រាជធានីភ្នំពេញ៖ សាលាដំបូងរាជធានីភ្នំពេញ នាព្រឹកថ្ងៃទី១៥ ខែមករា ឆ្នាំ២០២១ នេះ បានលើកយកសំណុំរឿងពាក់ពន្ធពីបទញុះញង់ បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ដែលបទល្មើសនេះ មានចែងក្នុងមាត្រា ៤៩៤ នឹង៤៩៥ នៃក្រមព្រហ្មទណ្ឌ។ សំណុំរឿងនេះ មានជនត្រូវចោទចំនួន ៤ នាក់ បាននាំមកឈរមុខរង្វង់ក្រចកសេះ ដើម្បីឲ្យអង្គសវនាការ សាកសួរដេញដោល។
សវនាការនេះ ដឹកនាំដោយលោក លិ សុខា ចៅក្រមជំនុំជម្រះ និងតំណាងអយ្យការ គឺលោក សេង ហៀង ព្រះរាជអាជ្ញារងអមសាលាដំបូងរាជធានីភ្នំពេញ។
សវនាការ បានធ្វើឡើងចំពោះមុខជនត្រូវចោទ ៤នាក់ មាន ១.លោក រ៉ុង ឈុន តំណាងក្រុមប្រឹក្សាឃ្លាំមើលកម្ពុជា ២.លោក សួង សុភណ្ឌ ៣.លោក តុល និមល និង៤.អ្នកស្រី ស កណិការ ដែលជនត្រូវចោទ សុទ្ធតែមានមេធាវីការពារក្តីរៀងខ្លួន។
សវនាការនេះ ក៏ចូលរួមតាមដានពីសំណាក់តំណាងអង្គទូត និងអង្គការសង្គមស៊ីវិលប្រមាណ ១៥ នាក់ និងអ្នកសារព័ត៌មាន ៥ នាក់ ផងដែរ។
លោក រ៉ុង ឈុន ប្រធានសហភាពសហជីពកម្ពុជា ត្រូវបានកម្លាំងសមត្ថកិច្ចនគរបាល រាជធានីភ្នំពេញ ចាប់ខ្លួននៅផ្ទះរបស់លោក កាលពីយប់ថ្ងៃសុក្រ ទី៣១ ខែកក្កដា ឆ្នាំ២០២០ បន្ទាប់ពីគណៈកម្មាធិការចម្រុះកិច្ចការព្រំដែនរបស់រាជរដ្ឋាភិបាល បានអំពាវនាវជាសាធារណៈ ឱ្យអាជ្ញាធរចាត់វិធានការចំពោះ លោក រ៉ុង ឈុន ដែលបានអត្ថាធិប្បាយ ជុំវិញទស្សនៈកិច្ចរបស់លោក ទៅកាន់ព្រំដែន រវាងប្រទេសកម្ពុជា និងប្រទេសវៀតណាម កាលពីថ្ងៃទី២០ ខែកក្កដា ឆ្នាំ២០២០។
លោក រ៉ុង ឈុន បានផ្ដល់បទសម្ភាសន៍ តាមវិទ្យុមួយ នៅមុនពេលមានការចាប់ខ្លួនលោកប៉ុន្មានម៉ោង ដោយបានបដិសេធលើការចោទប្រកាន់នេះថា រូបលោក បានចែករំលែកព័ត៌មានមិនពិត តាមរយៈសេចក្ដីថ្លែងការណ៍ ជាសាធារណៈមួយ ពាក់ព័ន្ធនឹងករណីប្រជាពលរដ្ឋលើកឡើងពីការបាត់បង់ដីនៅតាមបណ្ដោយព្រំដែន។
