រាជធានីភ្នំពេញ ៖ សន្តិសុខយាមឃ្លាំងម្នាក់បានដេកលក់មួយភាំង ក៏ងើបទៅបត់ជើងតូចស្រាប់តែប្រទះឃើញជនសង្ស័យ៣នាក់ចូលទៅលួចយកអាគុយចំនួន២ បង្កឱ្យមានការភ្ញាក់ផ្អើលដល់សមត្ថកិច្ចចុះជួយដេញចាប់ ប៉ុន្តែជនសង្ស័យរត់គេចខ្លួនបាត់ស្រមោល ហេតុការណ៍នេះបានកើតឡើងកាលពីម៉ោង2រំលងអធ្រាត្រឈានចូលថ្ងៃទី14 ខែមករា ឆ្នាំ2021 តាមបណ្តោយផ្លូវ201 នៅចំណុចឃ្លាំងមួយកន្លែង ស្ថិតក្នុងសង្កាត់គីឡូម៉ែត្រលេខ៦ ខណ្ឌឬស្សីកែវ ។
បើតាមសាក្សីនៅកន្លែងកើតហេតុបានឱ្យដឹងថា មុនពេលកើតហេតុ បុរសជាសន្តិសុខយាមនៅឃ្លាំងកើតហេតុខាងលើមានឈ្មោះ សង សារ៉េត អាយុ30ឆ្នាំ ស្នាក់នៅម្តុំគីឡូម៉ែតលេខ6 គាត់គឺជាសន្តិសុខយាមនៅឃ្លាំងនេះរយៈពេល៣ខែមកហើយ បានដេកលក់មួយភាំង ក៏ភ្ញាក់ដឹងខ្លួនរួចងើបទៅបត់ជើងតូច ក៏ស្រាប់តែប្រទះឃើញជនសង្ស័យ៣នាក់មិនស្គាល់អត្តសញ្ញាណនោះទេ ជិះម៉ូតូមួយគ្រឿងម៉ាកហុងដាឌ្រីម មិនចាំសេរី និងស្លាកលេខ លួចចូលឃ្លាំងស្តុបសម្ភារៈ និងចតរថយន្តក្រុង។
សាក្សីបន្តថា ខណៈពេលសន្តិសុខប្រទះឃើញបែបនេះ ជនសង្ស័យបានរត់ទៅសង្ងំនៅដើមស្វាយ ចំណែកសន្តិសុខក៏បានរាយការណ៍ទៅសមត្ថកិច្ចប៉ុស្តិ៍គីឡូម៉ែតលេខ6 ដើម្បីចុះមកជួយរុករកអស់រយៈពេលជិតមួយម៉ោង ប៉ុន្តែរកមិនឃើញជនសង្ស័យនោះទេ ។
បើតាមសន្តិសុខបានបញ្ជាក់ថា របស់របរដែលបាត់ គឺអស់អាគុយចំនួន2 ហើយជនសង្ស័យខាងលើនេះ តែងតែមកលួចនៅក្នុងឃ្លាំងខាងលើនេះជាច្រើនដងមកហើយ ប៉ុន្តែតាមមិនដែលទាន់សោះ ។
ក្រោយពេលកើតហេតុ សន្តិសុខខាងលើរង់ចាំព្រឹកស្អែក ទៅដាក់ពាក្យបណ្តឹងនៅប៉ុស្តិ៍គីឡូម៉ែតលេខ៦ ដើម្បីតាមស្រាវជ្រាវចាប់ជនសង្ស័យមកផ្តន្ទាទោសទៅតាមផ្លូវច្បាប់ ៕
ចែករំលែកព័តមាននេះ