តាមការគ្រោងទុក សម្តេចតេជោនាយករដ្ឋមន្ត្រី ហ៊ុន សែន នឹងថ្លែងសារពិសេសនៅម៉ោង៩ព្រឹកថ្ងៃទី២៩ ខែធ្នូ ឆ្នាំ២០២០ ពីភូមិគ្រឹះរបស់សម្តេច នៅក្រុងតាខ្មៅ ខេត្តកណ្តាល…
តាមការគ្រោងទុក សម្តេចតេជោនាយករដ្ឋមន្ត្រី ហ៊ុន សែន នឹងថ្លែងសារពិសេសនៅម៉ោង៩ព្រឹកថ្ងៃទី២៩ ខែធ្នូ ឆ្នាំ២០២០ ពីភូមិគ្រឹះរបស់សម្តេច នៅក្រុងតាខ្មៅ ខេត្តកណ្តាល ដោយមានការផ្សាយផ្ទាល់តាមទូរទស្សន៍ជាតិ ។ សម្តេចតេជោ នឹងប្រកាសបិទបញ្ចប់ព្រឹត្តិការណ៍ឆ្លងកូវីដ នៅសហគមន៍ ថ្ងៃ២៨ វិច្ឆិកា ។ ក្រៅពីនោះសម្តេចតេជោ ហ៊ុន សែន ក៏នឹងលើកឡើងនូវចំណុចសំខាន់ៗផ្សេងទៀត នៅក្នុងឆ្នាំចាស់ ឆ្នាំ២០១៩ ផ្លាស់ចូលឆ្នាំថ្មី ឆ្នាំ២០២១ផងដែរ ។
នៅចាំបានថា កាលពីថ្ងៃទី១៥ ខែធ្នូ ឆ្នាំ២០២០ សម្តេចតេជោ នាយករដ្ឋមន្ត្រី ហ៊ុន សែន បានថ្លែងសារពិសេសម្តងរួចមកហើយ អំពីជោគជ័យរបស់កម្ពុជា ក្នុងការគ្រប់គ្រងបាននូវព្រឹត្តការណ៍ឆ្លងជំងឺកូវីដក្នុងសហគមន៍ថ្ងៃ២៨វិច្ឆិកា នៅកម្ពុជា ដែលជាករណីឆ្លងជំងឺកូវីដ១៩ ចូលសហគមន៍នៅប្រទេសកម្ពុជាយើង ជាលើកដំបូង ។ តែកាលណោះ សម្តេចតេជោលើកឡើងថា យើងគ្រប់គ្រងបាន ប៉ុន្តែមិនទាន់អាចបិទបញ្ចប់បានទេ ត្បិតមានអ្នកពាក់ព័ន្ធ ត្រូវបានរកឃើញជាបន្តបន្ទាប់ ហើយអ្នកធ្វើតេស្ត និងធ្វើចត្តាឡីស័កក៏នៅមានជាបន្តបន្ទាប់ ។
ក៏ប៉ុន្តែលើកនេះអស់ការសង្ស័យទៀតហើយ ព្រោះក្រសួងសុខាភិបាល បានប្រកាសនៅព្រឹកថ្ងៃទី២៨ ខែធ្នូនេះថា មានអ្នកសះស្បើយពីជំងឺកូវីដ១៩ ចំនួន៤នាក់ទៀត ក្នុងនោះម្នាក់ពាក់ព័ន្ធព្រឹត្តិការណ៍សហគមន៍២៨វិច្ឆិកា ។ រីឯ៣នាក់ទៀតជាអ្នកដំណើរចូលមកកម្ពុជា។
ក្រសួងសុខាភិបាលក៏បានប្រកាសថា នៅថ្ងៃទី២៧ ខែធ្នូ ឆ្នាំ២០២០ វិទ្យាស្ថានប៉ាស្ទ័រកម្ពុជា បានធ្វើវិភាគវត្ថុសំណាកដែលទទួលបានចំនួន៨សំណាក ពាក់ព័ន្ធនឹងព្រឹត្តិការណ៍សហគមន៍ ២៨វិច្ឆិកា គឺមានលទ្ធផលអវិជ្ជមានវីរុសកូវីដ១៩ទាំងអស់ ។
ជាសរុបអ្នកជំងឺកូវីដ១៩ ដែលបានរកឃើញពាក់ព័ន្ធព្រឹត្តិការណ៍សហគមន៍២៨វិច្ឆិកា គិតពីថ្ងៃទី២៨ ខែវិច្ឆិកា ឆ្នាំ២០២០ ដល់ថ្ងៃទី២៧ ខែធ្នូ ឆ្នាំ២០២០ មានចំនួន៤១នាក់ (ស្រី១៩នាក់ និងប្រុស២២នាក់) ។ ក្នុងចំនួននេះ មានអ្នកជាសះស្បើយ សរុប៣៨នាក់ (ស្រី១៨នាក់ និងប្រុស២០នាក់) ហើយគិតមកដល់ព្រឹកថ្ងៃទី២៨ ខែធ្នូ ឆ្នាំ២០២០ ។
ដោយឡែក បើគិតក្នុងក្របខណ្ឌទូទាំងប្រទេស រហូតដល់ព្រឹកថ្ងៃទី២៨ ខែធ្នូ ឆ្នាំ២០២០ ក្រសួងសុខាភិបាល បានរកឃើញអ្នកឆ្លងកូវីដ១៩ សរុបចំនួន៣៦៤នាក់ ។ ក្នុងនោះ៣៦០នាក់ ត្រូវបានព្យាបាលជាសះស្បើយ និង៤នាក់ កំពុងសម្រាកព្យាបាលនៅមន្ទីរ ។
