ប្រទេសឥណ្ឌូណេស៊ី ៖ អ្នកនាំពាក្យម្នាក់របស់កងម៉ារីនឥណ្ឌូណេស៊ីថ្លែងកាលពីថ្ងៃទី១២ មករាថា អាជ្ញាធរឥណ្ឌូណេស៊ីស្រង់បានហើយនូវប្រអប់ខ្មៅមួយក្នុងចំណោមប្រអប់ខ្មៅ២នៃយន្តហោះដែលធ្លាក់ក្នុងសមុទ្រកាលពីថ្ងៃទី៩ មករា ។
អ្នកនាំពាក្យរូបនោះលោក FAJAR TRI ROHADI បញ្ជាក់ប្រាប់រ៉យទ័រថា ប្រអប់ខ្មៅនោះត្រូវបានបញ្ជូនមកកាន់កំពង់ផែក្រុងហ្សាការតា ។ ចំណែករដ្ឋមន្ត្រីដឹកជញ្ជូនឥណ្ឌូណេស៊ី លោក
BUDI KARYA SUMADI និយាយថា ប្រអប់ខ្មៅនោះថតបណ្ដាទិន្នន័យនៃការហោះហើរ ។
យន្តហោះធុនប៊ូអ៊ីង737-500 របស់ក្រុមហ៊ុនអាកាសចរណ៍ SRIWIJAYA AIR ដែលដឹកមនុស្ស៦២នាក់ ក្នុងនោះមានសមាជិកក្រុមយានិក១២នាក់ បានធ្លាក់ក្រោយហោះចេញពីព្រលានយន្តហោះសំខាន់ក្រុងហ្សាការតាបាន៤នាទី ។ យន្តហោះនោះត្រូវហោះទៅកាន់ក្រុងPONTIANAK ទីប្រជុំជនខេត្តកាលីម៉ាន់តាន់ខាងលិចលើកោះប័រណេអូ ពេលបាត់ការទាក់ទងជាមួយប៉ុស្តិ៍ត្រួតពិនិត្យអាកាស ។
បណ្ដាបំណែកសាកសពមនុស្សត្រូវបានរកឃើញទៀតនាថ្ងៃទី១២ មករា ក្នុងតំបន់កើតមានគ្រោះមហន្តរាយនោះ ក៏ដូចជារបស់របរផ្ទាល់ខ្លួនរបស់អ្នកដំណើរមានកាបូបដែលដាក់អត្តសញ្ញាណប័ណ្ណជាដើម ។ នោះជាគ្រោះមហន្តរាយអាកាសដ៏ចម្បងមួយនៅឥណ្ឌូណេស៊ីចាប់តាំងពីការធ្លាក់យន្តហោះធុនប៊ូអ៊ីង 737 MAX នៃក្រុមហ៊ុនអាកាសចរណ៍ LION AIR បណ្ដាលឲ្យមនុស្សបាត់បង់ជីវិត១៨៩នាក់កាលពីឆ្នាំ២០១៨មក ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