ខេត្តព្រះវិហារ ៖ ព្រះរាជអាជ្ញារងអមសាលាដំបូងខេត្តព្រះវិហារដឹកនាំសមត្ថកិច្ចជំនាញចុះបង្ក្រាបឈើខុសច្បាប់ជាង១០ម៉ែត្រគូប ដែលឈ្មួញទុច្ចរិតដឹកពីព្រៃប្រមូលយកមកស្តុកទុកនៅក្នុងភូមិអូរស្នៀត ឃុំតស៊ូ ស្រុកជ័យសែន ខេត្តព្រះវិហារ បម្រុងដឹកចេញទៅទីផ្សារខេត្តកំពង់ធំ ។
តាមការលើកឡើងរបស់លោក វុធ សាវី ព្រះរាជអាជ្ញារងនៃអយ្យការអមសាលាដំបូងខេត្តព្រះវិហារបានអោយដឹងថា ជុំវិញប្រតិបត្តិការចុះបង្ក្រាបឈើខុសច្បាប់នេះមានការចូលរួមពីកងកម្លាំងប្រដាប់អាវុធស្រុកជ័យសែន រួមជាមួយជំនាញរដ្ឋបាលព្រៃឈើធ្វើឡើងនៅរសៀល ថ្ងៃទី២០ ខែមករា ឆ្នាំ២០២១ នៅចំណុចភូមិអូរស្នៀត ឃុំតស៊ូ ស្រុកជ័យសែន ខេត្តព្រះវិហារ ។
សមត្ថកិច្ចជំនាញបានរឹបអូសវត្ថុតាងឈើប្រភេទលេខ១ ស្រឡៅ ចំនួន១៣៤សន្លឹក ស្មើនឹងជាង១០ម៉ែត្រគូប និងគោយន្តកន្ត្រៃដឹកឈើចំនួន៥គ្រឿងយកមករក្សាទុកនៅសង្កាត់រដ្ឋបាលព្រៃឈើជ័យសែន កសាងសំណុំរឿងបន្តតាមផ្លូវច្បាប់ ។
លោកបន្តថា វិធានការបន្ត ក្នុងនាមស្ថាប័នតុលាការ នឹងអនុវត្តប្រកបដោយតម្លាភាព និងមិនមានការលើកលែងចំពោះសកម្មភាពទាំងឡាយក្នុងការដឹកជញ្ជូន និងការកាប់បំផ្លាញព្រៃឈើជាដាច់ខាត ដើម្បីចូលរួមទប់ស្កាត់ និងការពារធនធានធម្មជាតិដែលនៅសេសសល់អោយនៅគង់វង្ស ។
នេះបើតាមសម្តីប្រជាពលរដ្ឋនៅក្បែរនោះបានអោយដឹងថា ឈ្មួញទុច្ចរិតជារៀងរាល់ថ្ងៃតែងតែបាន ដឹកជញ្ជូនឈើចេញពីព្រៃមកគរទុក និងខ្លះទៀតបានយកមកផ្ញើទុកនៅផ្ទះអ្នកភូមិ បន្ទាប់មកពួកគេបានប្រើប្រាស់រថយន្តសាំយ៉ុងកែច្នៃដឹកចេញនៅពេលយប់មិនញញើតសមត្ថកិច្ចឡើយ ៕
ចែករំលែកព័តមាននេះ