រាជធានីភ្នំពេញ ៖ ខ្លាឃ្មុំឈ្មោលមួយក្បាលបានជាប់អន្ទាក់របស់ព្រានព្រៃ នៅក្នុងដែនឧទ្យានជាតិ ជួរភ្នំក្រវាញ ត្រូវបានជួយសង្គ្រោះ ។ កាលពីម្សិលមិញនៅវេលាម៉ោង៤និង ៣០នាទីរសៀល ថ្ងៃទី…
រាជធានីភ្នំពេញ ៖ ខ្លាឃ្មុំឈ្មោលមួយក្បាលបានជាប់អន្ទាក់របស់ព្រានព្រៃ នៅក្នុងដែនឧទ្យានជាតិ ជួរភ្នំក្រវាញ ត្រូវបានជួយសង្គ្រោះ ។ កាលពីម្សិលមិញនៅវេលាម៉ោង៤និង ៣០នាទីរសៀល ថ្ងៃទី ២២ ខែមករា ឆ្នាំ ២០២១ មន្ត្រីឧទ្យានុរក្សនៃស្នាក់ការល្បាតឆាយអារ៉ែងរបស់យើង បានប្រទះឃើញខ្លាឃ្មុំឈ្មោលមួយក្បាលបានជាប់អន្ទាក់របស់ព្រានព្រៃ ។ នេះបើតាមទូរទស្សន៍ជាតិកម្ពុជាបានផ្សាយនារសៀលថ្ងៃទី២៣ ខែមករានេះ។
ក្រុមល្បាតបានទូរស័ព្ទមកកាន់ការិយាល័យនៃអង្គការសម្ព័ន្ធមិត្តសត្វព្រៃភ្លាមៗ ដើម្បីបញ្ជូនក្រុមជួយសង្គ្រោះសត្វព្រៃបន្ទាន់ (WRRT) ពីភ្នំពេញ ដើម្បីទៅជួយសង្គ្រោះសត្វខ្លាឃ្មុំ ។
ក្រុមជួយសង្គ្រោះដឹកនាំដោយប្រធានគម្រោងសង្គ្រោះ និងថែរក្សាសត្វព្រៃរបស់យើងគឺលោក Nick Marx បានចុះទៅកន្លែងនោះជាមួយលោក ចិន្តា ដែលជាពេទ្យសត្វ ។ ពួកគាត់បានទៅដល់កន្លែងនោះនៅម៉ោងប្រហែល ៥ ព្រឹកមិញនេះ រួមជាមួយមន្ត្រីឧទ្យានុរក្សពីស្នាក់ការល្បាតស្ទឹងព្រាត់ ។
សត្វខ្លាឃ្មុំនេះត្រូវបានក្រុមសង្គ្រោះបាញ់ថ្នាំសន្តំ ដោះចេញពីអន្ទាក់ និងព្យាបាលនៅនឹងកន្លែង ហើយត្រូវបានដោះលែងទៅក្នុងព្រៃវិញ ដោយសាររបួសរបស់វាមិនមានភាពធ្ងន់ធ្ងរ ។
ជាចុងក្រោយ សូមថ្លែងអំណរគុណដល់លោក Nick លោក ចិន្តា ក្រុមមន្ត្រីឧទ្យានុរក្សដែលបានខិតខំប្រឹងប្រែងយ៉ាងខ្លាំង និងក្រុមជួយសង្គ្រោះសត្វព្រៃបន្ទាន់ (WRRT) ៕
ចែករំលែកព័តមាននេះ