ខេត្តកំពង់ឆ្នាំង ៖ ក្រៅពីការងារស្រែចម្ការ ប្រជាពលរដ្ឋរស់នៅភូមិបំពង់ផ្ចឹក ឃុំអណ្ដូងស្នាយ ស្រុករលាប្អៀរនៅ បានបង្កើនមុខរបរប្រចាំថ្ងៃមួយទៀត ដែលជាតំណរពីដូនតា គឺត្បាញដើមរពាក់ដែលជាមុខរបរនៅផ្ទះសម្រាប់បង្កើនជីវភាពគ្រួសារ ។
ជួបជាមួយអ្នកយកព័ត៌មានយើងនៅរសៀល ថ្ងៃទី២២ ខែមករា ឆ្នាំ២០២១ ស្ត្រីឈ្មោះ ផូ ខេង ដែលកំពុងតែត្បាញដើមរពាក់ នៅដៃធ្វើជាកន្ត្រកប្រភេទលេខ១ បានឲ្យដឹងថា ៖ គាត់បានចេះត្បាញដើមរពាក់ ពីឪពុកម្ដាយរបស់គាត់ដែលចេះតគ្នាពីដូនតារបស់គាត់ដែរ ។ សព្វថ្ងៃក្រៅពីធ្វើស្រែ ក្រុមគ្រួសារគាត់តែងឆ្លៀតពេលទំនេរត្បាញដើមរពាក់ធ្វើជាកន្ត្រកដែលមាន៣ប្រភេទ គឺពីលេខ 1 ដល់ លេខ 3 ។ ចំពោះដើម រពាក់វិញ គឺអ្នកភូមិតែងនាំគ្នាទៅបោចដល់ខេត្តកំពង់ធំ ដោយសហការគ្នាជួលគោយន្តជិះទៅ និងប្រើរយៈពេលជាង១០ ថ្ងៃទើបត្រឡប់មកដល់ផ្ទះវិញ ហើយយកមកត្បាញ រយៈពេល១ខែ ឬ២ខែ ពេលអស់នាំគ្នាទៅបោចបន្តទៀត ។
ចំពោះកន្ត្រកដែលគាត់កំពុងត្បាញនេះ គឺជាកន្ត្រកប្រភេទលេខ១ ដែលអាចលក់បានថ្លៃ៥ពាន់រៀលក្នុងកន្ត្រក១ ចំណែកលេខ៣ និងលេខ២ ថ្លៃ៤ទៅ៣ពាន់រៀលដែលការងារនេះអាចយកមកផ្គត់ផ្គង់ជីវភាពគ្រួសារប្រសើរផងដែរ ។
ដោយឡែកស្ត្រី ឈ្មោះផូ ខុត ដែលមានទីលំនៅក្បែរគ្នាបានបញ្ជាក់ថា ៖ រូបគាត់ជាអ្នកប្រមូលទិញផង នឹងត្បាញដោយខ្លួនឯងផង ។ ចាប់ពីម៉ោងប្រមាណ3 រសៀល គាត់បានបើកគោយន្តដើរប្រមូលទិញតាមភូមិ លុះព្រឹកឡើងរៀបចំចងជាដុំ យកទៅលក់បន្តនៅភូមិគ្រួស ជើងគ្រាវ ដែលមានម៉ូយចាំទទួលទិញ បន្តយកទៅលក់តាមខេត្តឆ្ងាយៗ ឬទៅលក់បន្តដល់ប្រទេសថៃទៀតផង ។
ចំណែមដើមរពាក់ គឺគេត្បាញជាច្រើនប្រភេទ មានដូចជា កន្ត្រកជាលដាក់ខោអាវ សជី សម្រាប់គ្របម្ហូបអាហារ កញ្ឆេ ជើងឆ្នាំង នឹងត្បាញអ្វីផ្សេងៗតាមតម្រូវការដែលអតិថិជនចង់បាន គ្រាន់តែយកគំរូមកតែប៉ុណ្ណោះ ។ បច្ចុប្បន្ននេះផ្ទះណាដូចផ្ទះណាដែរ ក្នុងភូមិបំពង់ផ្ចឹកនេះ សុទ្ធតែឆ្លៀតពេលទំនេរទៅបោចដើមរពាក់យកមកធ្វើជាប្រដាប់ប្រើប្រាស់សម្រាប់លក់បង្កើនជីវភាពគ្រួសារ ។
ទោះយ៉ាងនេះក្តី បុរសម្នាក់ដែលមិនហ៊ានបញ្ចេញឈ្មោះបានឲ្យដឹងថា ៖ ចំពោះការទៅបោចដើមរពាក់ដល់ខេត្តកំពង់ធំ គឺជួបការលំបាកច្រើនណាស់ ដូចជា បញ្ហាពេលចូលទៅស្នាក់នៅគេយកម្នាក់ 2ម៉ឺនដោយសហគមន៍ការពារព្រៃឈើនៅទីនោះជាអ្នកយក ហើយចំណែកដើមរំពាក់ក៏កាន់តែខ្សត់ដែរ ដោយ សារតែការឈូសឆាយដីព្រៃធ្វើជាកម្មសិទ្ធិធ្វើឲ្យពួកគាត់ជួបការលំបាកដើមរពាក់កាន់តែខ្សត់ទៅៗ ។
បើជាធម្មតាត្រឹមតែ 5ទៅ 6 ថ្ងៃ ឬត្រឹម១សប្តាហ៍ ពួកគាត់បោចដើមរពាក់គ្រប់គ្រាន់សម្រាប់យកមកត្បាញម្ដងហើយ ។ ប៉ុន្តែពេលនេះយ៉ាងតិចបំផុតចាប់ពី10ថ្ងៃឡើងទៅទើបបោចដើមរពាក់គ្រប់គ្រាន់សម្រាប់យកមកត្បាញម្តងសម្រាប់រយៈពេលជាង១ខែ ឬ២ខែត្បាញអស់ទើបទៅរកម្តងទៀត ៕
ចែករំលែកព័តមាននេះ