ប្រទេសកូរ៉េខាងត្បូង ៖ យោងតាម YONHAP ថា តុលាការកំពូលកូរ៉េខាងត្បូងបញ្ជាក់កាលពីថៃ្ងទី១៤ មករា ពីការកាត់ទោសដាក់ពន្ធនាគារដល់២០ឆ្នាំ ប្រឆាំងអតីតប្រធានាធិបតីដែលត្រូវទម្លាក់ពីតំណែងលោកស្រី PARK GEUN HYE ក្នុងរឿងពុករលួយមួយដែលនាំឲ្យកក្រើកប្រទេស ។ រឿងនោះនាំទៅដល់ការដកតំណែងលោកស្រីកាលពីឆ្នាំ២០១៧ ។
ការបញ្ជាក់ពីទោសនោះរបស់តុលាការកំពូលកូរ៉េខាងត្បូងជាការបញ្ចប់សវនាការកាត់ទោស ប្រើពេលច្រើនឆ្នាំមួយ ។ ក្នុងសវនាការស្ដីពីការកាត់ទោសនេះក្រោយការតវ៉ាទៅសាលាឧទ្ធរណ៍របស់បណ្ដារដ្ឋអាជ្ញាប្រឆាំងការសម្រេចមួយកាលពីខែកក្កដា ដែលកាត់បន្ថយទោសលោកស្រី
PARK តុលាការកំពូលរបស់ប្រទេសបានរក្សាសាលក្រមកាត់ទោសដដែល ហើយក៏រួមមាន
ការពិន័យជាទឹកប្រាក់ដល់ទៅ១៨ពាន់លានវ៉ុន ប្រមាណជា១៥លានដុល្លារ និងសម្រេចលុបចោលការចោទប្រកាន់មួយផ្នែកប្រឆាំងលោកស្រី PARK ពីបទរំលោភបំពានអំណាច និងការចោទប្រកាន់មួយពីបទគម្រាមកំហែងយកប្រាក់។
លោកស្រី PARK នឹងត្រូវជាប់ទោសដាក់ពន្ធនាគារសរុប២២ឆ្នាំរួមនឹងទោសមួយជាប់គុក២ឆ្នាំសម្រាប់ការកាត់ទោសលោកស្រីកាលពីឆ្នាំ២០១៨ ពីបទជ្រៀតជ្រែកដោយខុសច្បាប់ចូលក្នុងដំណើរការតែងតាំងរបស់គណបក្សSAENURI ដែលកាន់អំណាចនាសម័យកាលនោះ ។
សាលដីកាចុងក្រោយនាថ្ងៃទី១៤ មករា របស់តុលាការកំពូលបានបញ្ចប់រឿងអាស្រូវនយោបាយដ៏ធំមួយរបស់ប្រទេស ក្រោយ៣ឆ្នាំនិង៩ខែនៃការចោទប្រកាន់លើកដំបូងប្រឆាំងលោកស្រីPARK ចំពោះរឿងពុករលួយនោះ ៕ ដកស្រង់ចេញពីវេបសាយ ៖ yna
ចែករំលែកព័តមាននេះ