ខេត្តព្រៃវែង ៖ លោក ហោ ម៉េងគី និងលោក ផាត ម្ចាស់អាជីវកម្មជីកកាយដឹកជញ្ជូនអាចម៌ដីលក់នៅក្នុងភូមិព្រៃខ្លា ឃុំកំពង់សឹង ស្រុកព្រះស្តេច…
ខេត្តព្រៃវែង ៖ លោក ហោ ម៉េងគី និងលោក ផាត ម្ចាស់អាជីវកម្មជីកកាយដឹកជញ្ជូនអាចម៌ដីលក់នៅក្នុងភូមិព្រៃខ្លា ឃុំកំពង់សឹង ស្រុកព្រះស្តេច ខេត្តព្រៃវែង បើទោះបីជាអាជ្ញាធរមូលដ្ឋានបានធ្វើការណែនាំជាច្រើនលើកច្រើនសារយ៉ាងណាក៏ដោយ ក៏ម្ចាស់អាជីវកម្មទាំងពីរនេះ ហាក់បីដូចជាមិនខ្លាចញញើត និងគោរពអនុវត្តតាមអាជ្ញាធរបន្តិចសោះឡើយ។
ដោយប្រើប្រាស់រថយន្តតូច-ធំជាច្រើនគ្រឿង ខ្លះមានស្លាកលេខ ខ្លះអត់មានស្លាកលេខ សម្រុកដឹកជញ្ជូនអាចម៌ដីយ៉ាងគគ្រឹកគគ្រេងគ្មានពេលវេលាសម្រាកថ្ងៃត្រង់ ហើយដាក់ហៀរៗទ្រុង អត់ក្របវេចខ្ចប់អោយបានត្រឹមត្រូវ ថែមទាំងបើកបរលឿនៗ បណ្តាលឱ្យជ្រុះធ្លាក់អាចម៌ដីរប៉ាត់រប៉ាយពាសពេញលើដងផ្លូវកៅស៊ូជាតិលេខ១ ឡើងហុយទ្រលោមបង្កការប៉ះពាល់ដល់សុខភាពមនុស្សផ្នែកផ្លូវដង្ហើមយ៉ាងធ្ងន់ធ្ងរ ជាពិសេសអាចប្រឈមកើតមានករណីគ្រោះថ្នាក់ចរាចរណ៍ដោយយថាហេតុចំពោះអ្នកធ្វើដំណើរទៀតផង។
បើតាមប្រភពព័ត៌មានបានបង្ហើបឱ្យដឹងកាលពីថ្ងៃទី១២ ខែមករា ឆ្នាំ២០២១នេះថា ត្រង់ចំណុចលោក ហោ ម៉េងគី និងលោក ផាត ដណ្តើមគ្នាដាក់គ្រឿងចក្រ (អាអ៊ិច) ៤ទៅ៥គ្រឿង ជីកកកាយយកអាចម៌ដីដឹកជញ្ជូនលក់យូរឆ្នាំមកហើយនេះ គឺជាដីចំណីទន្លេតូច និងដីបឹងព្រៃខ្លាសម្បត្តិសាធារណៈរបស់រដ្ឋមានទំហំរាប់សិបហិកតា។
ចុះហេតុអ្វីបានជាលោក ហោ ម៉េងគី និងលោក ផាត មកធ្វើសកម្មភាពជីកកាយយកអាចម៌ដីរបស់រដ្ឋដឹកជញ្ជូនលក់យ៉ាងអនាធិបតេយ្យធ្វើមានបានផលប្រយោជន៍បុគ្គលឯកជនទៅវិញ…?
មិនតែប៉ុណ្ណោះ ថែមទាំងកាត់ដែកស្លាកសញ្ញាចំណាំងរបស់ជប៉ុនដែលដាក់បញ្ជៀសកុំឱ្យកើតមានករណីគ្រោះថ្នាក់ចរាចរណ៍ នៅចំណុចផ្លូវកោងប្រហែលប្រវែងរាប់រយម៉ែត្រ ដើម្បីបើកយកផ្លូវឱ្យឡានដឹកអាចម៌ដីឡើងទៀតផង។
ហើយចំពោះរណ្តៅដីវិញ ជីកមានជម្រៅជ្រៅធំៗដូចរន្ធបាយខុម ធ្វើឱ្យពលរដ្ឋមានការព្រួយបារម្ភជាខ្លាំងពីអាយុជីវិតកូនចៅតូចៗ និងសត្វគោក្របីរបស់ពួកគាត់ដើរធ្លាក់រណ្តៅមរណៈនេះ ប្រាកដជាមិនរស់នោះទេ។
ពាក់ព័ន្ធបញ្ហានេះ លោក សួន សុម៉ាលីន អភិបាលរងខេត្តព្រៃវែង បានប្រាប់ឱ្យដឹងតាមទូរស័ព្ទថា រូបលោកពុំទាន់បានដឹងទេ ចាំចាត់ក្រុមការងារចុះទៅពិនិត្យមើល។
ចំណែកលោក ថន់ ទ្រី ប្រធានការិយាល័យរ៉ែ នៃមន្ទីររ៉ែ និងថាមពលខេត្តព្រៃវែង បានបញ្ជាក់អះអាងថា ការចេញអាជ្ញាប័ណ្ណឱ្យម្ចាស់អាជីវកម្មទាំង២នាក់ខាងលើ គឺយោងទៅតាមដីគាត់មានប្លង់ទំហំជាង១០ហិកតាតាំងពីឆ្នាំ២០១៨មកម្ល៉េះ ដោយច្បាប់តម្រូវឱ្យជីកជម្រៅត្រឹមតែ៥ម៉ែត្រទេ។
រីឯការដឹកជញ្ជូនអត់ក្របបង្កការប៉ះពាល់លើផ្លូវសាធារណៈនេះ លោក ភុន សម្ភស្ស អភិបាលស្រុកព្រះស្តេច ក៏ធ្លាប់បានប្រាប់ភ្នាក់ងារយើងឱ្យដឹងកន្លងមកថា លោកបានធ្វើការណែនាំដល់ម្ចាស់អាជីវកម្មទាំងពីរនេះ ច្រើនលើកច្រើនសារហើយ តែពួកគេនៅតែមិនព្រមស្តាប់សោះ ។
ព័ត៌មានបន្ថែមមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