រាជធានីភ្នំពេញ៖ ដើមឈើធំៗ មានអាយុកាលជាង ៣០០ឆ្នាំ ​នៅលើសួនកាណាឌីយ៉ា ផ្លូវភ្លោះមុខមន្ទីរពេទ្យព្រះអង្គឌួង ដោយសារពុកផុយគល់​ និង​ទ្រេតចំនួន ៣ដើម អាជ្ញាធរភ្នំពេញគ្រោងកាប់ចេញ នៅសប្តាហ៍ក្រោយ។

​​ដើមឈើធំៗជាច្រើនដើមនៅលើសួនកាណាឌីយ៉ា ឬផ្លូវភ្លោះមុខមន្ទីរពេទ្យអង្គឌួង ស្ថិតក្នុងខណ្ឌដូនពេញ មានអាយុកាលជាង ៣០០ឆ្នាំហើយ។ ក្នុងចំនួននេះ ដើមឈើប្រភេទដើមគ្រាប់បែក ចំនួន ៣ដើម ត្រូវបានអាជ្ញាធររាជធានីភ្នំពេញ ដោយមានការឯកភាពពីក្រសួងកសិកម្ម រុក្ខាប្រមាញ់ និងនេសាទ គ្រោងនឹងកាប់យកចេញ នៅសប្តាហ៍ក្រោយនេះ។ មូលហេតុ ដោសារតែដើមឈើទាំង ៣ដើមនោះ ពុកគល់ ប្រហោងក្នុង បើទុកយូរទៅ អាចបង្កគ្រោះថ្នាក់​។

លោក សំ សាមុត ប្រធានអង្គភាពសួនច្បារ និងរុក្ខជាតិនៃមន្ទីរសាធារណការ និងដឹកជញ្ជូន រាជធានី​ភ្នំពេញ បានឱ្យដឹង នៅព្រឹកថ្ងៃ០៨ មករានេះថា ដើមឈឺធំៗ នៅសួនកាណាឌីយ៉ា មុខពេទ្យព្រះអង្គឌួងនេះ មានចំនួនប្រមាណ ៥០ដើម និងមានអាយុកាល ប្រមាណជាជាង ៣០០ឆ្នាំមកហើយ។ ​ក្រោយពីកាប់យកចេញ​នូវដើមឈើពុកគល់ និងទ្រេត ៣ដើមនោះហើយ អាជ្ញាធររាជធានីភ្នំពេញ នឹងដាំដើមឈើថ្មីជំនួសវិញ។ ចំណែកដើមឈើ ដែលនៅសល់ ក្រៅពីបីដើមនេះ អង្គភាពរបស់លោក នឹងកាត់គ្រី (លះមែកចេញ) ផងដែរ ដើម្បីកាត់​បន្ថយទម្ងន់ដើមឈើ ហើយក៏ជាការលើកសោភណ្ឌភាពរាជធានីភ្នំពេញ ឲ្យកាន់តែមានសោភ័ណភាពស្រស់បំព្រងផងដែរ​។

លោក សំ សាមុត បាន​ឱ្យ​ដឹង​ទៀតថា សម្រាប់ដើមឈើ នៅរមណីយដ្ឋានវត្តភ្នំវិញ មានប្រមាណជា ៨០០ដើម ហើយដើមឈើទាំងនេះ ភាគច្រើន មានអាយុកាល​ប្រមាណជាង ៥០០ឆ្នាំហើយ ក្រោមការមើលថែទាំជាប្រចាំពីអាជ្ញាធររាជធានីភ្នំពេញ។

គួររំលឹកថា​ រាជធានីភ្នំពេញ បានកសាងលើកដំបូង នៅក្នុងសតវត្សរ៍ទី១៥ ក្នុងអំឡុងរជ្ជកាលព្រះបាទស្រីសុរិយោព័រ (ពញាយ៉ាត) នៅពេលដែល​ព្រះ​អង្គ បានបោះបង់ចោលរាជធានីអង្គរ ហើយបានមកសាងសង់រាជធានីថ្មី​មួយទៀត នៅទួលបាសាន ក្នុងខេត្តស្រីសឈរ ដែលសព្វថ្ងៃ​ ជាស្រុកស្រីសន្ធរ ខេត្តកំពង់ចាម​។ ព្រះអង្គ បានគង់នៅទីនោះ បាន​តែមួយឆ្នាំគត់ដោយ​សារតែមាន​ទឹកជំនន់រាល់រដួវវស្សា ព្រះអង្គបានផ្លាស់ប្តូររាជធានី ហើយបានមកសាងសង់រាជធានីថ្មីមួយទៀត តាមបណ្តោយមាត់ទន្លេចតុមុខ (ទន្លេមុខបួន) នៅក្នុងឆ្នាំ​១៤៣៤ ដែលសព្វថ្ងៃជា​រាជធានីភ្នំពេញនេះតែម្តង៕ ដោយ៖ ចន ណារិទ្ធ​