រាជធានីភ្នំពេញ ៖ បុរសម្នាក់មានជំងឺចុកផ្នែកក្រពះ ត្រូវបានប្រពន្ធនិងក្រុមគ្រួសារដឹកនាំយកទៅផ្ទះពេទ្យពិនិត្យពិគ្រោះព្យាបាល ដោយប្រើប្រាស់ថ្នាំដាក់សេរ៉ូម តាមរោគវិភាគ ដែលបានពិនិត្យមើលរួច គ្រាដែលដាក់សេរ៉ូម មិនទាន់អស់ផង គ្រូពេទ្យក៏កំពុងតាមដានបន្តសាម៉ីខ្លួនដឹងថា ស្រួលខ្លួនហើយ ទាំងក្រុមគ្រួសារ សុំគ្រូពេទ្យចេញទៅផ្ទះ ទោះជាគ្រូពេទ្យឲ្យយោបល់ រងចាំអស់ថ្នាំ អស់សេរ៉ូមសិន នៅតែខាងអ្នកជំងឺសុំវិលទៅផ្ទះ ក្នុងអំណះអំណាងបានធូរស្រាលហើយ ក៏នាំគ្នាគិតលុយចាកចេញទៅផ្ទះបាត់។
បានត្រឹម៣០នាទីក្រោយ បែជាជំងឺរើធ្វើទុក្ខ ចុកទ្រាំលែងបាន ក្រុមគ្រួសារនាំគ្នាដឹកវិលមកផ្ទះពេទ្យវិញ គាប់ជួនគ្រូពេទ្យមិននៅរវល់ចេញទៅស្រុកកំណើត ទើបក្រុមគ្រួសារដឹកដើររកពេទ្យ ចូលផ្ទះមួយគេមិនហ៊ានទទួល ចូលផ្ទះមួយទៀត ក៏គេមិនហ៊ានទទួល ក៏នាំគ្នាដឹកបញ្ជូនទៅមន្ទីរពេទ្យរុស្សី ។
គ្រាន់តែដល់ពេទ្យ ពិនិត្យ គ្រូពេទ្យប្រាប់ថាអ្នកជម្ងឺស្លាប់ហើយ ទើបនាំគ្នាឆោឡោ កើតទុក្ខមិនសុខចិត្ត ផ្ញើរសពនៅមន្ទីរពេទ្តរុស្សី រួចនាំគ្នាទៅប្តឹងសមត្ថកិច្ចប៉ុស្តិ៍ចោមចៅ៣ ឲ្យចុះសាកសួរនាំ ដល់ផ្ទះពេទ្យ តាមផ្លូវQMI ភូមិជម្ពូវ័ន២ សង្កាត់ចោមចៅ៣ ខណ្ឌពោធិសែនជ័យ ដោយដាក់ការសង្ស័យ គ្រូពេទ្យដាក់ថ្នាំលើសកម្រឹតទៅវិញ កាលពីរសៀលថ្ងៃទី២០ ខែមករា ឆ្នាំ២០២១ ។
ភាគីអ្នកជំងឺបានស្លា.ប់នៅមន្ទីរពេទ្យរុស្សី មានឈ្មោះ អឿន អ៊ី ភេទប្រុស អាយុ២៩ឆ្នាំ មុខរបរ ជាងតុទូ មានប្រពន្ធឈ្មោះ ខុម ស្រ៊ីម អាយុ២៩ឆ្នាំ មានកូនស្រីម្នាក់ អាយុទើបជាង១ខួប ស្នាក់នៅភូមិផ្ទះជួល ក្នុងភូមិព្រៃព្រីងជើង២ សង្កាត់ចោមចៅ៣ ខណ្ឌពោធិសែនជ័យ មានស្រុកកំណើត ភូមិខ្ចារ ឃុំបារាយណ៍ ស្រុកស្រីសន្ធរ ខេត្តកំពង់ចាម ។ អ្នកជម្ងឺបានស្លាប់ពេលក្រុមគ្រួសារ ដឹកតាមម៉ូតូកង់បីទៅមន្ទីរពេទ្យរុស្សី ។
តាមសម្តីស្ត្រីជាភរិយានៃស.ព បានឲ្យដឹងថា ប្តីរបស់គាត់ កាលពីវេលាម៉ោង៨ព្រឹកថ្ងៃទី២០ ខែមករា ឆ្នាំ២០២១ កើតមានអាការៈចុក ទ្រាំលែងបាន ក៏នាំគ្នាឌុបជូនទៅផ្ទះពេទ្យ មួយកន្លែង តាមផ្លូវបេតុងQMI ភូមិជម្ពូវ័ន២ សង្កាត់ចោមចៅ៣ ហើយគ្រូពេទ្យ ពិនិត្យ វិភាគរោគវិច័យ មានទាំងចេញឯកសារវិភាគរោគជំងឺប្រាប់ថាជំងឺក្រពះ ។
