ខេត្តស្វាយរៀង ៖ បន្ទាប់ពីទទួលបានព័ត៌មានពីកាសែតកោះសន្តិភាពដែលបានចុះផ្សាយ និងក្រុមកាកបាទក្រហមឃុំ អនុសាខាកាកបាទក្រហមកម្ពុជាស្រុកស្វាយជ្រំ អំពីការលំបាកក្នុងជីវភាពប្រចាំថ្ងៃរបស់លោកយាយ ប៉ក់ យ៉េត អាយុ៨៤ឆ្នាំ មានប្អូនស្រីឈ្មោះប៉ក់ យ៉ត អាយុ៨២ឆ្នាំមានជំងឺប្រចាំកាយ និងកូនស្រីឈ្មោះ ប៉ក់ រ៉ន អាយុ៥២ឆ្នាំ មានជំងឺសតិមិនគ្រប់ ហើយកាលពីមុនពួកគាត់រស់នៅជាមួយកូនប្រុសម្នាក់ គ្រាន់ជាលំនឹង ប៉ុន្តែកូនប្រុសទើបតែបាត់បង់ជីវិតដោយសារតែគ្រោះថ្នាក់ចរាចរណ៍។
បើតាមការឲ្យដឹងពីអាជ្ញាធរឃុំកន្លងមក មានសប្បុរសជនកាកបាទក្រហម ក្រុមការងារ អ្នកជិតខាងតែងតែបានជួយជាបន្តបន្ទាប់ ហើយនៅក្នុងដំណាក់កាលកូវីដ១៩ ពួកគាត់ក៏បានទទួលថវិកាពីរាជរដ្ឋាភិបាលតាមរយៈប័ណ្ណសម្មធម៌ ប្រភេទក្រ១ ផងដែរ។
លុះនៅថ្ងៃទី៦ ខែមករា ឆ្នាំ២០២១ នេះ លោក ម៉ែន វិបុល ប្រធានគណៈកម្មាធិការសាខាកាកបាទក្រហមកកម្ពុជាខេត្តស្វាយរៀង ក៏បានចាត់ឲ្យក្រុមការងារសាខាដឹកនាំដោយលោកជំទាវ ពៅ សុភាព ហេរញ្ញឹកគណៈកម្មាធិការសាខា និងសហការី នាំយកអំណោយមនុស្សធម៌របស់សាខាផ្តល់ជូនក្រុមគ្រួសារលោកយាយនៅភូមិព្រៃខ្លា ឃុំពោធិរាជ ស្រុកស្វាយជ្រំ ។
នាឱកាសនោះដែរ លោកជំទាវ ពៅ សុភាព បានពាំនាំនូវប្រសាសន៍ផ្តាំផ្ញើសាកសួរសុខទុក្ខ និងក្តីនឹករលឹកពីសំណាក់សម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលសម្តេចតែងតែគិតគូរដល់សុខទុក្ខប្រជាពលរដ្ឋគ្រប់ស្រទាប់វណ្ណ: ដោយមិនប្រកាន់ពណ៌សម្បុរ ពូជសាសន៍ និន្នាការនយោបាយអ្វីឡើយ ស្របតាមពាក្យស្លោក «ទីណាមានទុក្ខលំបាក ទីនោះមានកាកបាទក្រហមកម្ពុជា» ។
លោកជំទាវ ក៏បានផ្តាំផ្ញើបន្ថែមដល់បងប្អូនប្រជាពលរដ្ឋទាំងអស់ សូមមានការប្រុងប្រយ័ត្នខ្ពស់បំផុតក្នុងការថែរក្សាសុខភាព ហើយកត្តាដែលសំខាន់នោះ គឺការរស់នៅត្រូវប្រកាន់យកនៅការរស់នៅស្អាត ពិសារទឹកដាំពុះ ហូបស្អាត សម្អាតបរិស្ថានជុំវិញផ្ទះ ណែនាំកូនចៅឲ្យគោរពច្បាប់ចរាចណ៍ គេងក្នុងមុងដើម្បីការពារជំងឺ គ្រុនឈាម ហើយត្រូវដាំដំណាំ ចិញ្ចឹមសត្វ ដើម្បីផ្គត់ផ្គង់ជីវភាពប្រចាំថ្ងៃ ជាពិសេស សូមក្រើនរម្លឹកដល់ប្រជាពលរដ្ឋនៅតាមមូលដ្ឋានកុំឲ្យធ្វេសប្រហេសពីជំងឺកូវីដ១៩ នេះឱ្យសោះ ត្រូវអនុវត្តន៍តាមការណែនាំ របស់ក្រសួងសុខាភិបាល ព្រោះមួយរយៈពេលដ៏ខ្លីនេះ មានករណីឆ្លងថ្មីទៀតដោយជំងឺដ៏កាចសាហាវមួយនេះ នៅក្នុងប្រទេសយើង។
ចំណែកអំណោយដែលបានផ្តល់ជូនទាំង២គ្រួសារ ក្នុង១គ្រួសារទទួលបាន ៖ អង្ករ៣០គីឡូក្រាម, មី១កេស, ត្រីខ១០កំប៉ុង, ទឹកស៊ីអ៊ីវ១យួរ, កន្ទេលបត់១, មុង១, ភួយ១, សារុង១, ក្រម៉ា១ និងថវិកា១០០,០០០រៀលផងដែរ។
គួររំលឹកថា ៖ ជីវិតវេទនាអ្វីម្ល៉េះ! លោកយាយ៨៤ឆ្នាំតស៊ូចិញ្ចឹមប្អូនស្រី និងកូនស្រីមានជំងឺទៀត៕
ចែករំលែកព័តមាននេះ