ក្រោយការចាប់ខ្លួនលោករ៉ុងឈុន ក៏មានក្រុមលោកសួងសុភ័ណ្ឌ បានចុះទៅពិនិត្យព្រំដែន ក្នុងខេត្តត្បូងឃ្មុំ នៅកន្លែងដែលលោករ៉ុងឈុន អះអាងថា ការបោះបង្គោលកំណត់ព្រំដែនរវាងកម្ពុជា និងវៀតណាម នាំឲ្យកម្ពុជាបាត់បង់ទឹកដី។ លោកសួងសុភ័ណ្ឌ ប្រធានគណបក្សនយោបាយមួយ ក៏បានអះអាងពីការបាត់ដីដូចគ្នានឹងលោករ៉ុងឈុនដែរ។
ដោយឡែក នៅក្រៅបរិវេណសាលាដំបូងរាជធានីភ្នំពេញ សមត្ថកិច្ចបានដាក់ពង្រាយកងកម្លាំងនគរបាល និងប្រជាការពារខណ្ឌ ៧មករា ដើម្បីរក្សាសន្តិសុខសណ្តាប់ធ្នាប់សាធារណៈ។
យ៉ាងណាក្តី ព្រឹត្តការណ៍ប្រមូលផ្តុំនៅមុខតុលាការនោះ គេបានឃើញវត្តមានលោក ឡៅ ម៉ុងហៃ អ្នកវិភាគឯករាជ្យ ដែលមានបំណង ចង់ចូលរួមស្តាប់សវនាការនោះដែរ។ ប៉ុន្តែដោយសារលោក ឡៅ ម៉ុងហៃ មិនបានដាក់ពាក្យស្នើសុំ និងមិនបានទាក់ទងទៅផ្នែករដ្ឋបាលសាលាដំបូងមុន ទើបឆ្មាំការពារតុលាការ មិនអនុញ្ញាតឲ្យចូល ដោយយោងទៅលើសាលប្រជុំ តូចចង្អៀត និងការពារការឆ្លងរាលដាលមេរោគកូវីដ.១៩។ លោក ឡៅ ម៉ុងហៃ ក៏មិនជំទាស់ ហើយបានវិលត្រឡប់ទៅវិញ។
ក្រៅពីនេះ នៅមានអ្នកមកគាំទ្រក្រុមលោក រ៉ុង ឈុន ប្រមាណ ២៥ នាក់។ ក្នុងនោះ មានក្រុមគ្រូបង្រៀនឯករាជ្យ ១២ នាក់ ហើយអ្វីមិនខាននោះ គឺក្រុមស្ត្រីអ្នកតវ៉ាថ្ងៃសុក្រ ប្រមាណ ១៣ នាក់ ក៏បានមកក្រវែលជុំវិញសាលាដំបូងដែរ។ ប៉ុន្តែត្រូវសមត្ថកិច្ចបំបែក និងដេញឲ្យទៅឆ្ងាយ មិនឲ្យរំខានដល់អង្គសវនាការ។
ក្រៅពីនោះ មានក្រុមសកម្មជនតវ៉ាសហគមន៍ថ្មគោល អ្នកឃ្លាំមើលអង្គការសិទ្ធិមនុស្ស ( UN ) ២នាក់ អង្គការលីកាដូ ២ នាក់ និងអ្នកសារព័ត៌មាន ក្នុងស្រុកប្រមាណ ៩នាក់ផងដែរ។
សវនាការ បានសាកសួរដេញដោលលើជនជាប់ចោទ តាមនីតិវិធី និងប្រព្រឹត្តទៅ ដោយតម្លាភាព រហូតដល់ម៉ោង ១១ និង៣០នាទីព្រឹក ត្រូវបានបញ្ចប់។
លោកចៅក្រមជំនុំជម្រះ បានប្រកាសលើកពេល ដោយបន្តសវនាការលើសំណុំរឿងនេះ ទៅថ្ងៃទី៣ ខែកុម្ភៈ ឆ្នាំ២០២១ ខាងមុខនេះ បន្តទៀត៕ ដោយ៖ ឃឹម ប៊ុនណាក់
ចែករំលែកព័តមាននេះ