ហើយគ្រូពេទ្យដាក់ថ្នាំចាក់សេរ៉ូម រហូតដល់វេលាម៉ោង១០ព្រឹកថ្ងៃដដែល តែគ្រូពេទ្យប្រាប់ឲ្យអ្នកជម្ងឺ នៅដេក ដាក់សេរ៉ូម ឲ្យអស់សិនទៅ ងាយស្រួលតាមដានជម្ងឺបន្ត ក៏ប៉ុន្តែ សាម៉ីខ្លួន អ្នកជំងឺផ្ទាល់ រួមទាំងក្រុមគ្រួសារឃើញថា បាត់ចុកចាប់ ធូរស្រាលហើយ គិតលុយ អស់២៧៦០០០រៀល សុំពេទ្យចេញទៅផ្ទះទាំងមិនទាន់អស់សេរ៉ូម ទោះជាពេទ្យឃាត់ឲ្យរងចាំអស់សេរ៉ូមសិន ក៏នៅតែចាកចេញវិលទៅផ្ទះ បានត្រឹមតែ៣០នាទី ស្រាប់តែអាការៈជំងឺរើធ្វើទុក្ខ ចុក ទ្រាំលែងបាន លេបថ្នាំដែលពេទ្យឲ្យ១គ្រាប់ នៅតែមិនបាត់ចុក ។
ទ្រាំលែងបាន ក្រុមគ្រួសារដឹកនាំវិលទៅផ្ទះពេទ្យវិញ តែគាប់ជួនគ្រូពេទ្យជាប់រវល់ចាកចេញទៅខេត្តកំពតបាត់ មិនបានជួប ក៏នាំគ្នាដឹកជនរងគ្រោះតាមម៉ូតូកង់បី ទៅផ្ទះពេទ្យផ្សេងទៀត ទី១ គេមិនហ៊ានទទួល ទៅផ្ទះពេទ្យមួយទៀត ក៏គេមិនហ៊ានទទួល ក៏នាំគ្នានាំអ្នកជម្ងឺទៅមន្ទីរពេទ្យរុស្សី គ្រូពេទ្យពិនិត្យហើយបញ្ជាក់ថា អ្នកជម្ងឺបានស្លាប់ហើយ ទើបនាំគ្នាឆោឡោ កើតទុក្ខមិនសុខចិត្ត ផ្ញើសពនៅមន្ទីរពេទ្យ ត្រឡប់វិលទៅប្តឹងនគរបាលប៉ុស្តិ៍ចោមចៅ៣ ដើម្បីឲ្យជួយស្រាវស្រាវ ដោយដាក់ការសង្ស័យ គ្រូពេទ្យដាក់សេរ៉ូម ដាក់ថ្នាំលើសកម្រិត ។
ករណីខាងលើ មកដល់ល្ងាចថ្ងៃដដែលនេះ សមត្ថកិច្ចមូលដ្ឋាន សមត្ថកិច្ចជំនាញ ចុះទៅពិនិត្យសពដែលតំកល់ទុកនៅមន្ទីរពេទ្យរុស្សី និងទៅសាកសួរដល់ផ្ទះពេទ្យនៅភូមិជម្ពូវ័ន២ ដើម្បីស្វែងរកការពិត ។ បើតាមសម្តីលោកគ្រូវេជ្ជបណ្ឌិត ឈ្មោះ ជា ប្រាំង ជាម្ចាស់ទីតាំង ហើយក៏ជាអ្នកព្យាបាល អ្នកជំងឺបានប្រាប់ឲ្យដឹងតាមរយៈទូរស័ព្ទ បានឲ្យដឹងថា អ្នកជំងឺពិតជាចូលពិនិត្យ ពិគ្រោះ ព្យាបាល ជម្ងឺ នៅព្រឹកថ្ងៃទី២០ ខែមករា ឆ្នាំ២០២១ នៅផ្ទះគាត់មែន ពិនិត្យចេញឯកសាររោគវិច្ឆ័យជំងឺក្រពះ រួចគាត់ព្យាបាលទៅតាមរោគវិភាគរោគសញ្ញា អស់រយៈពេល២ម៉ោងក្រោយ ។
ពោលនៅវេលាម៉ោង១០ព្រឹកថ្ងៃដដែល អ្នកជំងឺមិនទាន់ទាំងអស់សេរ៉ូមផង ដឹងខ្លួនថាបាត់ចុកចាប់ ធូរស្រាលហើយ ក៏សុំគាត់ចេញទៅផ្ទះ ទោះជាឃាត់ឲ្យរងចាំសេរ៉ូបសិន ងាយស្រួលតាមដានបន្តសិន តែខាងអ្នកជម្ងឺនៅតែសុំវិលទៅផ្ទះ ក្នុងអំណះអំណាង បាត់ចុកហើយ គិតលុយអស់ជាង២០ម៉ឺនរៀល ។
លោកគ្រូវេជ្ជបណ្ឌិតបន្តទៀតថា ក្រោយពីឲ្យយោបល់ មិនតាម អ្នកជម្ងឺ ចាកចេញទៅបាត់ ដោយគាត់ជាប់រវល់ មានធុរៈ ក៏ចាកចេញទៅខេត្តកំពតបាត់ទៅ ស្រាប់តែមកដល់ល្ងាចថ្ងៃដដែលនេះ សមត្ថកិច្ច ភាគីក្រុមគ្រួសារ អ្នកជម្ងឺ ទូរស័ព្ទប្រាប់ថា បានស្លាប់នៅមន្ទីរពេទ្យរុស្សីទៅវិញ ។
ក្រោយកើតហេតុគ្រូពេទ្យតុលាការបានធ្វើការពិនិត្យដឹងថាជនរងគ្រោះស្លាប់ដោយសារ គាំងបេះដូង ព្រោះពេលជនរងគ្រោះទៅដល់ផ្ទះបានលួចបើកសេរ៉ូមឲ្យស្រក់លឿន ។ ពាក់ព័ន្ធនឹងករណីនេះខាងគ្រូពេទ្យដែលព្យាបាលខាងលើនេះបានជួយចូលបុណ្យចំនួន ២០០០ដុល្លារបញ្ចប់រឿង ៕
ចែករំលែកព័តមាននេះ