ទន្ទឹមនឹងជោគជ័យ ដែលឈានដល់ការប្រកាសបិទបញ្ចប់ព្រឹត្តិការណ៍សហគមន៍២៨វិច្ឆិកា គឺពាក់ព័ន្ធរលកបារម្ភថ្មីពីការឆ្លងរាលដាលជំងឺកូវីដ១៩ មកពីប្រទេសថៃ ក៏កម្ពុជាបានគ្រប់គ្រងហ្មត់ចត់ មិនថា នៅតាមព្រំដែនគោកជាមួយប្រទេសថៃ ឬក៏របូតមកដល់មូលដ្ឋានភូមិឃុំនោះទេ ។
ពលករខ្មែរយើង ចាប់តាំងពីថ្ងៃអាទិត្យ ទី២០ ខែធ្នូ ឆ្នាំ២០២០ រហូតដល់ថ្ងៃទី២៨ ខែធ្នូ ឆ្នាំ២០២០ មានតែជាង១០០០នាក់ទេ ដែលបានឆ្លងដែនចេញពីប្រទេសថៃ ចូលមកកម្ពុជា ។ មកដល់ព្រំដែន ពួកគេត្រូវបានត្រួតពិនិត្យសុខភាព និងនាំយកទៅធ្វើចត្តាឡីស័ក ដោយយកចិត្តទុកដាក់របស់អាជ្ញាធរសមត្ថកិច្ចចម្រុះកម្ពុជា នៅច្រកព្រំដែនទាំងអស់នោះ។
ក្នុងនោះ ក៏មានសេចក្តីរាយការណ៍ថា មានអ្នកលួចរត់ចេញពីកន្លែងធ្វើចត្តាឡីស័ក និងលោតចុះពីឡាន ប្រមាណ៦នាក់ ហើយរកឃើញ២នាក់វិញ ។ ប៉ុន្តែបើសិនជាអ្នកទាំងនោះ របូតដល់ផ្ទះនៅភូមិណាក៏ដោយ ក៏អាជ្ញាធរសមត្ថកិច្ច ចាត់ចែងឲ្យមានអាជ្ញាធរ និងពេទ្យចុះពិនិត្យធ្វើតេស្ត យកសំណាកទៅពិនិត្យ ហើយណែនាំឲ្យធ្វើចត្តាឡីស័ក រយៈពេល១៤ថ្ងៃ ដូចករណីនៅព្រែកដំបង ក្នុងស្រុកមុខកំពូល ខេត្តកណ្តាល ដែលមានយុវជនម្នាក់មកពីថៃ ចូលមករស់នៅដល់ផ្ទះក្នុងភូមិកំណើតរបស់គេ កាលពីចុងសប្តាហ៍មុននេះ ។
ទន្ទឹមនឹងជោគជ័យជាបន្តបន្ទាប់របស់កម្ពុជា ក្នុងការទប់ស្កាត់ និងកាត់ផ្តាច់ការឆ្លងសហគមន៍មិនថា ព្រឹត្តិការណ៍២៣វិច្ឆិកា ឬក៏ព្រឹត្តិការណ៍សហគមន៍២៨វិច្ឆិកានេះទេ គឺប្រមុខរាជរដ្ឋាភិបាល សម្តេចតេជោ ហ៊ុន សែន រួមទាំងក្រសួងសុខាភិបាល និងអាជ្ញាធរសមត្ថកិច្ច ពាក់ព័ន្ធ នៅតែបន្តអំពាវនាវឱ្យប្រជាពលរដ្ឋកម្ពុជាទាំងអស់ អនុវត្តន៍នូវវិធានការសុខាភិបាលឲ្យបានខ្ជាប់ខ្ជួន ដើម្បីរួមគ្នាទប់ស្កាត់ការចម្លងជំងឺកូវីដ១៩ ។ នោះគឺការអនុវត្តនូវវិធីសាមញ្ញៗ ដោយត្រូវពាក់ម៉ាស លាងសម្អាតដៃ និងរក្សាគម្លាតពីម្នាក់ទៅម្នាក់យ៉ាងតិច ១ម៉ែត្រកន្លះ ជាដើម។
ក្នុងនោះ ការជួបជុំឆ្លងឆ្នាំសកល នៅយប់ថ្ងៃទី៣១ ខែធ្នូ ឆ្នាំ២០២០ ឆ្លងចូលថ្ងៃទី១ ខែមករា ឆ្នាំ២០២១ ក៏គួរតែបងប្អូនប្រជាពលរដ្ឋយើង បន្តជួបជុំឆ្លងឆ្នាំ Countdown តាមក្រុមគ្រួសាររៀងៗខ្លួន ហើយយើងអាច Live រកគ្នាសិន ។ ធ្វើដូច្នេះ យើងបង្ការ ទប់ស្កាត់កុំឲ្យភ្លាត់ស្នៀត កើតមានព្រឹត្តិការណ៍ឆ្លងកូវីដសហគមន៍ ថ្ងៃ១មករា ឬក៏ថ្ងៃប៉ុន្មានមករា កើតឡើងជាថ្មីទៀត នៅប្រទេសយើង ។ ចូរកុំភ្លេចថា ការពារប្រសើរជាងព្យាបាល ៕ អត្ថបទដោយ៖ មុត ស្រីពៅ
ចែករំលែកព័តមាននេះ