រាជធានីភ្នំពេញ ៖ ប្រមុខដឹកនាំរាជរដ្ឋាភិបាលកម្ពុជា សម្ដេចតេជោ ហ៊ុន សែន បានប្រកាសថា សម្ដេចនឹងក្លាយជាបុគ្គលដំបូងគេបង្អស់ ដើម្បីចាក់វ៉ាក់សាំង ដែលជាជំនួយរបស់ប្រទេសចិន ដែលការសម្រេចចិត្តបែបនេះ គឺសម្តេចតេជោ ចង់បង្កើតនូវជំនឿទុកចិត្តលើវ៉ាក់សាំង និងជំរុញចលនាប្រយុទ្ធប្រឆាំងជំងឺកូវីដ-១៩ ។
សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសនៅព្រឹកថ្ងៃទី១៧ ខែមករា ឆ្នាំ២០២១នេះថា កាលពីរយៈពេល ២ថ្ងៃមុននេះ សម្តេចបានជម្រាបជូនមហាជន និងបងប្អូនជនរួមជាតិខ្មែរថា កម្ពុជាយើងនឹងទទួលពីសាធារណរដ្ឋប្រជាមានិតចិននូវជំនួយជាវ៉ាក់សាំងប្រឆាំងនឹងកូវីដ ១៩ ជាលើកដំបូងចំនួន១លានដូស។
សម្តេចបានមានប្រសាសន៍បន្តថា «ថ្ងៃនេះ ដើម្បីបង្កើតនូវជំនឿទុកចិត្តលើវ៉ាក់សាំងនិងជំរុញចលនាប្រយុទ្ធប្រឆាំងកូវីដ១៩ ខ្ញុំព្រះករុណា ខ្ញុំសូមប្រកាសថា វ៉ាក់សាំងដែលនឹងចាក់លើកទីមួយ និងមុនគេ គឺរូបខ្ញុំព្រះករុណាខ្ញុំនេះតែម្តង» ។
សម្តេចនាយករដ្ឋមន្ត្រីបានបញ្ជាក់បន្តថា ហេតុផលដែលសម្តេចនឹងក្លាយជាឥស្សរជនខ្មែរដំបូងគេបង្អស់នឹងចាក់វាក់សាំងកូវីដ ១៩ ជាជំនួយរបស់មហាមិត្តចិននោះ គឺថា «ខ្ញុំព្រះករុណាខ្ញុំត្រូវតែស្ថិតនៅខ្សែត្រៀមជួរមុខដែលជាទម្លាប់ធម្មតារបស់ខ្ញុំព្រះករុណាខ្ញុំរាប់សិបឆ្នាំមកហើយ» ។
ចែករំលែកព័តមាននេះ