ពង្រឹងការធ្វើចត្តាឡីស័ក ចំពោះពលករវិលត្រឡប់ពីបរទេស
- ព្រះវិហារ
ព្រះវិហារ៖ នៅថ្ងៃទី០៣ ខែមករា ឆ្នាំ២០២១ លោក គោស៊ុំ ប៊ុនសឿត អភិបាលរង ខេត្តព្រះវិហារ បានអញ្ជើញដឹកនាំក្រុមការងារ…
ព្រះវិហារ៖ នៅថ្ងៃទី០៣ ខែមករា ឆ្នាំ២០២១ លោក គោស៊ុំ ប៊ុនសឿត អភិបាលរង ខេត្តព្រះវិហារ បានអញ្ជើញដឹកនាំក្រុមការងារ…
ព្រះវិហារ៖ នៅថ្ងៃទី០៣ ខែមករា ឆ្នាំ២០២១ លោក គោស៊ុំ ប៊ុនសឿត អភិបាលរង ខេត្តព្រះវិហារ បានអញ្ជើញដឹកនាំក្រុមការងារ ចុះជួបសំណេះសំណាល និងពង្រឹងការធ្វើចត្តាឡីស័ក នៅតាមបណ្ដាស្រុកចំនួន ៥ រួមមាន ស្រុកឆែប ស្រុកជ័យសែន ស្រុករវៀង ស្រុកសង្គមថ្មី និងស្រុកគូលែន ខេត្តព្រះវិហារ។
នាឱកាសនោះ លោក គោស៊ុំ ប៊ុនសឿត អភិបាលរងខេត្តព្រះវិហារ បាននាំនូវការផ្ដាំផ្ញើសាកសួរសុខទុក្ខពីសំណាក់លោកអភិបាលខេត្ត ព្រមទាំងបានថ្លែងកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់មន្រ្តីសុខាភិបាល និងអាជ្ញាធរមូលដ្ឋាន ដែលលះបង់កម្លាំងកាយចិត្តបំពេញបេសកកម្ម ប្រយុទ្ធប្រឆាំងនឹងជំងឺកូវីដ-១៩ យ៉ាងជោគជ័យ នាពេលកន្លងមក។
លោកអភិបាលរង ក៏បានផ្តាំផ្ញើដល់មន្ត្រីប្រចាំការ ត្រូវបន្តការយកចិត្តទុកដាក់ក្នុងការបំពេញភារកិច្ច និងអាជ្ញាធរក្រុង-ស្រុក ត្រូវខិតខំប្រមូលព័ត៌មានពាក់ព័ន្ធនឹងបងប្អូនប្រជាពលរដ្ឋដែលត្រឡប់មកពីក្រៅប្រទេស ធ្វើយ៉ាងណាណែនាំផ្សព្វផ្សាយនិងតម្រូវឱ្យពួកគាត់មកសម្រាកធ្វើចត្តាឡីស័កនៅមណ្ឌលអោយបានត្រឹមត្រូវ និងទាន់ពេលវេលា។
ក្នុងនោះដែរ លោកអភិបាលរងខេត្ត ក៏បានផ្តាំផ្ញើឱ្យបងប្អូនប្រជាពលរដ្ឋ ដែលត្រឡប់មកពីក្រៅប្រទេស ត្រូវចូលរួមអនុវត្តដោយធ្វើចត្តាឡីស័ក រយៈពេល ១៤ ថ្ងៃ តាមវិធានការការពាររបស់ក្រសួងសុខាភិបាល ក៏ដូចជារាជរដ្ឋាភិបាល ក្នុងការចូលរួមទប់ស្កាត់ការរីករាលកូវីដ-១៩ ហើយត្រូវមានការជឿជាក់លើក្រុមគ្រូពេទ្យ និងអាជ្ញាធរក្រុង ស្រុក និងខេត្ត ក្នុងការការពារសុវត្ថិភាព និងសុខភាពរបស់បងប្អូន។
លោកអភិបាលរងខេត្ត ក៏បានផ្តល់ជូនថវិកា ដល់បងប្អូន ដែលសម្រាក នៅមណ្ឌលចត្តាឡីស័ក ទាំង ៥មណ្ឌល ចំនួន ០៤នាក់ ក្នុងម្នាក់ៗ ថវិកាចំនួន ០៣ម៉ឺនរៀល។ សម្រាប់មន្រ្តីប្រចាំការនៅមណ្ឌលចត្តាឡីស័ក ៥៧នាក់ ក្នុងម្នាក់ៗ ថវិកា ០៣ម៉ឺនរៀល។ ដោយឡែកនាយកសាលា មន្ត្រីនគរបាលការពារ និងសម្រួលចរាចរណ៍ទាំង ០៥ទីតាំង ចំនួន ៣០នាក់ ក្នុងម្នាក់ៗ ថវិកាចំនួន ០២ម៉ឺនរៀល៕ ដោយ៖ ទ្រី វិច្ឆិកា
ចែករំលែកព័តមាននេះ