតាមមាត្រា៣៣៧ នៃច្បាប់ស្តីពីការងារ ការកំណត់គុណវុឌ្ឍិនៃកូដកម្មត្រឹមត្រូវតាមច្បាប់ឬខុសច្បាប់ជាសមត្ថកិច្ចរបស់តុលាការ ។
ទី២-ស្នើឱ្យគ្រប់ភាគីទាំងអស់បញ្ឈប់ការចោទប្រកាន់គ្នាទៅវិញទៅមកតាមគ្រប់រូបភាពមុនបង្អស់តាមប្រព័ន្ធឃោសនានិងការប្តឹងគ្នាតាមប្រព័ន្ធតុលាការ ដែលនាំឱ្យសាធារណមតិជាតិ និងអន្តរជាតិមានការព្រួយបារម្ភ ។
ទី៣-បន្តការចរចាគ្នាតាមយន្តការក្រុមការងារទំនាក់ទំនងវិជ្ជាជីវៈ ដើម្បីដោះស្រាយបន្ថែមអត្ថប្រយោជន៍បន្ទាប់បន្សំជូនកម្មករនិយោជិត ហើយខិតខំបញ្ចៀសនូវការប្រឈមមុខដែលនាំឱ្យខាតបង់ប្រយោជន៍ដូចកន្លងមក ។
ទី៤-ផ្តល់បទបញ្ជាឱ្យក្រុមអ្នកច្បាប់ជួយពិនិត្យទិដ្ឋភាពច្បាប់ ដើម្បីសុំទៅតុលាការរាជធានី-ខេត្តដកដីកាហាមឃាត់កម្មករ-កម្មការិនីចំនួន២៦៥នាក់ ក្នុងចំណោម២០រោងចក្របានចូលបំរើការងារវិញ ។
ទី៥-សំរេចឱ្យភាគីនិយោជក និងភាគីសហជីពបញ្ឈប់ការប្តឹងគ្នាទៅវិញទៅមក ហើយរួមសហការគ្នាផ្សព្វផ្សាយអំពីគោលនយោបាយនិងការអនុវត្តនូវលក្ខខណ្ឌការងារល្អដោយការយោគយល់គ្នាដើម្បីកិតិ្តនាមនៃវិស័យកាត់ដែរនៅកម្ពុជា និងដើម្បីការប្រកួតប្រជែងដណ្តើមទីផ្សារសំរាប់វិស័យនេះ ។ សុំឱ្យវិលមករកពាក្យស្លោកដែលសម្តេចនាយករដ្ឋមន្ត្រីមានប្រសាសន៍«ត្រូវចាត់ទុករោងចក្រសហគ្រាសជាឆ្នាំងបាយរួម» ។
ទី៦-អនុញ្ញាតឱ្យស្នើសុំតុលាការមេត្តាបញ្ចប់ការចោទប្រកាន់ទៅលើកម្មករនិងថ្នាក់ដឹកនាំសហជីព និងសុំឱ្យរោងច្រកមេត្តាអនុញ្ញាតឱ្យកម្មករទាំងអស់ចូលធ្វើការវិញ ដែលនេះជាការសំរុះសំរួលក្រោមគោលនយោបាយឈ្នះ=ឈ្នះ ៕
ចែករំលែកព័តមាននេះ