រាជធានីភ្នំពេញ ៖ បុរសម្នាក់បើករថយន្តម៉ាក Mazada BT5 មួយគ្រឿង ធ្វើដំណើរតាមដងផ្លូវបានឃើញគេលក់តុក្កតានៅតាមចិញ្ចើមផ្លូវស្អាតៗ ក៏ឈប់រថយន្ដចុះទិញ ដោយមិនបានពន្លត់ម៉ាស៊ីនរថយន្តឡើយ ស្រាប់តែត្រូវជនសង្ស័យចិត្តសឿងម្នាក់ឡើងបើករថយន្តយកទៅទាំងផ្លូវកំពុងតែកកស្ទះចរាចរណ៍…
រាជធានីភ្នំពេញ ៖ បុរសម្នាក់បើករថយន្តម៉ាក Mazada BT5 មួយគ្រឿង ធ្វើដំណើរតាមដងផ្លូវបានឃើញគេលក់តុក្កតានៅតាមចិញ្ចើមផ្លូវស្អាតៗ ក៏ឈប់រថយន្ដចុះទិញ ដោយមិនបានពន្លត់ម៉ាស៊ីនរថយន្តឡើយ ស្រាប់តែត្រូវជនសង្ស័យចិត្តសឿងម្នាក់ឡើងបើករថយន្តយកទៅទាំងផ្លូវកំពុងតែកកស្ទះចរាចរណ៍ បង្កជាការភ្ញាក់ផ្អើលដល់ប្រជាពលរដ្ឋ និងម្ចាស់រថយន្តនាំគ្នាជិះដេញតាមពីក្រោយរហូតដល់ស្តុបត្រឡោកបែក ផ្លូវ598 ក៏ត្រូវជនសង្ស័យឈប់រថយន្ដទុកចោល រួចចុះរត់គេចខ្លួនបាត់ស្រមោល។ ហេតុការណ៍ភ្ញាក់ផ្អើលនេះ បានកើតឡើងកាលពីវេលាម៉ោង8និង30នាទីយប់ ថ្ងៃទី13 ខែមករា ឆ្នាំ2021 នៅតាមបណ្ដោយផ្លូវលេខ598 ចំណុចស្តុបត្រឡោកបែក សង្កាត់បឹងកក់2 ខណ្ឌទួលគោក ។
យោងតាមប្រភពពីម្ចាស់រថយន្តរងគ្រោះសុំមិនបង្ហាញឈ្មោះ ជិះរថយន្តម៉ាក Mazada BT50 ពណ៌ទឹកប្រាក់ ពាក់ស្លាកលេខ រដ្ឋ 13 2-2688 បានប្រាប់ឱ្យដឹងថា មុនកើតហេតុ គឺរូបគាត់កំពុងបើករថយន្តធ្វើដំណើរតាមដងផ្លូវម៉ៅសេទុងក្នុងទិសដៅពីត្បូងទៅជើង លុះមកដល់ចំណុចស្តុបថៃប៊ុនរ៉ុង ក៏ឃើញគេលក់តុក្កតាតាមចិញ្ចើមផ្លូវស្អាតៗពេក ក៏ឈប់រថយន្ដចុះទៅរកទិញតុក្កតានោះ ដោយមិនបានពន្លត់ម៉ាស៊ីនរថយន្តនោះទេ ព្រោះគាត់គិតថា រថយន្ដនៅជិតខ្លួនដែរ ។
ម្ចាស់រថយន្តបន្តថា ខណៈពេលរវល់តែរើសតុក្កតា ភ្លេចខ្លួនក៏មានជនសង្ស័យម្នាក់ចិត្តសឿងបានឡើងបើករថយន្តលួចយកចេញទៅទាំងចរាចរណ៍កំពុងតែកកស្ទះ ភ្លាមៗនោះ រូបគាត់ក្រឡេកឃើញទាន់ក៏ស្រែកថា «ចោរៗ» ផ្អើលអស់ប្រជាពលរដ្ឋនៅជិតនោះ និងសមត្ថកិច្ចនាំគ្នាជួយជិះម៉ូតូប្រដេញតាមពីក្រោយ រហូតមកដល់ចំណុចស្តុបត្រឡោកបែក ជនសង្ស័យក៏បានឈប់រថយន្ដ រួចចុះរត់គេចខ្លួនបាត់ស្រមោលបន្សល់ទុកតែរថយន្ត បង្កឱឱ្យមានការភ្ញាក់ផ្អើលពេញដងផ្លូវតែម្តង។
ក្រោយពេលកើតហេតុ រថយន្ដខាងលើ ត្រូវបានសមត្ថកិច្ចនាំទៅកាន់អធិការដ្ឋានខណ្ឌទួលគោក និងសួរនាំជនរងគ្រោះ ដើម្បីធ្វើកំណត់ហេតុ រួចប្រគល់រថយន្ដឱ្យម្ចាស់រថយន្តវិញ និងទទួលពាក្យបណ្តឹងពីជនរងគ្រោះ ដើម្បីស្វែងរកជនសង្ស័យមកដាក់ទោសតាមផ្លូវច្បាប់ ៕
ចែករំលែកព័តមាននេះ