បន្ទាយមានជ័យ៖ សិប្បកម្មចម្លាក់ថ្ម កំពុងប្រឈមនឹងការបាត់បង់ជាង ព្រោះប៉ះពាល់សុខភាព អាចបណ្តាលឲ្យស្លាប់ ដោយជំងឺសួតជាបន្តបន្ទាប់ ហើយមានការភ័យព្រួយ ទើបជាងចម្លាក់ ដូរមុខរបរផ្សេង គួបផ្សំនឹងមួយរយៈពេលនេះ គ្មានភ្ញៀវទិញទៀត។
បងស្រីម្នាក់ ជាម្ចាស់សិប្បកម្ម បានប្រាប់ថា សិប្បកម្មចម្លាក់ថ្ម កំពុងតែប្រឈមនឹងការបាត់បងជាងជាបណ្តើរៗហើយ ព្រោះតែជាងប៉ះពាល់សុខភាព បណ្តាលឲ្យស្លាប់ដោយជំងឺសួតជាបន្តបន្ទាប់ ហើយមានជាងខ្លះ ដែលមានជំនាញឆ្លាក់ថ្មនេះ ព្រួយបារម្ភ ក៏បានផ្លាស់ប្តូរមុខរបរពីជាងចម្លាក់រូប ទៅធ្វើអ្វីផ្សេង ព្រោះតែបារម្ភពីសុខភាព។
បងស្រីបានបញ្ជាក់ថា មុខរបរសិប្បកម្មចម្លាក់ថ្មលក់គ្រឿងអនុស្សារីយ៍ នៅភូមិភ្នំជញ្ជាំង ឃុំជប់វ៉ារី ស្រុកព្រះនេត្រព្រះ ត្រូវបានបង្កើតឡើងរយៈពេលជិត ២០ឆ្នាំមកហើយ តាំងពីចម្លាក់ថ្ម ជារូប ឆ្លាក់ដាប់ដោយដៃ រហូតដល់ទាន់សម័យ ឆាប និងស្វានដោយម៉ូទ័រ ដែលជារូបចម្លាក់អំពីថ្ម មានរូបចម្លាក់ជាគ្រឿងអនុស្សារីយ៍ និងចម្លាក់រូបពុទ្ធបដិមា និងរូបចម្លាក់ផ្សេងៗ ដែលមានរូបធំៗ ដែលទម្ងន់មិនតិចជាង ១០តោន ជាដើម។
បងប្រុសជាជាងចម្លាក់ម្នាក់ បានប្រាប់ថា ជំនាញ និងមុខរបរចម្លាក់រូប ដែលជាស្នាដៃរចនាបទខ្មែរសម័យដើម ត្រូវចេះតៗគ្នា ហើយមន្ទីរវប្បធម៌ និងវិចិត្រសិល្បះខេត្ត ក៏ដូចជា អង្គការដៃគូ បានចុះមកបង្ហាត់បង្ហាញជំនាញបន្ថែម រហូតជាង អាចឆ្លាក់រូបចម្លាក់មានរចនាបទរស់រវើក ហើយដែលអាចទាក់ទាញភ្ញៀវទិញជាអនុស្សាវរីយ៍ និងរូបចម្លាក់ព្រះពុទ្ធបដិមាធំ ដែលដាក់តាមវត្តអារាមជាស្នាដៃកូនខ្មែរ ដូចជា រូបចម្លាក់មួយចំនួន តាមសួន ដោយយកថ្ម នៅភ្នំព្រះនេត្រព្រះ និងថ្មមកពីខេត្តព្រះវិហារ និងខេត្តពោធិ៍សាត់។
បងប្រុសជាជាងចម្លាក់ បានបញ្ជាក់ថា ជាងចម្លាក់ថ្ម មកដល់ពេលនេះ បាត់បង់ជាងជំនាញៗខ្លះ ព្រោះតែសុខភាព បណ្តាលឲ្យស្លាប់ជាបន្តបន្ទាប់ ដោយជំងឺសួត ហើយជាងមួយចំនួន ព្រួយបារម្ភ ក៏បានប្តូរមុខរបរចម្លាក់ថ្មទៅធ្វើអ្វីផ្សេង។
ជាងចម្លាក់ថ្មនេះ អាចរកកម្រៃ១ថ្ងៃ បាន ៤ ទៅ ៥ម៉ឺនរៀល ហើយខ្លះម៉ៅចម្លាក់ជារូប ១ថ្ងៃ រកបានរហូតជិត ១០ម៉ឺនរៀល។
ជាចម្លាក់បន្តថា កាលពីមុនចម្លាក់ថ្ម ដោយដៃ ប៉ះពាល់សុខភាព ហើយពេលនេះ ឆ្លាក់ថ្ម ដោយឆាប និងស្វានដោយម៉ូទ័រ ក៏នៅតែប្រឈមប៉ះពាល់សុខភាពដូចគ្នា។ ជាងចម្លាក់មួយចំនួន បានបាត់បង់ជីវិត ដោយជំងឺសួត ព្រោះតែចម្លាក់ថ្ម។
លោក ឃូ ពៅ អភិបាលស្រុកព្រះនេត្រព្រះ បានប្រាប់កោះសន្តិភាពថា សិប្បកម្មចម្លាក់ថ្មជារូប និងសិប្បកម្មកាត់ ជាការ៉ូ និងឥដ្ឋ មានប្រមាណជាង ២០កន្លែង នៅស្រុកព្រះនេត្រព្រះ។ ក្នុងនោះ ក៏មានចម្លាក់រូបអនុស្សារីយ៍ និងចម្លាក់ព្រះពុទ្ធបដិមា និងរូបចម្លាក់ផ្សេងៗមានតម្លៃ មិនតិចជាងម៉ឺនដុល្លារ ក៏មាន។
លោកអភិបាល ស្រុកបន្ថែមថា ក្នុងមួយរយៈកាលនេះ ជាងខ្លះ គ្រោះថ្នាក់ស្លាប់ ដោយជំងឺសួត និងខ្លះទៀត ត្រូវបានផ្លាស់ប្តូរមុខរបរ ដោយព្រួយបារម្ភពីសុខភាព។ តែមន្ទីរវប្បធម៌និងវិចិត្រសិល្បះ ខេត្ត បានចុះណែនាំពីវិធីបង្ការទប់ស្កាត់គ្រោះដោយសុខភាព តាមរយៈការពាក់ម៉ាស់ និងរបាំងមុខ ជាដើម នៅពេលឆ្លាក់ថ្មទាំងនោះ៕ ដោយ៖ ប៊ុន ធឿន
ចែករំលែកព័តមាននេះ