រាជធានីភ្នំពេញ ៖ ករណីជនសង្ស័យជាមន្ត្រីនគរបាលមួយរូបបាញ់ប៉ុនប៉ងសម្លាប់បុរសម្នាក់នៅចំណុចហាងចាក់សាក់មួយកន្លែង ស្ថិតតាមបណ្តោយផ្លូវ៣៧១ ក្នុងសង្កាត់បឹងទំពុន២ ខណ្ឌមានជ័យ តាំងពីថ្ងៃទី៩ ខែធ្នូ ឆ្នាំ២០២០ ដោយជនរងគ្រោះរងរបួសជើងនោះ…
រាជធានីភ្នំពេញ ៖ ករណីជនសង្ស័យជាមន្ត្រីនគរបាលមួយរូបបាញ់ប៉ុនប៉ងសម្លាប់បុរសម្នាក់នៅចំណុចហាងចាក់សាក់មួយកន្លែង ស្ថិតតាមបណ្តោយផ្លូវ៣៧១ ក្នុងសង្កាត់បឹងទំពុន២ ខណ្ឌមានជ័យ តាំងពីថ្ងៃទី៩ ខែធ្នូ ឆ្នាំ២០២០ ដោយជនរងគ្រោះរងរបួសជើងនោះ គិតត្រឹមបច្ចុប្បន្ននេះ ជនរងគ្រោះពុំទាន់ទទួលបានពន្លឺយុត្តិធម៌នៅឡើយនោះទេ ខណៈខ្មាន់កាំភ្លើងត្រូវបានស្គាល់អត្តសញ្ញាណ តែនៅពុំទាន់មានការចាប់ឃាត់ខ្លួន ។
ជនរងគ្រោះក្នុងអំពើបាញ់ប្រហារនេះមានឈ្មោះ ឈ្មោះ ប៊ុន ស៊ីម អាយុ៣៩ឆ្នាំ ។ ចំណែកខ្មានកាំភ្លើងមានឈ្មោះ កេត ផារ៉ែន មានវ័យប្រហាក់ប្រហែលនឹងជនរងគ្រោះជាមន្ត្រីនគរបាល ថ្នាក់វរសេនីយ៍ទោ ( សក្តិ៤កន្លះ ) ។
ជុំវិញករណីបាញ់ខាងលើនេះលោកវរសេនីយ៍ទោ គឹម កល្យាណ អធិការរងនគរបាលខណ្ឌមានជ័យទទួលផែនយុត្តិធម៌អោយដឹងថា ៖ សុំណុំរឿងនេះ ជនរងគ្រោះបានដាក់ពាក្យបណ្តឹងប្តឹងមន្ត្រីនគរបាលជាខ្មាន់កាំភ្លើងរួចមកហើយតាំងពីថ្ងៃកើតហេតុ ហើយបច្ចុប្បន្នសុំណុំរឿងនេះកំពុងស្ថិតនៅដៃនគរបាលខណ្ឌដែលកំពុងអនុវត្តតាមនីតិវិធីច្បាប់ ។
លោកអធិការបន្តថា នគរបាលបានចេញលិខិតកោះហៅ ជនសង្ស័យអោយចូលខ្លួន ដើម្បីសាកសួររួចមកហើយ តាមរយយៈកាលបរិច្ឆេទកំណត់របស់មន្ត្រីជំនាញ ។ ក្នុងករណីដែលជនសង្ស័យមិនចូលតាមការកោះហៅ កម្លាំងនគរបាលនឹងស្រាវជ្រាវឈានទៅចាប់ឃាត់ខ្លួន ។
លោកបន្ថែមថា មូលហេតុដែលនគរបាលចេញលិខិតអញ្ចើញអោយចូលខ្លួន មុនធ្វើការចាប់ខ្លួន ដោយសារករណីនេះបានផុតពីបទល្មើសជាក់ស្តែង ព្រោះក្រោយការបាញ់ប្រហារ ជនបង្កបានរត់គេចបាត់ស្រមោល ដូច្នេះហើយសមត្ថកិច្ចត្រូវអនុវត្តតាមនីតិវិធីច្បាប់ដោយត្រូវអញ្ចើញអោយចូលខ្លួនមុនឈានដល់ការចាប់ ។ អ្វីជាការកត់សម្គាល់នោះ គិតតាំងពីថ្ងៃកើតហេតុមកទល់នឹងពាក់កណ្តាលខែមករា ឆ្នាំ២០២១នេះ គឺមានរយៈជាង១ខែហើយ ដែលនគរបាល ពុំទាន់មានការចាប់ខ្លួន មន្ត្រីនគរបាលជាខ្មាន់កាំភ្លើងយកមកផ្តន្ទាទោស ដើម្បីជាពន្លឺយុត្តិធម៌សម្រាប់ជនរងគ្រោះ ដែលត្រូវគេប៉ងសម្លាប់ ។
មហាជនរងចាំមើលថា តើខ្មាន់កាំភ្លើងជាមន្ត្រីនគរបាលរូបនោះនៅបន្តអាចរត់គេចរួចខ្លួនបានរហូត ឬយ៉ាងណា ក្រោយការបាញ់ប្រហារប៉ុនប៉ងសម្លាប់មនុស្សហើយនោះ ?
គួរបញ្ជាក់ថា តាមការអះអាងអោយដឹងពីជនរងគ្រោះ គឺនៅមុនពេលកើតហេតុគាត់មានគ្នា៤នាក់ ជិះម៉ូតូ២គ្រឿង ចេញពីញាំអីនៅម្ដុំបឹងត្របែក រួចបានជូនមិត្តភក្តិមកផ្ទះ នៅកន្លែងកើតហេតុ ( ផ្លូវ៣៧១ ) ។ លុះមកដល់មុខផ្ទះមួយភ្លេត ស្រាប់តែលេចមុខជនដៃដល់ ( ដែលធ្លាប់ស្គាល់គ្នាតែមិនសូវជិតស្និត ) បានចុះពីលើរថយន្តមិនចាំម៉ាក ហើយដើរឆ្លងផ្លូវមកសួរនាំមិត្តភក្តិគាត់ រួចក៏ដើរទៅជិះរថយន្តរបស់ខ្លួនវិញ ហើយជនដៃដល់បានបើកកញ្ចក់រថយន្តដកកាំភ្លើងខ្លីបាញ់សំដៅមកលើជនរងគ្រោះដែលនៅផ្លូវម្ខាងទៀតចំនួន២គ្រាប់ ដោយមួយគ្រាប់ចំជើងខាងស្ដាំ និងមួយគ្រាប់ទៀតចំទ្វាកញ្ចក់មួយផ្ទាំងបែកខ្ទេច រួចក៏បើករថយន្តគេចខ្លួនបាត់ស្រមោលតែម្តងទៅ ។
បន្ទាប់ពីត្រូវរងរបួសហើយនោះ ជនរងគ្រោះត្រូវបានមិត្តភក្តិដឹកទៅកាន់មន្ទីរពេទ្យដើម្បីពិនិត្យ និងលាងរបួស ។ ក្រោយលាងរបួសរួច រូបគេ និងមិត្តភក្តិបានត្រឡប់ទៅកន្លែងកើតហេតុវិញនឹងបានប្តឹងសមត្ថកិច្ចអោយចុះអន្តរាគមន៍ ទើបបង្កអោយមានការភ្ញាក់ផ្អើលតែម្តងទៅ ៕
ចែករំលែកព័តមាននេះ