ខេត្តពោធិ៍សាត់ ៖ កម្មករ-កម្មការិនីរាប់ពាន់នាក់ ដែលបម្រើការងារនៅក្នុងរោងចក្រកាត់ដេរតៃអុីហ្ស៊ី ស្រុកក្រគរ ខេត្តពោធិ៍សាត់ កាលពីរសៀលថ្ងៃទី១២ ខែមករា ឆ្នាំ២០២១ បាននាំគ្នាធ្វើបាតុកម្មបិទផ្លូវជាតិលេខ៥…
ខេត្តពោធិ៍សាត់ ៖ កម្មករ-កម្មការិនីរាប់ពាន់នាក់ ដែលបម្រើការងារនៅក្នុងរោងចក្រកាត់ដេរតៃអុីហ្ស៊ី ស្រុកក្រគរ ខេត្តពោធិ៍សាត់ កាលពីរសៀលថ្ងៃទី១២ ខែមករា ឆ្នាំ២០២១ បាននាំគ្នាធ្វើបាតុកម្មបិទផ្លូវជាតិលេខ៥ បង្កការស្ទះមិនអាចធ្វើចរាចរណ៍ទៅមកបាន ដើម្បីទាមទារឲ្យថៅកែរោងចក្របើកប្រាក់បំណាច់ឆ្នាំ និងប្រាក់៥% ដល់ពួកគេខិតខំធ្វើការកន្លងមកនេះ ។
កម្មករ កម្មការិនីនិយាយថា ពួកគេបានខិតខំធ្វើការខ្លាំងណាស់ដើម្បីទទួលបានប្រាក់បំណាច់ឆ្នាំនិងប្រាក់៥% ប៉ុន្តែមកដល់ពេលនេះខាងថៅកែរោងចក្រមិនទាន់បើកឲ្យទេ ម្ដងថាថ្ងៃនេះម្ដងថាថ្ងៃនោះ ធ្វើឲ្យពួកគេអស់ជំនឿក៍នាំគ្នាធ្វើបាតុកម្មតែម្ដង ដើម្បីរកដំណោះស្រាយ ។
ករណីបាតុកម្មនេះបានធ្វើឲ្យស្ទះចរាចរណ៍ពេញផ្លូវជាតិលេខ៥ ត្រង់ចំណុចខាងមុខរោងចក្រតែម្ដង ហើយកម្លាំងសមត្ថកិច្ចបានធ្វើអន្តរាគមន៍ ប៉ុន្តែកម្មករ កម្មការិនីនៅតែមិនដកថយដរាបណាមិនមានភ្លើងខៀវឲ្យពួកគេស្ងប់ចិត្ត ។ ក្នុងស្ថានភាពដ៏តានតឹងនេះ បន្ទាប់ពីទទួលបានដំណឹងភ្លាម ឯកឧត្តម ម៉ៅ ធនិន ក្នុងនាមអាជ្ញាធរដែនដីខេត្ត បានចុះទៅពន្លត់ជាបន្ទាន់ដោយមិនទុកឲ្យភ្លើងបាតុកម្មអហិង្សាឆាបឆេះ អូសបន្លាយនោះទេ។
នៅចំពោះមុខថ្នាក់ដឹកនាំមន្ទីរជំនាញ និងសមត្ថកិច្ច ខាងតំណាងក្រុមហ៊ុនរោងចក្រកាត់ដេរតៃអុីហ្ស៊ី បានសុំពន្យារពេលដល់ថ្ងៃទី១៨ ខែមករា ឆ្នាំ២០២១ទើបបើកជូន ប៉ុន្តែខាងកម្មករ កម្មការិនីមិនជឿ ព្រោះលើកពេលជាច្រើនដងមកហើយ ។
ដោយធ្លាប់ធ្វើប៉ាវចិនក្នុងការកាត់ក្ដី ដោះស្រាយរាល់ការវិវាទ និងសម្របសម្រួលបញ្ហាជូនប្រជាពលរដ្ឋក្នុងខេត្តពោធិ៍សាត់រាប់មិនអស់មកហើយនោះ ឯកឧត្តម ម៉ៅ ធនិន បានសម្រេចសម្របសម្រួលឲ្យខាងក្រុមហ៊ុន បើកប្រាក់ខែដំណាច់ឆ្នាំនិងប្រាក់៥% ជូនកម្មករ កម្មការិនីនៅថ្ងៃទី១៥ ខែមករា ឆ្នាំ២០២១ នេះ ហើយបើបើកមិនទាន់សូមបន្តបើកនៅថ្ងៃបន្ទាប់ទៀត ។
ខាងក្រុមហ៊ុនបានយល់ព្រមតាមការសម្របសម្រួលរបស់ឯកឧត្តមអភិបាលខេត្ត ពេលនោះកម្មករ កម្មការិនីបានទះដៃទទួលយកទាំងអស់គ្នាបញ្ចប់ការតវ៉ាត្រឹមនោះទៅ ៕
ចែករំលែកព័តមាននេះ