ប្រទេសចិន ៖ សហរដ្ឋអាមេរិកកាលពីថ្ងៃទី១៨មករា បានអំពាវនាវដល់ចិនអនុញ្ញាតឲ្យក្រុមអ្នកជំនាញការ របស់អង្គការសុខភាពពិភពលោកWHO ដែលមកកាន់ក្រុងវូហានស៊ើបអង្កេត លើប្រភពនៃការឆ្លងវីរុសCOVID-19 ឲ្យអាចសួរនាំបណ្ដាគ្រូពេទ្យព្យាបាល បណ្ដាអតីតអ្នកជំងឺនិងបណ្ដានិយោជិតមន្ទីរពិសោធន៍ ហើយឲ្យអាចប្រមូលបណ្ដាទិន្នន័យនិងគំរូវេជ្ជសាស្ត្រនានា។
សហរដ្ឋអាមេរិកដែលចោទប្រកាន់ចិនថាបានលាក់បាំងពីដំបូងទំហំនៃការឆ្លង បានទាមទារឲ្យមានតម្លាភាពក្នុងការស៊ើបអង្កេត របស់WHOហើយបានរិះគន់ បណ្ដាលក្ខខណ្ឌនៃទស្សនកិច្ចនេះ ដែលក្នុងអំឡុងពេលនោះបណ្ដាអ្នកជំនាញការចិនបានអនុវត្តដំណាក់កាលដំបូងនៃការស្រាវជ្រាវ។
លោកGARRETT GUGSBY អ្នកទទួលខុសត្រូវម្នាក់ នៃក្រសួងសុខាភិបាលអាមេរិក ដែលចូលរួមក្នុងកិច្ចប្រជុំមួយរបស់WHOថ្លែងថា ចិនត្រូវចែករំលែករាល់ការសិក្សាខាងវិទ្យាសាស្ត្រ បណ្ដាគំរូយកពីបណ្ដាសត្វ មនុស្សនិងបរិស្ថាន ដែលប្រមូលនៅក្រុងវូហាន ជាកន្លែងដែលវីរុសលេចដំបូងនៅទីនោះកាលពីដំណាច់ឆ្នាំ២០១៩។
ជាប្រតិកម្មតបវិញចំពោះសេចក្ដីថ្លែងការណ៍នោះ តំណាងចិនម្នាក់ថ្លែងថា បណ្ដាការសិក្សាលើប្រភពនៃវីរុស មានលក្ខណៈវិទ្យាសាស្ត្រ។ ការសិក្សាទាំងនោះចាំបាច់ត្រូវមានការសម្របសម្រួលគ្នានិងកិច្ចសហប្រតិបត្តិការមួយ។ យើងត្រូវបញ្ចប់រាល់ការគាបសង្កត់ខាងនយោបាយ។
ក្រុងអ្នកជំនាញការអន្តរជាតិមួយក្រុមរបស់WHO ទទួលបន្ទុកស៊ើបអង្កេតលើប្រភពនៃការឆ្លងវីរុសCOVID-19 បានទៅដល់ក្រុងវូហាន កាលពីថ្ងៃទី១៤មករាដែលនៅទីនោះ ពួកគេត្រូវធ្វើចត្តាឡីស័ក១៤ថ្ងៃ ហើយរៀបចំសន្និសីទតាមតេឡេខេនហ្វេរេន ជាមួយបណ្ដាសមភាគីចិន។
ជាង១ឆ្នាំហើយក្រោយលេចការឆ្លងវីរុសដំបូងនៅចិន របាយការណ៍មួយទៀតរបស់បណ្ដាអ្នកជំនាញការឯករាជ្យបានបន្ទោសថា បើចិននិងWHO អាចមានប្រតិកម្មដោយរហ័សនិងសកម្មបំផុតពីដំបូង នោះការឆ្លងរាលដាលខ្លាំងនឹងអាចទប់បាន។
ក្នុងរបាយការណ៍ទី២របស់ខ្លួន ក្រុមនោះនិយាយក្នុងកិច្ចប្រជុំមួយរបស់WHOថា គេនឹងអាចធ្វើសកម្មភាពបានរហ័សបំផុត ដោយផ្អែកលើបណ្ដាសញ្ញាដំបូងៗ និងថាបណ្ដាវិធានការទប់ស្កាត់ក៏នឹងអាចធ្វើបានភ្លាមៗដែរ ក្នុងគ្រប់ប្រទេស៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