ខេត្តស្វាយរៀង ៖ មានគ្រួសារក្រីក្រមួយគួរឲ្យអាណិត ដែលមានកូនចំនួន៣នាក់សុទ្ធតែសភាពក្រិន ពិការដៃជើង ខ្នងគម និងត្រូវឪពុករត់ចោលទុកឲ្យស្ត្រីជាម្តាយចិញ្ចឹមបីបាច់ថែរក្សាម្នាក់ឯង ហើយកាលពី៨ខែមុននេះ ស្ត្រីជាម្តាយបានដួលបាក់ដៃម្ខាងទៀត ធ្វើឲ្យគ្រួសារមួយនេះកាន់តែជួបការលំបាកខ្វះស្បៀងអាហារចិញ្ចឹមកូនៗ ចំណែកកូនៗទាំង៣នាក់ចង់បន្តការសិក្សា ដើម្បីរកចំណេះដឹង មកប្រកបមុខរបរចិញ្ចឹមជីវិតផងដែរ។
នៅរសៀលថ្ងៃទី១៨ ខែមករា ឆ្នាំ២០២១នេះ ក្មេងពិការ៣នាក់បងប្អូនបានអំពាវនាវសុំក្តីមេត្តាពីលោកឧកញ៉ា លោកជំទាវ បងប្អូនសប្បុរសជន មេត្តាអាណិតជួយផ្តល់គ្រឿងឧបភោគ បរិភោគ និងប្រាក់កាស់ដើម្បីបន្តការសិក្សា ស្វែងរកចំណេះវិជ្ជាមកប្រកបមុខរបរចិញ្ចឹមជីវិតទៅមុខទៀត។
បើតាមស្ត្រីជាម្តាយឈ្មោះ ប្រាក់ មន្ថា អាយុ៥១ឆ្នាំ ជាស្ត្រីមេម៉ាយ រស់នៅភូមិកណ្តាល ឃុំខ្សែត្រ ស្រុកកំពង់រោទ៌ ខេត្តស្វាយរៀង បានប្រាប់ឲ្យដឹងថា គាត់មានប្តីឈ្មោះអ៊ុំ តេង អាយុ៤៦ឆ្នាំ មានកូន៣នាក់ជាចំណងដៃ ។ ក៏ប៉ុន្តែកូនទាំង៣នាក់អភ័ព្វណាស់កើតមកក្រិន ពិការគម ដៃជើងខ្វិនក្រងិញក្រង៉ង់គួរឲ្យអាណិតណាស់។
ស្ត្រីជាម្តាយបន្តថា កូនទី១-ឈ្មោះ តក់ ធារ៉ា ភេទស្រី អាយុ២៤ឆ្នាំ ពេលនាងកើតមកគឺមានសុខភាពធម្មតា លុះអាយុបាន៤ឆ្នាំស្រាប់តែមានអាការៈទន់ ហើយបានដួលបាក់ដៃ បាក់ជើងជាច្រើនកំណាត់ ចំណែករូបគាត់បានយកទៅព្យាបាលនៅមន្ទីរពេទ្យខេត្ត ក្រោយមកបានជា ស្រាប់តែឆ្អឹងដៃជើងកោងក្រង៉េងក្រង៉ង់ ក្រិនគមខ្នង លែងលូតកម្ពស់ ក្រិនតែម្តង។ លុះដល់អាយុ១៧ឆ្នាំបានសុំម្តាយទៅរៀនបានថ្នាក់ទី៥ ក៏ឈប់ដោយសារតែជីវភាពគ្រួសារខ្វះខាត។
ស្ត្រីជាម្តាយបន្តថា ទី២-ឈ្មោះ តក់ ធារី ភេទស្រី អាយុ២០ឆ្នាំ កើតមកសុខភាពធម្មតា លុះបានអាយុ៦ខែស្រាប់តែមានជំងឺចាប់ទន់ ឈឺច្រើន លុះបានអាយុ២ឆ្នាំទើបចេះដើរតេះតះ ក្រោយមកក៏ដួលបាក់ជើងកោងដៃ ក្រង៉េងក្រង៉ង់ពីបីកំណាត់តែម្តង ហើយក្រិនលែងធំ ដល់ពេលអាយុ១៥ឆ្នាំបានទៅរៀនមកដល់ឆ្នាំ២០២០បានថ្នាក់ទី៦ ហើយបានការឧបត្ថម្ភពីអង្គការ LAVALA នៅជិតក្រុងតាខ្មៅ ខេត្តកណ្តាល យកទៅឲ្យរៀនបន្តនៅក្រុងតាខ្មៅ។
