ខេត្តកំពង់ធំ ៖ មានករណីបុរសម្នាក់សង្ស័យមកពីដឹកដើមត្រាវច្រើនពេក ដល់ពេលប្រឹងបើកម៉ូតូឡើងពីមាត់ប្រឡាយមិនរួច ទប់មិនជាប់ ក៏ជ្រុលធ្លាក់ប្រឡាយ ហើយត្រូវម៉ូតូនិងដើមត្រាវសង្កត់ពីលើ បណ្តាលឱ្យឈ្លក់ទឹកប្រឡាយបាត់បង់ជីវិតតែម្តង ។
ហេតុការណ៍ខាងលើបានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង៦និង៩នាទីយប់ថ្ងៃទី១៤ មករា ឆ្នាំ ២០២១ នៅចំណុចអាងទឹកជីវភាព ស្ថិតក្នុងភូមិជីវភាព ឃុំអណ្តូងពោធិ៍ ស្រុកតាំងគោក ខេត្តកំពង់ធំ ។
លោកវរសេនីយ៍ឯក សន តាល់ អធិការនគរបាលស្រុកតាំងគោក បានប្រាប់ឱ្យដឹងថា ជនរងគ្រោះឈ្មោះ ទឹម យ៉ាន់ ភេទប្រុស អាយុ៦២ឆ្នាំ រស់នៅភូមិបុស្សស្បែង ឃុំជ្រលង ស្រុកតាំងគោក ខេត្តកំពង់ធំ ។
បើតាមការឲ្យដឹងពីឈ្មោះ ហម ថុល ភេទប្រុស អាយុ៥៨ឆ្នាំ ជាប្រជាការពារនៅភូមិជីវភាព ឃុំអណ្តូងពោធិ បានប្រាប់ឱ្យដឹងថា នៅវេលាម៉ោងកើតហេតុខាងលើ មានក្មេងៗដែលដើរបេះផ្លែពុទ្រា្ធបានរត់មកប្រាប់គាត់ថា បានឃើញបុរសម្នាក់ជិះម៉ូតូមានដឹកដើមត្រាវធ្លាក់ចូលប្រឡាយទឹកនៅខាងត្បូងជាប់មាត់អាងភូមិជីវភាព ។ ភ្លាមនោះរូបគាត់ក៏នាំកំលាំងប្រជាការពារចំនួន៣នាក់ចុះទៅដល់កន្លែងកើតហេតុ ក៏ឃើញម៉ូតូនិងដើមត្រាវសង្កត់ពីលើបុរសម្នាក់លិចទៅក្នុងទឹកប្រឡាយ ចំណែកជើងនៅគងជាប់ម៉ូតូ ។ បន្ទាប់ពីឃើញហេតុការណ៍បែបនេះពួកគាត់ក៏នាំគ្នាចុះជួយទាញដើមត្រា និងលើកម៉ូតូចេញ រួចស្រង់បុរសរងគ្រោះមកដាក់លើគោក ប៉ុន្តែជាអកុសលជនរងគ្រោះបានដាច់ខ្យល់បាត់ទៅហើយ រួចក៏ទូរស័ព្ទរាយការណ៍ប្រាប់សមត្ថកិច្ចឱ្យចុះមកពិនិត្យកន្លែងកើតហេតុ ។
ក្រោយពេលទទួលបានព័ត៌មានខាងលើនេះភ្លាម សមត្ថកិច្ចជំនាញបានសហការជាមួយប៉ុស្តិ៍រដ្ឋបាលអណ្តូងពោធិ៍ នឹងអាជ្ញាធរភូមិ-ឃុំ ព្រមទាំងគ្រួសារសពបានចុះទៅដល់កន្លែងកើតហេតុ ដើម្បីពិនិត្យសព រកពុំឃើញមានស្លាកស្នាមអ្វីគួរអោយកត់សម្គាល់ឡើយ គឺជនរងគ្រោះបានបាត់បង់ជីវិតដោយសារលង់ទឹក រីឯមូលហេតុ គឺមកពីជនរងគ្រោះជិះម៉ូតូមានដឹកដើមត្រាវច្រើនពេក លុះដល់ពេលបើកម៉ូតូប្រឹងឡើងពីមាត់ប្រឡាយមិនរួច ហើយទប់មិនជាប់ ក៏ជ្រុលធ្លាក់ចូលប្រឡាយ ហើយត្រូវម៉ូតូនិងដើមត្រាវសង្កត់ពីលើ បណ្តាលឱ្យឈ្លក់ទឹកបាត់បង់ជីវិតតែម្តង ។
បន្ទាប់ពីពិនិត្យរួច សមត្ថកិច្ចក៏ប្រគល់សពជនរងគ្រោះជូនក្រុមគ្រួសារដើម្បីយកធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