ខេត្តមណ្ឌលគិរី៖ លោកទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្រ្តបច្ចេកវិទ្យា និងនវានុវត្តន៍ បានណែនាំដល់អភិបាលខេត្តមណ្ឌលគិរី ត្រូវរៀបចំចុះបញ្ជីប្លង់រឹង ឲ្យបានរួចរាល់ ចំពោះទីតាំង ដែលត្រូវរៀបចំទុកជាប្រភពទឹកស្អាតផ្គត់ផ្គង់ សម្រាប់ក្រុងសែនមនោរម្យ ជៀសវាងការលំបាក នៅថ្ងៃក្រោយ។
លោករដ្ឋមន្ត្រី ថ្លែងបែបនេះ ក្នុងពិធីសម្ពោធមន្ទីរឧស្សាហកម្មវិទ្យាសាស្រ្ត បច្ចេកវិទ្យា និងនវានុវត្តន៍ ខេត្តមណ្ឌលគិរី កាលពីថ្ងៃទី២០ ខែមករា ឆ្នាំ២០២១។
លោករដ្ឋមន្ត្រី ចម ប្រសិទ្ធ បានថ្លែងការកោតសរសើរយ៉ាងខ្លាំង ចំពោះមន្ទីរឧស្សាហកម្ម វិទ្យាសាស្រ្តបច្ចេកវិទ្យា និងនវានុវត្តន៍ ខេត្តមណ្ឌលគិរី បើទោះបីជាខេត្តមួយនេះ មានដង់ស៊ីតេប្រជាជនទាប ការអភិវឌ្ឍន៍នៅមានកម្រិត ប៉ុន្តែស្មារតីរបស់មន្ត្រី និងលោកប្រធានមន្ទីរ បានពុះពារ គ្រប់ឧបសគ្គតាំងពីនៅ អាគារជួលគេ ដែលជាផ្ទះឈើតូចមួយ រហូតអាចសាងសង់អាគារ សម្រាប់មន្ត្រីធ្វើការ។
ជាងនេះទៀតសោត មន្ទីរឧស្សាហកម្ម វិទ្យាសាស្ត្របច្ចេកវិទ្យា និងនវានុវត្តន៍ ខ្វះខាតនូវធនធានមនុស្ស ប៉ុន្តែខេត្តមួយនេះ បានបញ្ចប់បេសកកម្មការងារដ៏ជោគជ័យ ដោយមានការគ្រប់គ្រងប្រព័ន្ធការងារ គ្រប់ទីតាំងណែនក្នុងដៃ ជាពិសេស គម្រោងប្រព័ន្ធទឹកស្អាត សម្រាប់ក្រុងសែនមនោរម្យ ទាំងអង្គភាពទឹកស្អាត និងមន្ទីរបានសហការគ្នាយ៉ាងល្អ ក្នុងការសម្រេចបាននូវផែនការផ្គត់ផ្គង់ទឹកស្អាត ដល់ប្រជាពលរដ្ឋប្រមាណជិត ២ពាន់ម៉ែត្រគីប ក្នុងមួយថ្ងៃ។
ឯកឧត្តមរដ្ឋមន្ត្រី ក៏បានបញ្ជាក់ និងជំរុញឲ្យមន្ទីរឧស្សាហកម្មវិទ្យាសាស្ត្របច្ចេកវិទ្យា និងនវានុវត្តន៍ ត្រូវបន្តយកចិត្តទុកដាក់ជួយសម្រួលការងារ និងអាជីវកម្មសហគ្រាសតូចធំ នៅក្នុងខេត្ត ឲ្យដំណើរការបានជាប្រក្រតី ជៀសវាងការប្រឈមកិច្ចការងាររដ្ឋបាល ដែលអាចបង្កការខាតបង់ ឬអាជីវកម្មរបស់ពួកគាត់ ត្រូវលើកទឹកចិត្តដល់អ្នកវិនិយោគ និងជួយសម្រួលដល់ការងារចាំបាច់ ដែលពួកគាត់ត្រូវការ។
លោក ស្វាយ សំអ៊ាង អភិបាលខេត្តមណ្ឌលគិរី បានថ្លែងថា គិតចាប់ពីឆ្នាំ១៩៩៨ ដល់ឆ្នាំ២០០០ វិស័យឧស្សាហកម្ម ស្ទើរតែគ្មានសកម្មភាព ក្នុងខេត្តមួយនេះ សូម្បីទឹកពិសាបរិសុទ្ធ ក៏ត្រូវនាំចូលមកពីបណ្ដាខេត្តនៅជិតខាង។ ប៉ុន្តែសម្រាប់សហគ្រាស និងសិប្បកម្មធុនតូច រហូតដល់សព្វថ្ងៃនេះ មានសិប្បកម្មនៅក្នុងខេត្ត រហូតដល់ ៤២៩ មូលដ្ឋាន ដែលជាការបញ្ជាក់ឲ្យឃើញពីភាពរីកចម្រើននៃវិស័យឧស្សាហកម្ម និងសិប្បកម្មក្នុងខេត្តមណ្ឌលគិរី មានការកើនឡើងពីមួយឆ្នាំទៅមួយឆ្នាំ ដែលជាការជួយជំរុញកំណើនសេដ្ឋកិច្ចនៅក្នុងស្រុក ក៏ដូចជាប្រទេសផងដែរ។ ម្យ៉ាងទៀត ដោយសារសក្កានុពលពីលើវិស័យឧស្សាហកម្ម និងសិប្បកម្ម ដែលកំពុងត្រូវយកចិត្តទុកដាក់ តាមរយៈគោលនយោបាយរបស់រដ្ឋាភិបាល។
លោក តូវ សុធារ៉ា ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យានិងនវានុវត្តន៍ ខេត្តមណ្ឌលគិរី ឲ្យដឹងថា សព្វថ្ងៃ មន្ទីរ មានផែនទីសន្ធិប្រភពទឹក ក្នុងខេត្ត ទីតាំងស្ថានីយផលិតទឹកស្អាត ដែលមានស្រាប់ និងទីតាំង ដែលមិនទាន់មាន ព្រមទាំងចំនួនស្ថិតិខ្នងផ្ទះប្រជាពលរដ្ឋ តាមភូមិស្រុកនីមួយៗ តាមប្រព័ន្ធ google ដើម្បីរៀបខ្លួន ជាស្រេច ក្នុងការផ្ដល់ទិន្និន័យ សម្រាប់វិនិយោគជាមួយវិស័យឯកជន ទៅលើការផ្គត់ផ្គង់ទឹកស្អាត។
ដោយឡែក រដ្ឋាករទឹកស្អាត ខេត្តមណ្ឌលគិរី បច្ចុប្បន្ន បាន និងកំពុងផ្គត់ផ្គង់ទឹកជូនប្រជាពលរដ្ឋចំនួន ១៦០០ ម៉ែត្រគីប ក្នុងមួយថ្ងៃ។ តែសមត្ថភាពផលិតទឹកស្អាត ក្នុងមួយថ្ងៃ ២០០០ ម៉ែត្រ។ ភ្ជាប់ទឹកស្អាតជូនប្រជាពលរដ្ឋ បាន ១៣៦៣ កុងទ័រទឹក ស្មើនឹង ៤២ភាគរយ ធៀបនឹងគ្រួសារ សរុប ៣២១៣ គ្រួសារ នៅទីរួមខេត្តមណ្ឌលគិរី៕ ដោយ៖ សាយ ករុណា
ចែករំលែកព័តមាននេះ