ស្ត្រីជាម្តាយបន្តទៀតថា រីឯកូនទី៣-ឈ្មោះ តក់ រាត្រី ភេទប្រុស អាយុ១២ឆ្នាំ កើតមកភ្លាមមានសុខភាពល្អធម្មតា លុះបានអាយុ២ខែចាប់ផ្តើមទន់រហូតដល់អាយុ២ឆ្នាំស្រាប់តែក្រិន ហើយឆ្អឹងដុះមកទាញកោងបាក់ដៃ បាក់ជើងខ្វិញខ្វង់ ខ្នងគមតែម្តង ហើយបច្ចុប្បន្នអាយុ១២ឆ្នាំមិនទាន់បានទៅរៀននោះទេ។
ស្ត្រីជាម្តាយបន្តថា ចំណែកប្តីរបស់គាត់វិញឈ្មោះ អ៊ុំ តេង នៅពេលកូនទី៣ចាប់ផ្តើមមានជំអឺទន់ៗ ស្រាប់តែរត់ចោលគាត់និងកូនៗទៅតាមស្រីផ្សេងបាត់ បន្សល់ទុកឲ្យរូបគាត់ត្រូវចិញ្ចឹមបីបាច់ថែរក្សាកូនៗតែម្នាក់ឯងយ៉ាងលំបាកវេទនា ។ ហើយគាត់ក៏ចាប់ផ្តើមប្រកបមុខរបរបិតស្រា និងចិញ្ចឹមជ្រូក រួចលក់ដូរបន្តិចបន្ទួច ក៏ប៉ុន្តែមិនសូវមានម៉ូយទិញទេ ដោយសារតែផ្ទះរបស់គាត់នៅក្រោយឆ្ងាយពីគេ គ្មានផ្ទះអ្នកស្រុកច្រើន។ ក្រោយមកអង្គការជនពិការបានផ្តល់ប្រាក់ចំនួន២០០ដុល្លារតាមរយៈលោកស្រី សំ សំបាត់ ប្រធានសមាគមជនពិការស្រុកកំពង់រោទ៌ ដើម្បីធ្វើដើមទុនទិញអីវ៉ាន់ចាប់ហួយលក់ដូរផ្គត់ផ្គង់ជីវភាព។
ប្រភពដដែលបន្តថា ហើយនៅថ្ងៃទី១៥ ខែតុលា ២០២០កន្លងទៅ គាត់បានដើរដួលបាក់ដៃខាងស្តាំទៀតមិនអាចធ្វើអ្វីកើតឡើយ ទើបសូមអំពាវនាវសុំឲ្យសប្បុរសជនមេត្តាជួយឧបត្ថម្ភស្បៀងអាហារ អង្ករ ដើម្បីចិញ្ចឹមកូនៗបន្តទៀតផង។
ប្រភពដដែលបន្តទៀតថា ហើយនៅពេលមានវិបត្តិកូវីដ-១៩នេះ រាជរដ្ឋាភិបាលក៏បានផ្តល់ប្រាប់ឧបត្ថម្ភបាន៥ខែមកហើយ ដោយក្នុង១ខែទទួលបាន១៩២,០០០រៀល និងមានការជួយឧបត្ថម្ភពីកាកបាទក្រហមកម្ពុជា ព្រមទាំងអង្គការមនុស្សធម៌ខ្លះៗដែរ ក៏ប៉ុន្តែគ្រាន់តែជួយសម្រាលដល់ជីវភាពមួយគ្រាៗប៉ុណ្ណោះ។
បច្ចុប្បន្ននេះ ក៏ជួបការលំបាកក្នុងជីវភាព ហើយកូនៗចង់ទៅរៀន តែរូបគាត់គ្មានលទ្ធភាពឲ្យកូនអាយុ១២ឆ្នាំទៅរៀន និងកូនធំទៅរៀនបន្តទេ ណាមួយសាលាក៏នៅឆ្ងាយទៀត គ្មានអ្នករុញគាត់ឲ្យទៅរៀន ម្យ៉ាងជីវភាពក៏ក្រីក្រទៀត ដូច្នេះមានតែសុំសប្បុរសជនជួយផ្តល់ក្តីមេត្តាផងចុះ៕
ចែករំលែកព័តមាននេះ